Abraham siwaxainatsi ángelewi
18
Bajaraxuacujinae, icatsia itsamatacabi Abraham tsitanaitajëtatsi Jehová. Bajarapamatacabi, ponapona pematawonotoyo pitacaënaebëxëpanata. Mamre canacujitsita itsajota ponapona copiaya. Nexata, bejamatabëcuene matoneje-epatota, Abraham eca baupamuxuneneta pijacarpabo-itapajawata. 2 Nexata, Abraham nawëyota naëcotsiaya namutuabelia. Tane acueyabi ponëbeje penajetarubenaejawa pijaboyaberena. Itsa tane, nexata bajaraponë nonotapuna naxatsiayo pecopiapitsinexa. Bajarapaepatota, irataeya bocajunua yaiyataeya. 3 Yaiyataeya jumaitsi:—Tajatuxanenë, pexaniacuene cawajëtatsi taneto-exanaenexamë. ¡Caecuenia pëtsa abaxë paponame! 4 Itsa paxamë pacatsitaxanepana, itorobianajë mera papecatocapatsinexa panenataxuquiatsinexa. Xuacujinae, cae-epatoyo pa-enaename mapanaejawabëxëpanataje panenacuera-ewetsinexa. 5 Nexata, panepatsixae xanëjawata, itsajota ponaponajë bewelianënë, xanë bepanijajiwitonëcuenia paca-ewetsianatsi. Carenanënua tsane panexaejawanexa, jamatejema panesaëpatsinexa. Belia pajamatabëcuenefaefaenaejitsipame namuto paneponaejawa. Panexaecujinae, panacuera-ewetsianame. Bajaraxuacujinae, icatsia paponaename itsabelia panajetarubename —jai Abraham. Nexata, bajarapamonae jejai.
—Xanepana bitso —jai bajarapamonae.
6 Abraham cujinaelia pijabojawabelia. Joneya itsajota Sara nuca. Jumaitsi bajarapowajawabelia:
—¡Naxatsiayo! ¡Maxua pire veinte pakilobeje trigobenoje, nexanaenexa pan-bëanë! To-exanaename pan bajarapamonae pexaenexa —jai.
7 Bajaraxuacujinae, Abraham cujinaelia itsajota xainanuba pijabacabitsaëto. Bajaraponë nexata itapetsiaya waetaba pexaniabecerro pejananë. Bajaraponëyo rajuta pijajiwitonëjawabelia, petobeyaxuabinexatsi, petojayabinexatsinua bepijiayo pexaejawa. 8 Bajaraxuacujinae, daxita pesetsicujinae, to-eta pesiwaxainaewitsi bajarapasetsiwi, itsawiriapexaejawanë yajawa. Rajuta lecheramita pexanaematabë,a lechera yajawa piapaenexa. Nexata, Abraham, petsananucaenë, jamatabëcuenebarëyaya ewetanuca, petsanaponaenexa pexaejawa pexaeyenaejawata naejawabëxëpanata.
9 Itsa baja najaniwerene, pesiwaxainaewitsi Abraham yanijobatsi:
—¿Detsa jota eca nijawa? —jaitsi. Bajaraponë nexata jumaitsi:
—Xuayolia nuca carpabo-ënëalia —jai Abraham.
10 Nexata, bajarapamonaeyajuwënënë, itsanë jumaitsi:
—Ajenaconoxae pawai icatsia patsianajë patacasiwaxainaenexabeje. Bajarapacujinaeta Sara pexënato xainaena —jai itsanë.
Bajarapaepatota pijinia, Sara nuca pijacarpabo baupajawata Abraham pepënëwerena. Namuxuna-ewetanuca xua bajarapamonae naliwaisita.
