Abram pejionë Lot capanepa pijawajabitsaëwecua
14
Pamatacabi Abram ponapona Hebrón tomara imoxoyojawata, bajarapamatacabi Amrafel-wënënë Sinar nacua pewetsinë. Arioc-wënënë pijinia Elasar nacua pewetsinë. Quedor-laómer-wënënëa pijinia Elam pepopeyanacua-ewetsinë, Tidal-wënënë-ata pijinia Goim pepopeyanacua-ewetsinë. Bajarapamatacabijawa, Quedor-laómer natsicueyajunata bajarapamonae pebarënawajabitsaëtanajetarucaenexa itsanacuanëjawa. 2 Bajarapamonae nawajabitsaëtapona itsanacuanë pewetsiwijawabelia. Mapamonaejawabeliaje: Berawënënë, Sodoma pepopeyanacua-ewetsinë, Birsawënënë, Gomorra pepopeyanacua-ewetsinë, Sinab-wënënë-ata, Adma pepopeyanacua-ewetsinë, Semeber-wënënë, Zeboim pepopeyanacua-ewetsinë, Bela-ata pepopeyanacua-ewetsinë. (Itsawënë Bela tomarayo, Zoar pijinia). Bajarapatomaranë pewetsiwijawabelia nawajabitsaëta Quedor-laómer-bana. 3 Bajarapacinco ponëbeje peyanacua-ewetsiwi juya barënacaetuata pijajiwi wajabitsaëwi caejawata, Sidim-wënëtusatojawata, Mar Muertowënë pucaxaneto imoxoyojawata. 4 Bajaraponë Quedor-laómer picani namatacaitorobaponapona doce pawaibejecuenia bajarapacinconacuanëpijiwi, pecuene-amoneyabicujinae bajayata. Itsiata baitsi jane, trece pawaibejejawata bajarapamonae, cinco ponëbeje pewetsiwi, icatsia najamatabëxaina pewecuapitsapaejawa Quedor-laómer penamatacaitorobijawatsiwecua. 5 Nexata, catorce waita, Quedor-laómer pebarënajamatabëjëpaewi barënaropota, pepatsinexa bajarapacinco ponëbeje pewetsinacuaxijawabetsia, bajarapamonae penawajabitsaëtanajetarubenaenexa. Copiata pata Astarot Karnaim tomarabelia, itsajota jinawanapa refaítawi.b Bajarapatomarapijiwimi cuene-amoneyaba penabejawata. Bajaraxuacujinae, icatsia pona Ham tomarabelia pecuene-amoneyabinexa zuzitawi.c Pecuene-amoneyabicujinae zuzitawi, icatsia naropoba Save-quiriataim tomarabelia, itsajota jinawanapa emitawi.d 6 Xuacujinae, icatsia nawajabitsaëta horeowijawabelia.e Bajarapamonae Seir nacuapijitsutonëjawa pejinawanapaewi. Bajarapamonae-ata cuene-amoneyaba. Rëcëpeca bajarapamonae. Nexata, tajëjawabelia barapona petusatonacuajawabelia. Pëcopata pebaraponaejawa El-Parán-wënë ferabojawabelia. 7 Nexata, itsa barënawiata petusatonacuawerena, peyajawaponaewi barëpata En-mispat nacuajawata. Itsawënë pijinia Cades, panacuata jinawanapa amalecitawiriawi. Nexata, bajarapanacuapijiwimi tobijiana daxita pijabonëmi, pexaejawacuene-ata. Patomaranë namataëxënapona namutua penajetarubenaejawata bijiananajetarubena. Bajarapacuenia exana amorreowijawabelia-ata, pamonae jinawanapa Hazezon-tamar nacuajawata. Bajarapacuenia Quedor-laómer barënabenajetaruca, pepatsinexa Sidim nacuayabelia.8-9 Nexata jane baja, Sodoma pepopeyanacua-ewetsinë, Gomorra pepopeyanacua-ewetsinë, Adma pepopeyanacua-ewetsinë, Zeboim