Isaac-nëyo penaexanaejawa, yabara peliwaisi
21
Pacuenia najumecapanepaeya jumaitsi Jehová peyawenonaenexa Sara, bajarapacuenia jane baja tocopiapatatsi. 2 Bajarapajumecowëya Sara baja nacoxita. Toxaina Abraham pexënatonëyo pawaita Dioso tocaëjëta penaexanaenexa. Bajarapacujinaeta baja, Abraham bitso perujunëyo. 3 Ponëyo wecuanaexanatsi Sara, Abraham wënëruba Isaac.a 4 Bajaraponëyo baja, itsa xaina ocho pamatacabibeje penaexanaecujinae, nexata Abraham bo-upiperabëcaucuteta, pacuenia Dioso itorobatsi pexanaenexa. 5 Abraham baja itsa xaina cien pawaibeje, naexana Isaac-nëyo.6 Nexata, Sara jamatabëjumaitsi: «Dioso bitso nebarëyaya-exana. Daxita pamonae newënëtaeponaena xanë taxainaejawa taxënatonëyo, bajarapamonae nesiwajamatabëcuenebarëya tsane xanëjawaberena. 7 Itsamonae picani aponesiwajamatabëjumaitsi-ata taxainaejawanexa taxënatonëyo, itsiata baja, toxainajë Abraham pexënatonëyo pepuaperujunë bajaraponë», nasiwajamatabëjai Sara barëyaya.
Agar, Ismael-beje, capitsapatsi Abraham pijabowecua
8 Itsa abaxë Isaac pejewaxinëyo, Sara baja namicopata. Abraham nexata pexënato to-exana fiestaxaneto pacujinae namicopatatsi pena. 9 Itsiata baitsi jane, bajarapaepatota Sara tane Agar pexënato, Egipto nacuapijiwa, ponë xaina Abraham-jawabelia, petocapo̱capo̱naejawatsi Isaac-nëyo. 10 Nexata, Sara jumaitsi Abraham-jawabelia:
—Ponae baja mapowaje, pexënato yajawa. Acuenebi itsamatacabi Isaac-beje penatsicobetsanaejawabeje necobecowëyajuwënëjawanë newënamuto bajarapowa pexënatojawabelia —jai Sara.
11 Nexata, Abraham bitso najamatabëxaina ayaicuenia, tsipaji bajaraponë-ata Abraham pexënato. 12 Itsiata, Dioso jumaitsi:
—¡Pëtsa siwajamatabëcuenebëjamë nexënato Ismael, nijawa amoneya pecatonacuenebiwa-ata yabara! ¡Exanare pacuenia Sara cajumaitsi, tsipaji raja pamonae nemomoxinexa najumecapanepaeya catsipaebatsi tacarajutsinexa, bajarapamonae pitsapaponaena Isaac-nëyo pejamatabëcuene! 13 Bajarapijinia pacuenia, exanaenajë ponë xainame amoneya pecatonacuenebiwajawabelia. Bajaraponë-ata yawenonaenajë ayaibitsaëto penaexanaponaenexa pemomoxi, nexënatoxae —jai Dioso.
14 Itsamatacabijawabelia bajayacunua Abraham rajuta Agar-jawabelia pan-bëanë, meradoro yajawa.b Bajaraxuanë tsiwëtacararuta. Tocopatanua pebarëponaenexa pexënato Ismael.c Nexata napëjiobatsi. Bajaraxuacujinae, bajarapowa baja wecuaponatsi, apoyapëtaenejewa itsabelia patsijitsia. Najetaruca Beersebawënëtusatojawa, petsewinacuajawa bitso. 15 Belia baja, towerewerecatsibeje namuto-epatua pijameradoro. Nexata, bajarapowa pueneteta pexënatonëyo naejawayobëxëpanata. 16 Bajarapowa ecajopa bajaraponëwecua tajëyo, tsipaji jamatabëjumaitsi: «Apojitsipaenë petëpaejawa taitabarata», jamatabëjai. Itsa bajarapowa tajëyotareca ecajopa, nexata bajaraponë pewëjëato taxuxuaba ayaicuenia penuejawa.
17 Dioso jumetane pewëjëato bitso penuejawa. Nexata, athëbëjawawetsica Jehová pija-ángelnë junataxuaba Agar-jawabelia. Jumaitsi:
—¿De-itsimë Agar? ¡Pëtsa junawame, tsipaji Dioso jumetane bitso penuejawa nexënato pewëjëato itsajotalia puenetetame! 18 ¡Naxatsia! ¡Pire nexënato! ¡Jamatabëcuenebarëyaya-exanare, tsipaji xanë yawenonaenajë bitso ayaibitsaëto pepitsapaponaenexa bajaraponëjawawerena pemomoxi! —jai Jehová pija-ángelnë.