11-12 Bajaraxua itsa jumetane bajarapowa, bëpënëa jamatabëcuenejëajëajai. Baitsi bajarapacujinaeta Abraham, Sarabeje bitso baja perujujiwiyobeje. Nexata baja, Sara najanacopata. Nexata, jamatabëjumaitsi bajarapowa: «¿Denexata pacuenia xanë nacoxitsipajë tanacoxibarëyataenexa, itsa baja bitso paperujujiwiyonëbeje?», jamatabëjai tsanucae bajarapowa, tsipaji baja natanebeje perujujiwiyobejecuene. 13 Itsiata, Jehová jumaitsi Abraham-jawabelia:
—¿Detsa xuajitsia Sara jëajëajai bajaraxua yabara? ¿Nejume-aeba tsaja bajarapowa pexainaejawanexa pexënatojiwiyo, perujuwa-ata? 14 Xamë yapëtaneme ajibi itsacuenejawa Jehová petsita-ayapëbejejawatsi pexanaejawanexa —nayabarajai pijacuata. Icatsia, mataropotsia jumaitsi:
—Xaniajanë cajena pacuenia cajumaitsitsi. Pamatacabijawa pacatocaëjëtatsi, icatsia patsianajë. Nexata, bajarapacujinae baja, Sara xainaena pexënatonëyo —jai Jehová Abraham-jawabelia.
15 Bajaraxua Sara pejumetaejawata, bitso junawa. Jamatabënayawajunuaxaina picani. Bajaraxuata, Sara jumaitsi:
—Xanë apojëajëajanë tsanucae —jai.
Itsiata pijinia, Jehová jumecanawiatatsi. Jumaitsi:
—Xamë cajena cayapëtanetsi nejëajëajaijawa —jai.
Abraham towajëca Diosojawabelia Sodoma tomara nacuapijiwi
16 Bajaraxuacujinae baja, Abraham pesiwaxainaewitsi nonobapuna, peponaenexa icatsia Sodoma tomarabelia. Abraham napënalia yanabiaya bajarapamonae, penapëjiobinexatsi. 17 Nexata, Jehová jamatabëjumaitsi Abraham yabara: «Apoxanepanae baja tawecuamatayatsijawa Abraham xua exanaejitsianë. 18 Aponetsixanepanae bajaraxuayolia, tsipaji tajumaitsicowëya bajaraponëjawawerena pitsapaponaena ayaibitsaëto pemomoxi, pinijinacuapijiwinexa. Najumecapanepaeya pexaniacuenia yawenonaeyapaebajë daxitanacuanëpijiwib bajaraponë pejamatabëcuene. 19 Bajaraponë itapetajënua pexi, pijamonae-ata, juya pecujarubinexa, tanejumecowënëtsinexa paliwaisi xanë tonajumecopatajë, pexanabiabinexa xua ëpexaniacuene. Itsa nejumecowënëtabiabiana tanajumecopatsiliwaisi, to-exanabiabianajë pexijawabelia, pemomoxijawabelia-ata daxita tajumaitsicowëya najumecapanepaeya bajaraponëjawabelia», jamatabëjai Jehová Abraham yabara. 20 Bajarapacuenia Jehová pesiwanajamatabëxainaexae, nexata jumaitsi Abraham-jawabelia:
—Pamonae Sodoma tomarapijiwi, Gomorra tomarapijiwibeje bajayajebi wënëliwaisitaniji piacuenebejecuene. Papibisiacuenec bitso exanawanapa, abeje. 21 Nexata, ajenaconoxaeta ponaenajë bajarabereca, tayapëtaenexa itsa xaniajai pibisiacuene exanawanapa, pacuenia itsamonae jumaitsi tsaponae. Nexata, bajarapacuenia yapëtaenajë xaniawaetsia —jai Jehová Abraham-jawabelia.
22 Nexata, bajarajota anijanëbeje bajarapamonae penajuaponaewi wecuaponatsi Sodoma tomara nacuayabereca. Itsiata, Abraham epatua yajawanacopatanuca Jehová. 23 Nexata, Abraham imoxoyota bajaraPonë. Yanijobijitsia Jehovájawabelia:
—¿Yajawawerebiabianame tsaja pianeconijibiwi, penajuajinawanapaexae pibisiacuene pexanaewi? 24 Itsiata raeta, jinawanapaejitsipa cincuenta ponëbeje pexaniacuene pexanaewi bajarapatomarajawata, ¿detsa itsimë tsane bajarapamonaejawabelia? ¿Nexata, itsiata yajawawerebiabianame? ¿Apo-itaxutotsoniataemë tsane daxita bajarapatomarapijiwi bajarapacincuenta ponëbeje pejamatabëcuene? 25 Apocatoxanepanae tsipae neyajawabenexa pexaniacuene pexanaewi pibisiajamatabëcuenewi pejamatabëcueneta, bepibisiacuene penajua-exanaejawa. ¡Pëtsa exaname bajarapacuene! ¡Cato-acuenebi! Xamë baja daxita mapanacuapijiwi netoyapëtaenë pijaneconije, nenaneconitsia-exanaenexa pijaneconi pexainaewi. ¿Pexaniacuene tsaja apoto-exanaemë itsiata tsipae, pexaniacuene yapijiwinexanabiabinëxae? —jai Abraham Jehovájawabelia.
