Dioso itoroba Abram penabo-upiperabëcaucubia-exanaenexa
17
Pacujinaeta Abram xaina noventa y nueve pawaibeje, bajarapaepatota Jehová icatsia tsitanaitajëtatsi. Jumaitsitsi mapacueniaje:—Xanë raja Diosonë daxitawecua tacuenesaënë. ¡Xamë ponaponare aneconijibia taitabarata! 2 Bajarapacuenia itsa exanaename, xanë najumeliwaisicajonenajë xamëjawabelia tacayawenonaenexa, nexainaponaenexa ayaibitsaëto nemomoxi newajënaeyabelia —jai Jehová Abram-jawabelia.
3 Nexata, bajarapaepatota Abram irataeya bocajunua yaiyataeya Dioso. Bajarapacuenia exana paepatota abaxë Dioso barëcuaicuaijai tsanucaetsi mapacueniaje:
4 —Maraxuaje najumecapanepaeya najumeliwaisicajonejitsianë xamëjawabelia: Xamëjawawerena pitsapaena nemomoxi itsanacuanëpijiwi penaexanaponaenexa. Apocaenacuapijiwinexa, itsanacuanëpijiwinexa-ata pitsapaena xamëjawawerena. 5 Nexata baja, aponewënë tsane Abram. Maweliacujinaeje newënë tsane Abraham,a tsipaji xanë tajamatabëcuene nemomoxi ayaibitsaëtoxaneto xainaename itsanacuanëpijiwinexa. 6 Capitsapaponaenajë nemomoxi pewajënaeyabelia ayaibitsaëto penaexanaponaenexa, peyacaëjëpaponaenexa daxitanacuanëjawa. Itsamonae nemomoxiyajuwënëwi nacua-ewetsiwi naexanaena. 7 Paliwaisi xanë najumeliwaisicajunuajë ajena xamëjawabelia, bajarapacuenia exanaenajë daxita nemomoxijawabelia-ata. Xanë raja nijaDiosonë tsane daxitamatacabijawabelianexa, icatsia newënamuto nemomoxi-ata pijaDiosonë tsane. 8 Xamë carajutsianatsi daxita Canaán nacua, panacuata ponaponame. Nexata, nemomoxi-ata rajutsianajë bajarapanacua pijanacuanexa, xamë nexi, nemomoxi-ata pexi bajarapanacua pecanacopataponaenexa newënamuto daxitamatacabijawabelianexa. Bajarapamonae xanë pijaDiosonë tsaponaponae tsane —jai Dioso.
9 Nexata, icatsia Dioso jumaitsi Abraham-jawabelia:
—Xamë nejumecowënëtsianame paliwaisi naliwaisicajonejitsianë xamëjawabelia, nexanaenexa xamë, daxita nijamonae, nemomoxi-ata yajawa.
10 »Maraxuaje paxamëjawabelia pacanajumeliwaisicajonejitsiatsi, bajaraxua padaxitamënexa. Bajaraxuata, toxanepanatsi daxita pebijiwi, paxamëjawata pejinawanapaewi, panenabo-upiperabëcaucubia-exanaenexa. Nexata, daxita nijamonae, nemomoxi-ata, bejumecowënëta bajarapaliwaisi. 11 Itsa nexata panabo-upiperabëcaucubia-exanaename padaxitamë, panajamatabëcuene-itajëtsianame panewitota caejamatabëcuene panexainaejawa paliwaisi pacanajumeliwaisicajunuatsi ajena. Bajaraxua raja nacato-itajëtsiana wajanajumeliwaisicajonejawa, pacuenia xanë patacato-exanaejawanexa, bajarapijinia pacuenia, paxamë-ata pataneto-exanaejawanexamë. 12 Nexata, bajaraxuata mapamatacabijawaweliacujinaeje, daxita pebinëxi pabo-upiperabëcaucutaponaename, itsa xainaena penaexanaecujinae ocho pamatacabibeje. Bajarapijinia pacuenia, pa-exanaename pamonae pejewaxinëxi naexanaponaena amoneya pecatonacuenebiwijawabelia, pamonae-ata panatocomuacaename itsanacuanëjawa bedajubicuenia, amoneya papecatonacuenebiwinexa. Bajarapamonaejawabelia-ata bajarapacuenia exanaename, apopanijamonaeyajuwënënë-ata. 13 Daxita bajarapamonae panebo-upiperabëcaucutaponaenexa peyasajinaeyaniwa itsajiwi-ata panijabonëjawata pejinawanapaewi daxitamatacabijawabelianexa. Nexata, bajarapacuenia payapëtaename itsa panabo-upiperabëcaucubia-exanaename, pepacuene xanëjawaberena patanenaliwaisicajonejawamë, xanë-ata patacanaliwaisicajonejawa daxitamatacabijawabelianexa, waja-exanabiabinexa namata-enetsia xua najumecapanepaeya najumaitsitsi. 14 Ponë baitsi jane aponabo-upiperabëcaucutsia-exanae tsane, nexata panawecuacapitsapaename, bajarapijinia pacuenia apotajajiwiyajuwënënëcueniab panetaenexa. Bajarapacuenia pa-exanaename, apotanejumeyaiyataexae xua paca-itorobatsi pane-exanaenexa —jai Dioso.
