Dioso werebiaba Sodoma, Gomorra tomarapijiwibeje
19
Nexata baja, ajena merawi tsaponaejitsia, anija-ángel-nëbeje pata Sodomajawata, itsajota Lot ponapona. Bajarapatomarami xaina matatoyorotsia penayacaranatenaejawa.a Nexata, xaina caebaupa pejoneyabiabinexa tomarajawabelia, pepatsinexa pijabonëjawa. Nexata, bajarapaepatota Lot eca bajarapabaupa-itapata. Nexata, Lot itsa tane bajaraponëbeje penajetarucaejawa, nonotapuna pecopiapitsinexa. Bajaraponë irataeya pematabacabëta nucajunua bajaraponëbeje pitabarata penacopiapitsicuenia.2 Jumaitsi Lot:
—Pexaniacuene paneto-exanaenamebeje. Ajena pamerawi papatsianamebeje tajabojawabelia. Bajarajotalia, panataxuquiatsianamebeje, jamatejema icatsia merawia bajayacunua paneponaenexabeje —jai Lot bajaraponëbejejawabelia.
Bajaraponëbeje jumaitsitsi picani:
—¡Jume! Xanepana bitso. Itsiata, callejawa payananianaenajëbeje —jai ángel-nëbeje.
3 Itsiata baitsi jane, Lot orijibia napëna jumaitsi tsaponae bajaraponëbejejawabelia. Xuacujinae baja, belia jumejejaitsi peponaenexabeje Lot pijaboyabelia, bajarajota penamajitsinexabeje. Itsa palia Lot pijabojawabelia, tonacueneba bitso pexaniapexaejawa, caniwiyopijipexaejawa, levadurata apopematajërëabipan yajawa. Nexata, bajarapamonae naxane.
4 Lot, pijabopijiwi yajawa, itsa abaxë naëcotawanapa majitsinejewa, bajarapaepatota Sodomapijipebijiwi, daxita pewëjëawi, perujujiwi-ata, matatoyorotsia jinawanapa Lot pijabo pënëwerena. 5 Bajarapamonae wawajaiya jumaitsi tsawanapae Lot-jawabelia:
—¿Detsa jota ecabeje, ponëbeje xamë nijaboyabelia capatame? ¡Panetojure, tsipaji pajitsipajë pibisiacuene pata-exanaenexa patawitota bajaraponëbejejawabelia! —jai bajarapamonae pewawajaitsawanapaejawata.
6 Lot nexata pitsapalia pebarëcuaicuaijainexa bajarapamonae, baupaxatatsiaya pepënëyabelia xaniawaetsia. 7 Jumaitsi nexata:
—Pexaniacuene tajamonae paneto-exanaename. ¡Pëtsa bitso bajarapapibisiacuene panajamatabëxainame pane-exanaenexa! 8 Itsa pajitsipame pibisiacuene pane-exanaejawa panewitota, xanë xainajë anijawabeje taxënatoyobeje, abaxë itsapebi-ata apopeperabëyapëtaewabeje. Pacatojutsianatsi bajarapowabeje. Nexata, xua jamatabëpa-exaname, pa-exanaename bajarapowabejejawabelia. Jane caejawa apopacatojitsipaetsi pibisiacuene pane-exanaejawa panewitota maponëbejejawabeliaje, tsipaji xanë junatajë maponëbeje tajaboyaberena pepatsinexa. Bajaraxuata, xanë ewetajë bajaraponëbeje pane-itsacueniabiyaniwa —jai.
9 Itsiata, bajarapamonae jumaitsi mapacueniaje:
—¡Natixire! ¡Belia nucareje! Xamë saya nenapatsinë itsanacuawerena. ¿Detsa pacuenia xamë naexaname patanenamatacaitorobinënexamë, bajarapacuenia patanenaneconitsia-exanaenexamë? Nexata, ajenaconoxaeta xamë paca-itsacueniabianatsi, bitso picani papibisiacuene jamatabëpa-exanajë bajaraponëbejejawabelia matatoxenetsia —jai bajarapamonae Lot-jawabelia.