26 Nexata, Jehová jumecanawiata:
—Itsa namataëxënaenajë cincuenta ponëbeje pexaniacuene pexanawanapaewi Sodomajawata, itsiata nexata, itaxutotsoniataenajë daxita bajarapatomarapijiwi. Apowerebiabinë tsane bajarapacincuenta pajiwibeje pejamatabëcueneta —jai Jehová.
27 Icatsia, Abraham jumaitsi Jehovájawabelia:
—Xanë picani ajume-uranë bajarapacuenia tacayanijobaponaenexa, tsipaji xamë Tajatuxanenëmë, Diosonëmë. Xanë saya jiwitonënë. Xamëwecua bitso beweliajamatabëcuenenënë, tsipaji atsatonënë. Itsiata, pexaniacuene neto-exanaename, tacayanijobinexa. 28 Belia meta, sajinaejitsipa cinco pajiwiyobeje pianeconijibiwi, cincuenta pajiwibeje pecaxitajarabinexa. Bajarapacinco ponëbeje pesajinaexae tsane, ¿tsitecaeya werebiabianame daxita tomarapijiwi? —jai Abraham.
Itsiata, Jehová jumecanawiata:
—Itsa namataëxënaenajë cuarenta y cinco pajiwibeje pexaniacuene pexanawanapaewi, apowerebiabinë tsipae —jai Jehová.
29 —¿Jica meta itsa namataëxënaejitsipame cuarenta pajiwibeje saya pexaniacuene pexanawanapaewi? —jai icatsia Abraham.
—Bajarapacuarenta pajiwibeje pejamatabëcueneta itsiata apowerebiabinë tsipae —jai Jehová.
30 Icatsia, Abraham orijibia jumaitsi tsaponae:
—Cajamatabë-itonotatsi. ¡Pëtsa anaepaname xanëjawaberena, tacayanijobaponaexae bitso caejawalia! ¿Jica, itsa namataëxënaejitsipame treinta pajiwibeje? —jai Abraham.
Icatsia, Jehová jumaitsi:
—Bajarapatreinta pajiwibeje pejamatabëcueneta itaxutotsoniataenajë bajarapatomarapijiwi —jai Jehová.
31 Abraham orijibia jumaitsi tsaponae Jehovájawabelia:
—Tajatuxanenë, itsiata icatsia, cabarëcuaicuaijaijitsiatsi mapacueniaje: ¿De-itsimë tsipae itsa xamë namataëxënaejitsipame saya veinte pajiwibeje pexaniacuene pexanawanapaewi? —jai Abraham.
Itsiata, icatsia jumaitsi Jehová:
—Bajarapaveinte pajiwibeje pejamatabëcueneta apowerebiabinë tsipae bajarapatomarapijiwi —jaitsi.
32 Icatsia, orijibia Abraham jumaitsi:
—Pexaniacuene neto-exanaename, xamë Tajatuxanenëmë. ¡Pëtsa anaepaname xanëjawaberena, tacajumaitsitsaponaexae! Mapajumeyocujinaeje bajaraxuacujinae, apocajumaitsi tsanetsi baja. ¿De-itsimë tsipae itsa namataëxënaejitsipame diez pajiwibeje? —jai Abraham.
Jehová jumaitsi:
—Bajarapadiez pajiwibeje pejamatabëcueneta apowerebiabinë tsipae daxita bajarapatomarapijiwi —jai Jehová.
33 Itsa baja Jehová najumewereta bajaraxua pecuaicuaijaijawabeje Abraham-beje, wecuaponatsi baja. Abraham pijinia nawiata pijacarpabojawabetsia.