15 Icatsia, Dioso jumaitsi Abraham-jawabelia:
—Nijawa raja ajenaconoxaeta baja apoSarai tsane. Mapamatacabijawaweliacujinaeje bajarapowa pewënë tsane Sara.c 16 Bajarapowa pexaniacuenia yawenonaenaya cuenecaëjëpaeya-exanaenajë. Nexata, nacoxitsiana. Carajutsianatsi nexënatojiwiyo bajarapowajawabelia. ¡Xaniajanë cajena! Nexata, bajarapowajawawerena pitsapaponaena pemomoxi itsanacuanëpijiwinexa. Bajarapowajawata, pitsapaena tomaranë pewetsiwinexa —jai najumecapanepaeya Dioso Abraham-jawabelia pijawa Sara yabara.
17 Nexata, Abraham irataeya bocajunua yaiyataeya. Jëajëajai bëpënëa Dioso pejumaitsijawatatsi. Saya penajamatabëxainaejawata, bajaraponë jamatabëjumaitsi mapacueniaje: «¿Baja tsaeta cien pawaibeje pexainaenë caëjëpatsi pexi pexainaejawa?», jamatabëjai. Icatsia, jamatabëjumaitsi: «¿Baja tsaeta Sara perujuwayo, noventa pawaibeje pexainaewayo-ata, caëjëpatsi pexi pexainaejawa?», jamatabëjai Abraham jamatabëcuenejëajëajaiya. 18 Abraham nexata jumaitsi Diosojawabelia:
—Nexata, meta Ismael canacopatsiana tanenaliwaisicajonejawamë taneyawenonaeyapaebijawanexamë, itsa catsixanepana —jai Abraham.
19 Itsiata, Dioso jumecanawiata:
—¡Jume raja! Xanë xua yabara cajumaitsitsi, Sarajawata ponëyo xainaejitsiamë yabara jumaitsinë. Nexata, bajaraponëyo wënërubianame Isaac. Bajaraponë rajane baja canacopatsiana tacanaliwaisicajonejawa. Tsitecaeya canacopatsiana pewajënaeyabelia pemomoxijawabelia-ata daxitamatacabijawabelianexa —jai Dioso.
20 »Pacuenia nejumaitsimë Ismael yabara, cajumetanetsi. Bajaraponë-ata pexaniacuenia cuenecaëjëpaeya-exanaenajë pexainaponaenexa pexi ayaibitsaëto, orijibia pemomoxi-ata ayaibitsaëto. Nexata, bajarapamonae naexanaponaena pecunuanacuapijiwinexa. Bajaraponëjawawerena pitsapaenanua doce ponëbeje pexid pebijiwi. Bajarapamonae penamatacaitorobiwi tsane, pijamonae peyanacua-ewetsiwinexa. 21 Xua itsiata canaliwaisicajunuatsi tacarajutsinexa, canacopatsiana Isaac, ponëyo xainaename Sarajawabelia caewaicujinae —jai Dioso.
22 Itsa baja Dioso najumewereta pebarëcuaicuaijaijawatsi, Abraham wecuaponatsi. 23 Nexata, bajarapamatacabi Abraham pexënato Ismael bo-upiperabëcaucuta. Bajarapamatacabi pijinia, daxita pebijiwi bo-upiperabëcaucuba pijabota pejinawanapaewi-ata. Daxita penaweretsiwi, pewëjëawi petonacuenebiwitsi, pamonae natocomuaca bedajubicuenia amoneya petonacuenebiwinexatsi, bajarapamonae pexi-ata, bo-upiperabëcaucubia-exana. Daxita bajarapacuenia exana, pacuenia Dioso itorobatsi pexanaenexa. 24-26 Abraham bajarapacujinae xaina noventa y nueve pawaibeje. Pexënato Ismael pijinia xaina trece pawaibeje. Bajarapacujinaeta, nabo-upiperabëcaucutsia-exanabeje caematacabita. 27 Bajarapamatacabitanua, pebijiwi pejinawanapaewi pijabota, penatocomuatsiwi, pexi-ata, daxita bo-upiperabëcaucubia-exana.