pepopeyanacua-ewetsinë-ata, itsanë pijinia Bela pepopeyanacua-ewetsinë pona Sidim-tusatojawabelia, bajarajotalia pebarënawajabitsaëtsinexa. Nexata, barënabia bajarajotalia Quedor-laómer-jawabelia, pebarënajamatabëjëpaewijawabelia yajawa. Maponëxije barënajamatabëjëpa Quedor-laómer, Elam pepopeyanacua-ewetsinë: Tidal, Goim pepopeyanacua-ewetsinë, Amrafel, Sinar pepopeyanacua-ewetsinë, Arioc, Elasar pepopeyanacua-ewetsinë-ata. Bajarapamonae xaina caejamatabëcuene Quedor-laómer-jawabelia, nexata napata Sidim-tusatota. 10 Bajarapamatacabita, Sidim-tusatojawata penabenacuajawata, nawita pijinia mëthëanë. Bajarapamëthëanë wënëca bemawitsapatojawanë, pijacuata peyanacuanaexanaemëthëanë. Nexata, penabematacabi Sodoma, Gomorra tomara pewetsinëbeje, joparecabeje pepanepaenexabeje bajarapamëthëanëjawareca, pewecuanamatayabinexabeje pijawajabitsaë. Bajarapacuenia nexata, wecuapanepabeje. Itsanëanë pewetsiwi pijinia rëcëpa petsutonëjawabelia pepanepaenexa.
11 Pamonae pecuene-amoneyabiwi, daxita pexaejawacuene wecuacaponatsi, pecobecowëjawanë-ata. Xuanë xaina penamatamotsijawanë wecuanotatsi, Sodoma tomarapijiwi, Gomorra tomarapijiwi-ata pijajawanëmi. Xuacujinae baja, pona. 12 Bajarapamatacabita, Lot naponapona Sodoma tomarajawata, Abram pejionë. Bajaraponë-ata nexata nacaponatsi bajarapanabejawata. Daxita pecobecowëjawanë yajawacaponatsi. 13 Itsiata baitsi jane, itsanë pepanepaenë bajarapanabejawawecua pona Abram-jawabelia, hebreonëjawabelia,f petsipaebinexa pejionë peliwaisi. Bajaraponë ponapona pexaniamomoto-itacaënaejawata, Mamre pijatusatojawata, amorreowiyajuwënënë. Nexata, Mamre, pijamonaenëbeje yajawa, Escol, Aner-beje, jamatabëcueneyawenonatsi Abram.
14 Itsa bajarapacuenia Abram jumetane pejionë yabara peliwaisi pecaponaejawatsi, daxita pecobecowë yajawa, pijajiwi-ata yajawa, nexata Abram caetuata pamonae amoneya petonacuenebawanapaewitsi, pijabota penaexanaponaewi, pepëbaraponaenexa, pebarënawajabitsaëtsinexa Quedor-laómer-banajawabelia. Bajarapabitsaëto trescientos dieciocho ponëbeje daxitata. Nexata jane baja, barëpitsapa bajarapamonae, pebarajinaenexa pecaponaewitsi Lot. Nexata, pëcaxina Dan nacuajawatalia, tsipaji bajarapamonae bajarajotalia pata penacuera-ewetsinexa. 15 Nexata, merawi Abram bajarapamonae barënabia pepëbarajinaewijawabelia, itsajota bajarapamonae jamatejema tsarëcëpae. Barapona Hoba nacuajawabelia, Damasco tomara imoxoyojawata pe-ecaetomarayojawabelia. 16 Nexata, daxitaxuanë wecuanotatsi bajarapamonae picani, juya nexata, Abram barëwecuapita daxita bajaraxuanëmi. Nexata, bajarapacuenia capanepa Abram pejionë Lot. Nexata, icatsia daxita xua pejionë pijajawami towecuapita. Capanepanua daxita petiriawi, itsamonae bajarapatomaranëmi peyajawataicaewimitsi.
