Abraham, Abimelec-beje, yabara peliwaisi
20
Abraham pewarapaenëcuenia wecuapitsapa copiayami penaponaponaenacuawecua, peponaenexa Neguev nacuayabelia, bajarajotalia cae-epatoyo peponaponaenexa Gerar tomarajawata. Bajarapatomara eca Cades, Shur tomarabejetuatuajëjawata. 2 Bajarajota peponaponaejawata, itsamatacabi Abraham nayapijiwijumaitsi pijawa yabara bajarapanacuapijiwijawabelia:—Sara raja tajuyapijiwa —jai.
Bajarapacuenia Abimeleca itsa jumetane, pewetsinë Gerar nacua, itoroba pijajiwi petobarëpatsinexatsi Sara bajaraponëjawaberena, pijawacuenia pexainaenexa picani. 3 Jane baitsi, bajarapamerawi Abimelec amajitsinae tsanucae. Dioso jumaitsi majitsinaebota bajaraponëjawabelia:
—Tëpaename raja, tsipaji powa xamë pitame penacojiobiwa —jaitsi.
4 Itsiata baitsi jane, bajaraponë abaxë apo-imoxoyotsi.b Nexata jumecanawiata:
—Tajatuxanenë, ¿itsiata tsaja pibisiacuene apopexanaenë-ata cacaëjëpa nebeyaxuabijawa?, jai Abimelec—. 5 Abraham pijacuata nejumaitsi: «Bajarapowa raja tajuyapijiwa», nejai. Bajarapowa-ata pijacuata nejumaitsi: «Tamatapijinë raja Abraham», nejai. Nexata, xanë bajarapacuenia exanajë apopibisiajamatabëcuenecuenia. Itsiata, abaxë itsacuene apo-exanaenë bajarapowajawabelia. Bajaraxuata, aneconijibinë —jai Abimelec Diosojawabelia piamajitsinaejawata.
6 Nexata, Dioso jumecanawiatatsi majitsinaebota:
—Xaniajamë. Yapëtaniji xaniawaetsia bajaraxua ne-exanaejawa pexaniajamatabëcueneta. Bajaraxuata raja, apocatocopatsitsi bajarapowa nimoxoyotsinexa, pibisiacuene bitso nexanaeyaniwa xanëjawaberena. 7 ¡Nexata, ajenaconoxaeta tocanawiare pijawa bajaraponëjawabelia! Bajaraponë tanejumeliwaisipaebaponaponaenëxae, catowajëcaena xanëjawaberena, netëpaejawaminexa newecuapanepaenexa. Itsiata baitsi jane, itsa apotocanawiatsimë tsane, xamë, nijamonae-ata yajawa tëpaename pepacuene —jai Dioso majitsinaebota Abimelec-jawabelia.
8 Nexata, itsamatacabi, bajayacunua, itsa baja Abimelec namatacota, junata daxita pijajiwi petsipaebinexa xua bajaraponë amajitsinae tsanucae. Nexata, bajarapamonae itsa jumetane bajarapacuenia petsipaebijawatatsi, bitso junawa ayaicuenia. 9 Bajaraxuacujinae nexata, Abimelec junata Abraham peyanijobinexa. Nexata jumaitsi:
—¡Nejumetaema! Xuanë panetocopiapata, bajaraxuanë xamë nejamatabëcuene, taneyamaxë-itojorobixaemë nijawa yabara. ¿Detsa nexata pitsijamatabëcuene cato-exanatsi tacajamatabëcuenebijianaenexa, mapapinijineconije tanecatocopiapatsi xanëjawaberena, tajajiwijawabelia-ata? Pacuene picani jiwi penayaiyataewi apobe-exanae, bajaraxua xamë neto-exaname —jai Abimelec Abraham-jawabelia. 10 Icatsia, jumaitsi:
—¿Detsa pitsijamatabëcuene nesiwanajamatabëxainame tacaneto-exanaemë bajarapacuene? —jai Abimelec pecuaicuaijaijawata Abraham-jawabelia.
11 Abraham juya jumecanawiata:
—Xanë jamatabë-itsinë mapacueniaje: «Mapanacuataje apojinawanapae Dioso peyaiyataewi. Nexata, nebeyaxuabiana tajawa pejamatabëcuene», jamatabëjanë. 12 Itsiata baitsi jane, pepacuene xaniajanë. Xanë tajuyapijiwa, tsipaji taxa pexënatoyo. Itsiata baitsi jane, apopanacae-enapijiwinëbeje. Bajarapowa pijinia itsa-enapijiwa. Bajaraxuata, pitajë bajarapowa tajawanexa. 13 Pacujinaeta Dioso netocopata tapitsapaenexa taxa pijabowecua, jumaitsinë bajarapowajawabelia: «Panacuata ajena patabiabianatsibeje, ‘tamatapijinë raja,’ jamë tsabiabi tsane», janë —jai Abraham Abimelec-jawabelia.
14 Nexata, Abimelec tocanawiata Abraham pijawa Sara. Bajarapamatacabi rajutatsinua najamatabëcuenematamotsiaya pijaneconimi, ovejamonae, vacamonae, jiwi amoneya petonacuenebiwinexatsi-ata, pebinëxi, petiriwaxi yajawa. 15 Bajarapaepatota, jumaitsi Abimelec Abraham-jawabelia:
—Mapa-ira, xanë ta-ewetsinacuaje, nawitsia xaina pexaniatusatoxi. Nexata, itapetsianame, nepitsinexa panacuayo catsitaxanepana neponaponaenexa —jai Abimelec Abraham-jawabelia.
16 Sarajawabelia icatsia jumaitsi:
—Xanë rajutajë nematapijinë mil ponëbeje palatanëanë, bajaraxua pejamatabëcuene xaniawaetsia aneconijibia pecataenexa nebarëponaponaewi, itsamonae-ata, daxita mapanacuapijiwi-ata, pecabaracuaicuaijaiyaniwa itsajiwi-ata, xanëjawawelia nepitsapaecujinae —jai bajarapowajawabelia.
17-18 Pacuenia Dioso jumaitsic Abimelec-jawabelia majitsinaebota, bajarapacuenia Abraham towajëta Diosojawabelia Abimelec yabara, pijawa yabara, amoneya petonacuenebiwaxitsi-ata yabara, bajarapapetiriawi icatsia pexi pexainaenexa. Abimelec picani pepitsixae Sara, Jehová acoxibia-exana daxita bajarapamonae pexi pexainaeyaniwa, daxita pejinawanapaepetiriawi Abimelec pijabota. Abraham petowajëtsicujinae, nexata Dioso to-exana pexaniajamatabëcuene Abimelec-jawabelia, pijawajawabelia-ata. Tocopata pijawa pexi pexainaenexa icatsia. Bajarapijinia pacuenia, amoneya petonacuenebiwaxitsi tocopata pexi pexainaenexa.