19 Nexata, bajarajota Dioso taeya-exanatsi Agar mera pepitsaparucaejawa tajëyotalia mëthëjawawerena. Bajarapowa nexata pona bajarapameramëthëabelia, icatsia pewënëtsinexa pijadoro. Apaeya-exananua pexënato Ismael. 20-21 Bajaraxuacujinae, pona Parán nacuayabelia bajarajota peponaponaenexa. Dioso yawenona ayaicuenia Ismael. Belia baja, penaweretsinë tsaponae Parán-tusatonacuata. Nexata, bajarajota naexana pexaniabixabajarabinëyo bitsabi. Bajaraxuacujinae, pena tojaitatsi pijawanexa Ismael, Egipto nacuapijiwa pepitsinexa.
Abraham, Abimelec-beje, penajumeliwaisicajonejawabeje
22 Bajarapamatacabijawa Abimelec pona Abraham-jawabelia, pebarëcuaicuaijainexa itsajotalia bajaraponë ponapona. Bajarapacujinae, yanabatsi Ficol-wënënë, penamatacaitorobinë Abimelec pijawajabitsaëwi. Abimelec nexata jumaitsi Abraham-jawabelia:
—Paxanë pataeyabiabajë xamë Dioso pecayawenonaejawa daxita nexanaejawalia. 23 ¡Bajaraxuata, najumecapanepaeya nejumaitsimëre Dioso pewënëta majotaje! ¡Nejumaitsimëre apotaneto-exanaejawanexamë pibisiacuene xanëjawaberena, taxijawabelia-ata, tamomoxijawabelia-ata, patanetaeyabiabinexamë pexaniajamatabëcuenia! Pacuenia xanë casiwajamatabëcuenexanepanatsi, bajarapacuenia nesiwajamatabëxanepanaenexa, itsamonae-ata tayanacua-ewetsiwi —jai Abimelec.
24 Nexata, Abraham jumecanawiata:
—Xaniajanë, cato-exanaenatsi pacuenia jitsipame —jai Abraham Abimelec-jawabelia najumeliwaisicajoneya.
25 Bajarapaepatota, Abraham yanijoba Abimelec-jawabelia pijameramëthë yabara, tsipaji Abimelec pijajiwi naxainaeyaba Abraham pijameramëthëmi.
26 Nexata, bajaraxua yabara Abimelec jumaitsi:
—Aeconoxaeta matapania yapëtaniji bajaraxua yabara. Xamë-ata aponejumaitsimë pewajënaeya. Nexata, apoyapëtaenë pajiwi bajaraxua exana —jai Abimelec.
27 Nexata, Abraham pita ovejanëanë, vaca-ata perajutsinexa Abimelec-jawabelia. Bajaraxuacujinae, pijacujirucuenia naliwaisicajunuabeje penasiwajamatabëcuenexanepanaenexabeje. 28 Bajaraxuacujinae, Abraham tsata siete ponëbeje oveja pesorowatoxi pija-ovejayajuwënëwiwecua, saicaya penubinexa.
29 Petaexae bajarapacuenia, Abimelec yanijoba:
—¿Detsa xua yabara tsatame siete pa-ovejabeje? —jai.
30 Abraham jumecanawiata:
—Bajarapasiete ponëbeje oveja xanë carajutatsi nepitsinexa, jamatejema nenayapëtaenexa, nijamonae yajawa, xanë tacueyetsimëthëcuene —jai Abraham. Abimelec jejai. Nexata baja, pita.
31 Bajaraxuata, bajarapataxunaemi wënëruba Beerseba,d tsipaji bajarajota, bajarapajiwibeje naliwaisicajunuabeje xaniawaetsia penasiwajamatabëcuenexanepanaenexabeje.
32 Penaliwaisicajonecujinaebeje Beersebajawata, Abimelec barënawiata Ficol pijamonae filisteowi pijanacuayabelia. 33 Beersebajawata, Abraham ubanuta naejawa, tamariscowënënae, pemaxërananawitsiwirianae. Bajarajotanua, wajëcabiaba Abraham Jehovájawabelia, ponë peyamatacabiatsitecaenë. 34 Nexata, bitso bajayajebi ponapona Abraham Beersebajawata, filisteomonae nacuata pe-ecaetaxunae.