Agar pexënato Ismael, yabara peliwaisi
16
Sarai apotoxainae pexi Abram-jawabelia. Itsiata baitsi jane, bajarapamatacabi xaina amoneya petonacuenebiwatsi, Egipto nacuapijiwa. Bajarapowa pewënë Agar. 2 Nexata, Sarai jumaitsi Abram-jawabelia:—¡Nejumetaema, itsaliwaisiyo cajumaitsijitsiatsi! Xanë raja aponetocopatsi Jehová taxi taxainaenexa xamëjawabelia. Itsiata baitsi jane, catocopatsianatsi Agar nebarëponaponaenexa benijawacuenia, amoneyacuenia tanetonacuenebabiabiwa. Belia bajarapowajawabelia xainaejitsipajë betaxijiwiyonexaa —jai Sarai pamona Abram-jawabelia.
Nexata, bajarapaepatota Abram jumejejai xua pijawa jumaitsitsi. 3 Bajaraponë bepijawacueniab baja pita Agar, Egipto nacuapijiwa. Sarai rajuta Abram pepitsinexa Agar pacujinae xaina bajaraponë diez pawaibeje Canaán nacuata peponaponaecujinae. 4 Abram nexata imoxoyoba bajarapowa. Agar nexata nacoxita. Itsa baja bajarapowa nayapëtane penacoxitsijawa, nexata be-ayaijamatabëcuenewa natane pijatuxanewawecua. Bajaraxuata, bijiaya naëcota pijatuxanewa.
5 Nexata, Sarai jumaitsi Abram-jawabelia:
—Xamë raja nejamatabëcuene Agar nitoyanaëcota. Xanë baitsi picani tajacuata carajutatsi bajarapowa nijawanexa. Itsiata baitsi jane, bajarapowa xanëwecua penacoxitsixae be-ayaijamatabëcuenewa natane. Bajaraxuata, jitsipajë Jehová wajanacajumaitsijawabeje itsa meta xanë tajamatabëcuene, itsa jume, xamë meta nejamatabëcuene —jai Sarai Abram-jawabelia.
6 Nexata, Abram jumecanawiata:
—¡Abaxë jane nejumetaema! Xamë jane amoneya pecatonacuenebabiabiwa bajarapowa. Pacuenia catsitaxanepana nexanaenexa bajarapowajawabelia, bajarapacuenia exanaename —jai.
Nexata, Sarai jejai. Itsiata baitsi jane, Sarai itoyanaëcota Agar. Nexata, conitabiaba. Nexata, belia Agar anaeya wecuapona itsajawabelia. 7 Bajarapaepatota, pewecuaponaejawata, petusatonacuatalia caxitajarabatsi Jehová pija-ángelnë.c Itsajota irawetsina mera pepitsapaemëthë eca, bajarapamëthëjawatalia bajarapowa caxitajarabanutatsi tajëjawatalia. Bajarapamera pepitsaparucaemëthë eca Shur tomarajawabelia peponaenamutomuxunenetalia 8 Nexata yanijobatsi:
—Agar, amoneya netonacuenebiwa Sarai, ¿Detsa werena poname? ¿Detsa belia poname? —jai ángelnë. Nexata, bajarapowa jumaitsi:
—Wecuaponajë raja tajatuxanewa Sarai —jai Agar.
9 Nexata, Jehová pija-ángelnë jumaitsi bajarapowajawabelia:
—¡Icatsia, nawiaremelia neponaponaenexa nijatuxanewajawatalia! ¡Daxitaxuanë ca-itoroba, jumecowënëtsianame! —jai Jehová pija-ángelnë.
10 Icatsia, Jehová pija-ángelnë jumaitsi tsanucae Agar-jawabelia:
—Xanë raja tajamatabëcueneta nemomoxi ayaibitsaëto pitsapaponaena. Itsajiwi-ata aponamata-ëjëtsicapanepae tsane. 11 Yacotamë rabaja nexënatonëyo. Bajaraponëyo wënërubianame Ismael,d tsipaji raja Jehovánë cajumetanetsi newajëtsijawa, pecabejiobia-exanaejawata.
12 »Bajaraponë itsa naweretsiana, apojitsipae tsane itsajiwi-ata pimoxoyotsinexatsi. Pacuenia caballo pejunawinë jamatabëcuene-itsi, bajarajamatabëcuene-itsi tsane. Barënabenatsi itsamonae. Bajaraponë pijinia juya barënabena itsamonaejawabelia. Nexata, bajarapacuenia pewajënaeyabelia pemomoxi-ata cuenecatsitecaenatsi, pijamonaejawaberena pebarënabenexa. Bajarapacuenia siwanajamatabëxainae-atatsi tsane pijamonae, bajaraponë itsiata, acuenesaë tsabiabi tsane pecuene-amoneyabiyaniwatsi —jai ángelnë Agar-jawabelia.
13 Bajarapacuenia pebarëcuaicuaijaixaetsi Jehová pija-ángelnë, Agar bajaraponë wënërubiaya jumaitsi:
—Xamë cajena Diosomë tanetaenëmë —jai bajarapowa. Icatsia, bajarapowa jamatabëjumaitsi, «Dioso tae-atanë, abaxë itsiata, asaënë tsaponaponae», jamatabëcuenenabenajacaeya jai Agar. 14 Bajaraxuata, pameramëthë pitsaparuca itsajota bajarapowa taenutatsi, wënëruba pijinia, «Piasaëtsaponaponaenë, ponë wajanacataenë, pijameramëthë»,e pejaicuenia wënëruba, tsipaji bajarajota tsitanaitajëtatsi Agar. Bajarapamera pepitsapaemëthë eca Cades, Bered tomarabejetuatuajëjawata.