Nexata, bitso bajarapaepatota, Lot torobajarabatsi ayaicuenia. Jamatabëtorenabatsi picani baupajawata, jamatejema baupa pesarabiaxuabinexa, bajarapamonae pejonenexa bo-ënëabelia. 10 Itsiata baitsi jane, pesiwaxainaenëbeje namaxëyoliabeje perobotsinexalia Lot bo-ënëabelia. Bajaraxuacujinae baja, baupa xatata xaniawaetsia. 11 Daxita pamonae nubena baupapënëwerena wayafota, nexata itaxutotsëcënaeya-exanatsi, daxita pewëjëawi, penaweretsiwi-ata. Bajarapacuenia exanae-atatsi, bajarapamonae itsiata apocopatsi pebaupajaitsijawa. Belia baja, cuerana baupa pejaitsijawa. 12-13 Nexata, pesiwaxainaenëtsibeje Lot jumaitsitsi:
—¿Xainame tsaja itsamonae nijamonae mapabota pejinawanapaewiwecuaje? Nexata, itsa xainame niopaxajiwi, nexënatonëxi, nexënatowaxi, xua daxita xainame mapatomarata, jutsianame baja daxita, nebarëponaenexa tajë majotawecuaje, tsipaji paxanëbeje bajarapatomara pawerebiabijitsianëbeje. Bajayajebi bitso Jehová wënëliwaisitaeyabiaba pibisiacuene pexanabiabijawa bajarapamonae. Bajaraxuata, Jehová pane-itorobabeje, patawerebiabinexabeje bajarapatomarapijiwi —jaibeje.
14 Nexata, picani Lot siwalia piopaxabeje, ponëbeje picani coxipitsijitsiatsibeje. Bajaraponë jumaitsi:
—¡Naxatsia! ¡Panonotapunarebeje! ¡Panaponarebeje baja mapatomarawecuaje, tsipaji raja Jehová werebiabiapaeba mapatomaraje! —jai. Itsiata, bajaraponëbeje apojumexaniataebeje Lot, penapënaponaejawanexabeje. 15 Itsa baja matacabiwëpa tsanajetarucae, ángel-nëbeje jumaitsi Lot-jawabelia:
—¡Naxatsia! Pa-enaejitsipame. ¡Paponare baja bepijia, itsa apopajitsipaemë mapanacuapijiwije yajawa patacanaxuabia-exanaejawabeje! ¡Nexata, comacapire nijawa, nexënatoyobeje yajawa mapatomarawecuaje paneponaenexa! —jai ángel-nëbeje.
16 Lot picani abaxë najamatabëjematapona. Nexata, ángel-nëbeje cobepitatsibeje pebarëponaenexa bajaraponë, tsipaji Jehová bitso itaxutotsoniatane Lot. Comacapitatsi pijawa, pexënatoyobeje yajawa. Capitsapatsi nexata bajarapatomarawecua, pepanepaenexa piayaicuenewecua. 17 Itsa baja wecuanubena tajëyo bajarapatomarawecua, itsanë ángelnë jumaitsi:
—¡Naxatsiayo! ¡Pabitsojinare petsutonëjawabelia panewecuapanepaenexa! ¡Pëtsa panecowëyabelia panapijiwinaëcotame! ¡Pëtsa panacopatame mapatusatojawataje, tsipaji raja daxita mapatusatojawata pe-enaetomaranëje, payajawawerebiabijitsianëbeje! Itsa pajitsipame panepanepaejawa bajarapapiayaicuenewecua, panewajënaeyabelia panajetarubenaename petsutonëjawabelia —jai ángelnë Lot-jawabelia.
18 Itsiata baitsi jane, Lot jumaitsi:
—¡Jume raja! Tajamonaenëbeje, orijibia itsa pexaniacuene paneto-exanaename. 19 Paxamëbeje pexaniacuene bitso paneto-exaname. Panepitsapaeya-exanamebeje, patanecapanepaenexamë pexaniacuenia. Itsiata, aponecuenecaëjëpae tsane petsutonëjawabelia taponaenexa, tsipaji belia bajarapaweriajawijawa netajuejitsipa, itsa nepëcaxina epatua. Nexata tëpaejitsipajë. 20 Itsiata, mapatomarawecuaje imoxoyo eca itsatsiquiritomarayo. Bajarajane belia ponaenajë. ¡Bajarabelia netocopare taponaenexa, tapanepaenexa bajarapapiayaicuenewecua! —jai Lot.
21 Nexata, itsa-ángeleyajuwënënë jumaitsi:
—Je, cajumetanetsi rabaja tacajumebejiobiataenexa. Pacuenia panewajëtamebeje, pacato-exanaenatsi. Nexata, bajarapatomarayo apopawerebiabinëbeje tsane. 22 ¡Nexata, ponare bepijiayo bajarabelia panepanepaenexa, tsipaji paepatota abaxë, itsa apopapatsimë tsane bajarapatomarayojawabelia, aponecuenecaëjëpae tsane abaxë itsacuenejawa ta-exanaejawa! Matapania, itsa patsiaremelia tsiquiritomarayojawabelia werebiabianajë daxita tomaranë, mapatusatojawata pe-enaetomaranëje. —jai ángelnë.
