Dioso icatsia junatatsi Abram
12
Itsamatacabi Jehová jumaitsi Abram-jawabelia:—¡Wecuaponare nija-ira, nijamonae-ata, axa pijabo-ata, nepatsinexa pa-irabelia catsitajëtsijitsiatsi! 2 Bajarajotalia, ayaibitsaëto nemomoxi naexanaponaena. Bajarapamonaeta xanë Jehovánëa ayainacua capitsapaenajë. Ayaicuenia pexaniacuenia cayawenonaenatsi. Catocopatsianatsinua jiwi yaiyataeya pecawënëliwaisicacuaicuaijainënexa. Bajarapacuenia juya itsamonae pexaniacuene natoyapëtaena xamë nejamatabëcuene. 3 Pamonae pijinia pexaniacuenia cato-exanaena, xanë bajarapamonae tocopatsianajë tayawenonaejawanexa pexaniacuenia. Pamonae pijinia pibisiacuenia cato-exanaena, bajarapamonae pijinia xanë tocopatsianajë pibisiacuene petaenexa. Nexata, xamë nejamatabëcueneta, daxitanacuanëpijiwib natoyapëtaena pexaniacuene tayawenonaejawanexa —jai Jehová Abram-jawabelia.
4 Bajaraxuacujinae, Abram pitsapa Harán tomarawecua, pacuenia Jehová jumaitsitsi pexanaenexa. Pejionë Lot-ata napona bajaraponë pepëta. Itsa Abram pitsapa Harán tomarawecua, xaina bajarapacujinaeta setenta y cinco pawaibeje. Bajaraponë pona pa-irabelia Jehová tsipaebatsi, pepatsinexa Canaán nacuajawabelia. 5 Bajaraponë barëpona pijawa Sarai. Pejionë Lot-ata yajawapona. Pecobecowëjawanë-ata daxita capona. Barëpona pamonae natocomuata Harán tomarata bedajubicuenia, amoneya petonacuenebiwinexatsi. Bajarapamonae-ata yajawapona Abram Canaán nacuayabelia. 6 Itsa pata baja Canaán-jawata, Abram najetaruca itsanacuaxijawa pepatsinexa Siquem tomarabelia. Patajopa itsajota xaina pinijinaejawa pexania-itacaënae, Morepijinë peponaponaetusatoyojawata. Bajarapamatacabi abaxë jinawanapa Canaán-pijinë pemomoxi ayaibitsaëto bajarapanacuata. 7 Bajarajota nexata, Jehová tsitanaitajëta Abram:
—Mapa-ira yabara cajumaitsitsije tacarajutsinexa, nijamonaenexanua tsaponae newënamuto —jai Jehová.
Nexata, Abram bajarajota altar-jawac tonacuenebanuta Jehová, penajamatabëcuene-itajëtsinexa asiwaya peyaiyataejawa, tsipaji bajarajota tsitanaitajëtatsi Jehová.
8 Bajaraxuacujinae, pona petsutonëmuxuneneyojawabelia, patsutoyenepanata eca Betel tomara imoxoyojawatareca. Bajarajota, icatsia nacuenebanuta caxatabiaya pijacarpabo,d tsipaji cae-epatoyo ponaponaejitsia Betel, Hai tomarabejetuatuajëjawata. Bajarajota-ata nacuenebanuta itsa-altar Jehová pewënëta. Peweretsicujinae, wajëca Jehovájawabelia. 9 Xuacujinae, icatsia naropota itsajawabelia. Pona be-axayocuenia tsaponae pepatsinexa Neguev-wënëtusatojawabelia.
Abram pona Egipto nacuajawabelia
10 Pacujinaeta Abram ponapona Neguev nacuata, nexata tocopiapatatsi pinijijanibocuene. Ajibi pexaejawa daxita bajarapanacuanëjawa. Bajaraponë nexata barëpona pijamonae Egipto nacuayabelia, penaponaponaenexa bajarapanacuatalia, tsipaji itsajota ponapona bajaraponë, bitso ajibi pexaejawa. 11 Itsa bajaraponë imoxoyota najetaruca Egipto nacua, Abram nexata jumaitsi pijawa Saraijawabelia:
—Xanë raja yapëtaniji xamë pexaniawacuenemë. 12 Itsa cataena Egipto nacuapijiwi, cajumaitsi tsane: «Mapapetiriwaje maponë pijawaje», cajai tsane. Nexata, bajarajota nesiwanajamatabëxainaena tanebeyaxuabinexa. Xamë cacopatsiana, bajarapamonaeyajuwënënë juya pecapitsinexa. 13 Bajarapitsicuene tanetocopiapatsiyaniwa xanëjawaberena, tanebeyaxuabiyaniwa xamë nejamatabëcuene, nexata jumaitsimë tsane mapacueniaje: «Bajaraponë raja pejuyapijiwanë», jamë tsane —jai Abram pijawajawabelia.
14 Itsa baja pata Abram Egipto nacuayabelia, Egipto nacuapijiwi Sarai yabara jumaitsitsi: «Pexaniawa bitso», siwajamatabëjaitsi. 15 Tanetsinua faraóne pijajiwi, pamonae barë-eweta Egipto nacua. Nexata, bajarapamonae pona Egipto nacua pewetsinëjawabelia, petsipaebinexa Sarai pexaniawacuene. Nexata, bajaraxuacujinae Sarai caponatsi faraón peponaponaebojawabelia.
16 Nexata, Sarai pejamatabëcueneta, faraón tane xaniawaetsia Abram. Abram rajutatsi amoneyacuenia dajubimonae: oveja, vaca, burro, camello-ata yajawa. Rajutatsinua pebinëxi, petiriwaxi bedajubicuenia amoneya petonacuenebiwinexatsi. 17 Itsiata baitsi jane, Jehová naneconitsiaya tocopata witanecuene faraón pijajiwi yajawa, bajaraponë pecapatsixae Sarai pijabojawaberena pijawacuenia, Abram pijawami. 18 Nexata, bajaraxua itsa tane Egipto nacua pewetsinë petocopiapatsijawatsi, junata Abram pejumaitsinexa:
—¿Detsa xuajitsia xaniawaetsia aponetsipaebimë? Maxuanë tanecatocopiapatsije. ¿Dexuajitsia aponejumaitsimë xaniawaetsia? «Mara powa tajawaje», aponejamë. 19 Tsipaji xamë nejumaitsimë: «Mara tajuyapijiwaje», nejamë. «Tajawa raja», nejamë tsipae cajena —jai.
20 Nexata, pijajiwi itoroba faraón pejutsinexatsi Abram Egipto nacuawecua, pebarëponaenexa pijawa, pijamonae yajawa, xua-ata xaina daxita pecaponaenexa.