Dioso jume-itothiana pijajumewecua mapanacuapijiwije
11
Bajayatami, daxita mapanacuapijiwije caejumewi tsawanapae abaxë. Nexata, cuaicuaijai caewiriajume. 2 Bajarapamatacabijawa bajarapamonae wecuapitsapa pemutowetsina. Nexata, caxitajaraba pexanianamatajëpaetusatoyo, Sinar nacuajawata pebocaetusato. Bajarajota, bajarapamonae nacopaba pejinawanapaenexa. 3 Nexata, itsamatacabi bajarapamonae najumaitsi: «Nacuenebianatsi waja-exanaenexa adobejawanë, pesebitonë isotota piatajanexa», najai. Nexata, bajarapamonae bajarapa-adobejawanë canacueneba ibocuenia, pijatomara pexanetsinexa. Bajarapijinia pacuenia, canacueneba asfaltowënëjawa pecatsanaponaenexa bajarapasebi-adobetonë, pecanacuenebiyaniwa pematajërëabipecatsanaejawa. 4 Bajaraxuacujinae, bajarapamonae najumaitsi: «nacuenebanutsianatsi wajatomarayo, bajarapacuenia piapiaboxaneto-ata, athëbëabetsia pepatsibonexa itaboxojawabetsia. Bajarapacuenia waxaitsi nacawënëliwaisitaena ayaijamatabëcuene wajaxainawanapaejawa mapanacuataje. Nexata, aponamatawenonaetsi tsane wajanawecuanatsanaejawa daxitanacuajawa», najai bajarapamonae.5 Itsiata baitsi jane, bajarapamatacabita Jehová runaica petaenexa bajarapatomara, piapiaboxaneto yajawa catsanaeya pefaratabuataponaejawa. 6 Nexata, Jehová jamatabë-itsi: «Marapamonaeje caebitsaëto, caewiriajume pecuaicuaijaiwinua. Bajaraxuata, bajarapamonae taxuxuaba bajarapapiapiaboxaneto penacuenebijawa. Nexata, bajarapamonae aeconoxae apotsisajinaetsi itsacuenejawa xua yabara copabijitsia bajarapabo penacuenebijawa. 7 Nexata, juya xanepana wajarunaejawareca wajajume-itothianaenexa pijajume, jamatejema penajumeyapëtaeyaniwa», jamatabëjai Jehová. Pesiwajamatabëjumaitsicowëya exana baja.
8 Bajarapacuenia Jehová bajarapamonae nawecuanatsanaeya-exana cayajatsiaya daxitanacuajawa. Bajarapamonae nexata copaba baja penacuenebijawa bajarapatomara.
9 Bajaraxuata, bajarapataxunae wënëruba Babel,a tsipaji bajarajota Jehová jume-itothiana caejume pecuaicuaijaiwimi daxita bajarapamonae. Bajarapajume-itothianaejawata, Jehová tocopata bajarapamonae natsanaeya penawecuajinawanapaenexa daxitanacuajawa.
Noé pexënato Sem pemomoxi, yabara peliwaisi
10 Mapamonaeje Sem-jawawerena penaexanaponaewi. Anijawaibeje itsa xaina petsewijawa mapanacua pebubutsicujinaeje, Sem xaina bajarapamatacabita cien pawaibeje. Bajarapamatacabijawa pijinia pexënato xaina pewënë Arfaxad 11 Bajaraxuacujinae, Sem ponapona quinientos pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
12 Arfaxad pijinia itsa xaina treinta y cinco pawaibeje, bajarapamatacabijawa xaina pexënato pewënë Sala 13 Bajaraxuacujinae, bajaraponë Arfaxad ponapona cuatrocientos tres pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
14 Sala-ata pijinia itsa xaina treinta pawaibeje, bajarapamatacabijawa xaina pexënato pewënë Heber. 15 Bajaraxuacujinae, bajaraponë Sala ponapona cuatrocientos tres pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
16 Heber-ata itsa xaina treinta y cuatro pawaibeje, bajarapamatacabijawa pexënato xaina pewënë Peleg. 17 Bajaraxuacujinae, bajaraponë Heber ponapona cuatrocientos treinta pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
18 Peleg itsa xaina treinta pawaibeje, bajarapamatacabijawa naexana pexënato Reu. 19 Bajaraxuacujinae, bajaraponë Peleg ponapona doscientos nueve pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawabelia.
20 Reu itsa xaina treinta y dos pawaibeje, bajarapamatacabijawa xaina pexënato pewënë Serug. 21 Bajaraxuacujinae, Reu ponapona doscientos siete pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
22 Serug itsa xaina treinta pawaibeje, bajarapamatacabijawa xaina pexënato pewënë Nacor. 23 Bajaraxuacujinae, bajaraponë Serug ponapona doscientos pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata, bajarapawainëjawalia.
24 Nacor pijinia itsa xaina veinte y nueve pawaibeje, bajarapamatacabijawa xaina pexënato Taré. 25 Bajaraxuacujinae, ponapona Nacor ciento diecinueve pawaibeje pematatsënëa. Icatsia, orijibia xaina itsamonae pexi, pebijiwi, petiriawi-ata bajarapawainëjawalia.
26 Taré pijinia itsa xaina setenta pawaibeje, bajarapawainëjawalia xainapona pexi acueyabi ponëbeje: Abram, Nacor, Harán.
Tarépijinëmijawawerena pepitsapaponaewi
27 Mapamonaeje pepitsapaponaewi Tarépijinëmijawawerena. Bajaraponëmi xaina acueyabi ponëbeje pexi, Abram,b Nacor, Harán. Harán xaina pexënato pewënë Lot. 28 Harán-pijinë tëpa Ur tomarajawata,c Caldea nacuata pe-ecaetomara, paxa Taré pewajënaeya. Bajaraponëmi tëpa panacuata naexana.
29 Abram nacojioba. Pita Saraid pijawanexa. Nacor-ata pijinia nacojioba. Pita Milca. Bajarapowa Harán-pijinë pexënatoyo, Isca pejuyapijiwa. 30 Sarai apoxainae pexi, tsipaji bajarapowa mawecowa.
31 Taré pitsapa Ur tomarawecua pepatsinexa Canaán nacuayabelia. Barëpona pexënato Abram, pecopena Sarai yajawa. Pemomo Lot-ata barëpona. Itsiata baitsi jane, itsa pata Harán tomarata,e abaxë bajarajota jinawanapa bajayajebi. 32 Nexata baja, belia Taré tëpa Harán nacuata, pepuaxainae doscientos cinco pawaibeje, patsinejewa Canaán nacuayabelia.