Dioso najumeliwaisicajunua Abram-jawabelia
15
Abram pejionë Lot pecapanepaecujinae, icatsia xuacujinae, Jehová jumaitsi Abram-jawabelia bemajitsinaebocuenia:—¡Pëtsa junawame nijawajabitsaëwijawabelia, tsipaji xanë cayacaranatsiaponaponatsi peca-itsacueniabiyaniwa! Daxitaxua carajutsianatsi, pewajënaeyabelia cato-ayaijawa tsaponae tsane —jai Jehová Abram-jawabelia.
2-3 Itsiata baitsi jane, Abram jumecanawiata mapacueniaje:
—Tajatuxanenëa Jehová, ¿detsa pitsijawa yabara netoxanepanaejitsipa ayaijawa taxainaponaenexa? Xamë baja yapëtaneme apotaxainaejawa taxi, tsipaji xamë abaxë aponerajutsimë caejiwi-ata taxënatonexa, xua xainaponajë tawajënaeyabelia pecanacopatsijiwinexa. Bajaraxua meta canacopatsipa ponë xanë witsatajë tanetonacuenebabiabinënexa amoneya, Eliezer, Damasco tomarapijinë —jai Abram Jehovájawabelia.
4 Itsiata, Jehová jumaitsi Abram-jawabelia:
—¡Jume raja! Xamë raja xainaename itsamatacabi peponexënato. Bajaraponë raja canacopatsiana. Itsanë raja peponexënatowecua apocanacopatsi tsane —jai icatsia Jehová.
5 Jehová nexata junata pebarëpitsapaenexa wayafuabelia. Jumaitsi:
—¡Abram, taema athëbëabetsia! ¡Namata-ëjëre tulupu, itsa cacuenecaëjëpa nenamata-ëjëtsijawa! Pacuenia tulupu aponamata-ëjëtsicapanepaemë, bajarapacuenia itsi tsane itsamatacabi nemomoxi —jai Jehová.
6 Bajarapaepatota nexata, Abram jumexaniatane Jehová najumecapanepaeya pejumaitsijawatsi. Bajaraxuata, Jehová xaniawaetsia bajaraponë aneconijibia tanetsi. 7 Nexata, Jehová jumaitsi:
—Xanë rabaja Jehovánë, Ur tomara, Caldeomonae pijanacuata pe-ecaetomarawecua tacacapitsapaenë, mapa-iraje tacarajutsinexaje, newënamuto nemomoxi pecanacopataponaenexa —jai Jehová.
8 Abram icatsia jumaitsi:
—Tajatuxanenë Jehová, ¿denexata pacuenia yapëtaenajë xanë tanerajutsi-iramë tacanacopatsinexa, tamomoxi-ata pecanacopataponaenexa tawënamuto? —jai Abram Jehovájawabelia.
9 Jehová jumecanawiata. Jumaitsi:
—¡Netocapare dajubixi, becerro pesorowato, cabra pesorowato, oveja-ata pebito, acueyabi pawaibeje pexainaenëanë! Capatsianamenua anija-ucucutowirianëbeje yajawa. Caenëyo tsiquiriwirianëyo. Itsanëyo pijinia pepo-ucucutoyo pejananëyo —jai Jehová.
10 Bajarapacuenia nexata, Abram pejumaitsicueniatsi tocapata daxita Jehovájawabelia. Caenëyo canacujitsia pebeyaxuabicujinae, tupatitibiabapona, namata-enetsia caetupayo canacujitsia pebuataponaenexa corobotsiayab anijabërëtobejecuenia. Itsiata, bajarapacuenia apo-exanae ucucutowirianëyobejejawabelia. Saya daxitanëyobeje buatetabeje. 11 Bajarapajebitupanë nexata tsimaxëpatsipatsica quequeremonae picani pexaenexa. Itsiata baitsi jane, Abram yajiwiyorotapona. 12 Itsa baja merawiyo tsaponae, Abram bajarapaepatota bitso ayaicuenia majitabeca. Pemajitabecaejawata nexata, Abram matatoyorotsia najetarucatsi pequirijaimerawibo. Nexata, bajaraponë bitso junawa.
13 Nexata, Jehová jumaitsi Abram-jawabelia:
—Beyapëtaneme mapacueneje: Nemomoxi itsamatacabi jinawanapaena itsanacuayabelia mapanacuawecuaje. Bajarapanacuatalia amoneya tonacuenebawanapaena c bajarapanacuapijiwi. Bitso ayaicuenia bejiobia-exanabiabianatsid cuatrocientos pawaibejecuenia. 14 Itsiata baitsi jane, xanë naneconitsia-exanaenajëe patomarapijiwi bajarapacuenia exanatsi amoneya petonacuenebabiabixae. Itsiata, bajaraxuacujinae nemomoxi pitsapaena bajarapacuenemiwecua ayaijawa pecobecowë yajawa.f 15 Xamënexa pijinia cajumaitsitsi: «Xamë rabaja tëpaename itsacuenenejewamë, nepuaperujunëyo tsane. Bajarapacuenia nexata, cabuatsiana nijamonaemi yajawa», cajaitsi pecatocopiapatsicuene yabara. 16 Nemomoxi pijinia jinawanapaena bajarapanacuata penaexanaponaewi cuatro papemomoxibitsaëtobejejawabelia,g baitsi cuatrocientos pawaibejejawabelia. Nexata, bajarapamatacabijawabelia matapania xanë icatsia nawiabia-exanaenajë nemomoxi mapanacuayaberenaje. Bajarapaepatota jane baja, amorreomonae bitso pibisiacuene exanawanapaena taitabarata. Itsiata, abaxë ajenaconoxae apotocopiapatsitsi paneconita naneconitsia-exanaejitsianëh —jai Jehová najumecapanepaeya.
17 Itsa baja merawijitsia, a̱jena̱ aitacatu, bajarajota naitajëta pexaniatsëxëboyo, waxiyojawawetsina pepitsapaejawa. Yajawanaitajëtanua pitayotsicunu tajuitsiaya pecaponaejawa. Bajaraxuayobeje najetarucabeje pijacuata bajarapadajubitupaxi pejebituatuajëjawa. 18 Bajarapaepatota, Jehová najamatabëcuene-itajëta penajumeliwaisicajonejawa Abram-jawabelia ira perajutsijawanexa. Nexata jumaitsi:
—Mapa-iraje rajutsianajë nemomoxijawabelia, Nilo menejawaweliacujinae pepatsinexa Éufrates menejawabelia. Bajarapa-iratusato rajutsianajë pijanacuanexa. 19-21 Marapamonaeje pejinawanapaenacuanë yabara jumaitsinë tarajutsinexa nemomoxijawabelia: pijanacuanëmi ceneowi, cenezeowi, cadmoneowi, heteowi, ferezeowi, refaítawi, amorreowi, cananeowi, gergeseowi, jebuseowi. Daxita bajarapamonae pijanacuanëmi rajutsianajë nemomoxijawabelia pejinawanapaenacuanexa —jai Jehová Abram-jawabelia.