Tsiquiritomarayo pejaixae Lot, nexata itsamonae wënëruba Zoar,b perujuwënë pijinia Bela tomarayo. 23-24 Itsa baja bajayacunua ayaimatacabi tsina, Lot-ata baja pepuapatsi Zoar-jawata, nexata Jehová be-emacuenia runaeya-exana ayaicotiajawanë, azufrewënëjawac yajawa Sodoma tomarajawatsica, Gomorra tomarajawatsica-ata, daxita imoxoyo pe-enaetomaraxijawa-ata. 25 Jehová nexata werebiaba daxita bajarapatomarapijiwi. Daxitaxua bajarajota pejuwijawanë yajawa werebiaba. 26 Lot pijinia pijawami, cotocaewi penajetarucaejawata, namuto-epatua napijiwitaejopa pecowëyabelia. Nexata, naexanajopa yajo-iboto bajarapowami.
27 Itsamatacabijawabelia, bajayacunua, pebarëcuaicuaijaicujinae Jehová, Abraham pona itsajotareca barëcuaicuaijaitsi tsanucae Jehová Sodoma, Gomorra tomarabeje peliwaisi yabara. 28 Naëcoreca Sodoma, Gomorra tomarabejejawabereca daxitanacuatusato naëcotsiaya. Nexata, tane daxita bajarapatomaranëmi petsëxëxanetonëtsenaejawa. Bitso acotiayai tsenae. Pacuenia waita batajua, bajara-itsi. 29 Nexata, bajarapacuenia Dioso werebiaba bajarapatomaranëmi itsajota picani Lot naponapona. Itsiata, Abraham penajamatabënapitsixaetsid Jehová, Lot jutatsi bajarapatomarawecua pewerebiabiwajënaeya.
Itsawerena pitsapa moabitawi, amonitawi-ata, yabara peliwaisi
30 Bajaraxuacujinae nexata, Lot bitso junawa penacopatsijawa Zoar tomarayojawata, bajarapapiayaicuene petaecujinae. Nexata, barëpona pexënatoyobeje petsutonacuayabelia. Barëponapona pexënatoyobeje petsutoyenepana ibowajujawata. 31 Nexata, itsamatacabi pexënatoyo matapijiwa jumaitsi pejuyapijiwajawabelia:
—Waxabeje rabaja perujunëyo tsaponae. Apoxainaetsibeje itsajota nanacojiobijitsiatsibeje itsanëjawabelia, pacuenia wajamonaemi ba-itsi tsaponae. 32 Nexata, exanaenatsibeje mapacueniaje. Itajibiaxuabianatsibeje waxa wajabarëmajitsinexabeje, bajarapacuenia wajaxi wajaxainaenexabeje. Nexata, wajawiriamaëto apocopiarucae tsane —jai matapijiwa.
33 Nexata, bajarapamerawi bajarapowabeje rajutabeje paxa piatanevinorae pitajibiaxuabinexa. Matapijiwa nexata nabarëmajitsia-exana paxa. Itsiata baitsi jane, paxa apoyapëtae paepatota bajarapowa naquenetsiataeya-exana, paepatota-ata pijinia wecuanonotapunatsi. 34 Itsamatacabijawabelia matapijiwa tsipaeba pejuyapijiwajawabelia. Jumaitsi:
—Xanë raja ajena pamerawi yajawamajitajë waxa. Bajara-icatsia pacuenia ajena pamerawi itsi tsanetsibeje. Itajibiaxuabianatsibeje. Nexata juya, bajarapacuenia xamë na-naquenetsiataeya-exanaename. Bajarapacuenia xainaenatsibeje wajaxibeje, wajawiriawi pecopiarucaeyaniwa —jai pejuyapijiwajawabelia.
35 Icatsia nexata, bajarapamerawi rajutabeje paxa piatanevinora pitajibiaxuabinexa. Juyapijiwa paxa nabarëmajitsia-exana. Bajarapacuenia Lot apoyapëtae pacuenia naquenetsiataeya-exana, pacuenia-ata wecuanonotapuna. 36 Nexata, bajarapacuenia bajarapowabeje nacoxitabeje paxa pejamatabëcuene. 37 Matapijiwa xaina pexënato. Bajarapowa wënëruba pexënatonëyo Moab.f Bajaraponëjawawerena nexata pitsapa moabitawiriawi. 38 Bajarapacuenia juyapijiwa-ata xaina pexënatonëyo. Bajarapowa wënëruba pexënatonëyo Ben-ammi.g Bajaraponëjawawerena pijinia pitsapa amonitawiriawi.