Abram, Lot-beje, nawecuanatsatabeje
13
Pacujinaeta Abram pitsapa Egipto nacuawecua, pijawa yajawa pona, pecobecowë yajawa, penawiatsinexa icatsia Neguev-tusatojawabelia. Pejionë Lot yajawanawiarena. Daxitaxua xainabeje canajetarucabeje. 2 Abram bajarapamatacabi bitso xaina pecobecowë. Xaina oro, palatanua, dajubi-ata ayaibitsaëto. 3-4 Nexata, penawiatsicujinae Neguev nacuawecua, be-axayocuenia pona pepatsinexa icatsia Betel tomarayojawabelia. Bajaraxuacujinae, pona icatsia itsajota bajayata copiayami ponapona Betel, Hai tomarabejetuatuajëjawata, itsajota bajayata nacuenebanuta altar-jawa. Bajarajota, icatsia wajëca Jehovájawabelia.5 Bajarapijinia pacuenia, Lot-ata bitso pexainaenë pecobecowë. Xaina ayaijawa oveja, vaca, ayaibitsaëtonua jiwi amoneya petonacuenebawanapaewitsi. Paxuanë Abram cuenejëpa pexainaecuene. 6 Panacuata bajaraponëbeje ponaponabeje, bitso baja apotoyacaëjëpaetsibeje pexaejawa pijadajubinexa. Tsipaji bitso ayaibitsaëto xainaponabeje pijadajubi, nexata bepijiayo po̱na werenebiaba. Nexata, apocuenecaëjëpaetsibeje caejawata penajuaponaponaenexabeje paxuanëbeje. 7 Belia, pamonae Abram to-ewetatsi pijadajubi, pamonae-ata Lot to-ewetatsi pijadajubi, bajarapamonae itsajawata tonabeyabiabatsibeje, peto-ajibixaetsi dajubi pexaejawa, bitso penajuajinawanapaexae caejawata. (Bajarapamatacabita, bajarapaCanaán nacuata abaxë jinawanapa Canaán-pijinë pemomoxi, ferezeowi-ata.) 8 Nexata, itsamatacabi Abram jumaitsi pejionë Lot-jawabelia:
—Waxaitsibeje raja napijamonaenëtsibeje. Apoxanepanae liwaisi wajanatsixainaejawabeje wajajiwibeje pejamatabëcuene, tsipaji pamonae cato-eweta nijadajubi, xanë-ata pamonae neto-eweta tajadajubi, nacatonabeyabiababeje po̱na yabara. Nexata, bajarapacuenia aponacatoxanepanaebeje wajanajuaponaponaenexabeje. 9 Bajaraxuata najamatabëxainaename, tsipaji ayainacua tsarucae mapanacuaje. Nawecuanatsatsianatsibeje baja. Pitsianame payenepanabelia catsixanepana neponaponaenexa. Xamë itsa ponaejitsipame wajacujuanenia, xanë juya ponaejitsipajë wajatsawenonenia. Itsa jume, xamë itsa ponaejitsipame mapayenepanabeliaje, xanë pijinia ponaejitsipajë beliaje. Nexata, bajarapacuenia nawecuaponaenatsibeje —jai Abram Lot-jawabelia.
10 Nexata, Lot matatsënënaëcota daxitanacuayo, Jordán menematatujawawerecacujinae daxita Zoar tomarajawabereca. Bajarapatusato tane pexainaejawa pexaniameranë, pacuenia Jehováa pijapabimi Edén nacuata, pacuenianua Egipto nacua. Nexata, tsitajëpatsi bepexania-ubipabixaneto penaxaniabijawa, pacuenia bajarapanacuabeje. (Jehová abaxë itsa apoweriapae Sodoma, Gomorra tomarabeje, nexata pexaniapo̱naraënaejawa tsanucae bajarapanacuami.) 11 Nexata, bajaraponë Lot pita bajarapatusato, Jordán mene imoxoyojawata pebocaetusato peponaponaenacuanexa. Bajaraponë pona pemutuabereca.b Nexata, bajarapacuenia Lot wecuanatsata paxuanë Abram, pewecuaponaponaenexa saicaya. 12 Abram itsiata nacopata Canaán nacuata. Lot juya pona Jordán mene-itapayabereca pebocaetusato, Sodoma tomara imoxoyo pe-ecaejawabereca. Bajaraponë nacueneba pijataxunaeyo bajarapapexaniatusatopijitomaraxi canacujitsijawata. 13 Bajarapamonaemi Sodoma tomarapijiwimi bitso piacujirubejewi Jehová pitabarata, tsipaji bitso Jehová apopejitsipaecuene pexanawanapaewi.
14-15 Itsa baja Lot wecuapona paxuanë, bajarapamatacabijawa Jehová jumaitsi Abram-jawabelia:
—¡Daxita mapanacuaje matatoyorotsia taema, maberecaje, mabetsiaje, belia-ataje! Daxita panacua taneme xua catsitajëtatsi, xamë rabaja nija-ira tsane. Nemomoxi-ata pijanacua tsaponae tsane daxitamatacabijawabelia pejinawanapaenexa. 16 Bitso ayaibitsaëtoxaneto naexanaponaena nijamonae nemomoxi xanë tajamatabëcueneta. Pacuenia caejiwiyo-ata atsapërë aponamata-ëjëtsicapanepae, bajarapijinia pacuenia itsamatacabi itsi tsane nemomoxi. Itsajiwi-ata aponamata-ëjëtsicapanepae tsane. 17 ¡Nexata, ponare daxita bajarapanacuajawa matatoyorotsia, berecaje, beliaje, betsiaje, neyapëtaenexa panacuaxaneto carajutsijitsiatsi! —jai Jehová.
18 Bajarapacuenia nexata, Abram pijacarpabomi matajona, peponaenexa pamatawonotojawata ponapona Mamrewënënë, bajarajota peponaponaenexa. Bajaraponë ponapona imoxoyo Hebrón tomarajawata. Pepatsicujinaelia, bajarajota icatsia Abram nacuenebanuta altar-jawa Jehová pewënëta.