Melquisedec pexaniacuene yapëtaeya-exana Abram, xua taejitsia Dioso pewënëta.
17 Pacujinae Abram barënawiatanajetaruca pebarënawajabitsaëtsicujinae Quedor-laómer-bana, pecuene-amoneyabicujinae-ata peyajawaponaponaewi, nexata Sodoma pepopeyanacua-ewetsinë lia pecaxitajarabinexa Abram, pecopiapitsinexa Savewënëtusatoyojawabelia.g Bajarapatusatoyo pepopeyanacua-ewetsinë pijatusatoyo. 18 Bajarajotanua, caxitajarabatsi Melquisedec,h Salem pepopeyanacua-ewetsinë. Bajaraponë petonacuenebinë pepoDioso ayaijamatabëcuenenëjawabelia sacerdotenëcuenia.i Penamataëxënaecujinaetsi, bajaraponë pijadorowecua jutsina pan-bëanë, vinora yajawa perajutsinexatsi Abram-bana. 19 Nexata, pexaniacuene yapëtaeya-exanatsi Abram, xua taejitsia Dioso pewënëta. Jumaitsi mapacueniaje:
—Xamë Abram, Dioso bitso pexaniacuenia cayawenonae, ponë pepoDiosonë daxitawecua, ponë-ata athëbëpijicuene pexanaenë, irapijicuene-ata —jai.
20 Icatsia, jumaitsi Dioso wënëxaniatsiaya:
«Xanepana rabaja daxitajiwi pejumaitsitsabiabinexa Diosojawabelia: ‘Diosomë, xamë pepoDiosomë daxitawecua, ayaijamatabëcuenenëmë,’ pejaitsabiabinexa, tsipaji bajaraponë cayawenona necuene-amoneyabinexa daxitapamonae ajenaconoxaeta barëcuene-amoneyabame», jai Melquisedec Abram-jawabelia pewënëbarëyataejawatatsi.
Nexata, bajarapaepatota Abram rajuta Melquisedec-jawabelia pewecuanotsiyajuwënëjawanëmi, pecuene-amoneyabiwimi pijajawanëmi. Rajutapona caejawayo diez xuayomibejejawayajuwënëjawami.j
21 Bajaraxuacujinae, Sodoma tomara pewetsinë jumaitsi Abram-jawabelia:
—¡Abram, nerajure ëtajanacuapijiwi! Catonacopatsiana daxitaxua pawecuanotame pataxainaejawanëmi —jai bajaraponë.
22 Itsiata baitsi jane, Abram jumaitsi:
—Xanë rabaja naliwaisicajunuajë pewajënaeya Jehová pepoDiosojawabelia, nexainaeyajuwënëjawanëmi tanapitsiyaniwa. Bajaraponë Dioso ayaijamatabëcuene pexainaenë. Pexanaenënua athëbëpijicuene, irapijicuene-ata. 23 Nexata, xuata xanë aponapitsinë tsane xamë xuanë nexainaeyajuwënëjawanë. Caejilumaëtoyo-ata, caecorreayo-ata, tanataxuxatatsi-sandalia pijamaëtoyonexa-ata aponapitsinë tsane cajena, mapacueniaje tanebarajamatabë-itsiyaniwamë itsamatacabijawabeliaje: «Xanë tajamatabëcuene bajaraponë pexainaenë naexana», tanebarajamatabëjamëyaniwa. 24 Xanë apojitsipaenë caejawayo-ata tapitsijawa nijajawayajuwënëjawami. Itsiata baitsi jane, tanetonacuenebiwi amoneya pita pexaejawayajuwënëjawanë pexaenexa. Pamonae-ata pijinia neyanaba, Aner, Escol, Mamrebana, bajara-ëpamonae taneyanabixae nanota itsajawanë, xuanë pawecuanotajë papecawecuanotsijawanëmi panecueyawi —jai Abram Sodoma tomara pewetsinëjawabelia.