Dioso itoroba Abraham petajuitsinexa Isaac altar-jumata
22
Bajaraxuacujinae, Abraham itsamatacabi Dioso jamatabëcuene-ëjëtatsi, pejamatabëcueneyapëtaenexatsi pepacuene pejumexaniataejawa Dioso najumecapanepaeya pejumaitsijawamitsi pexënato yabara. Junataxuabatsi pewënëta:—Abraham —jai.
Bajaraponë nexata jumecanawiata:
—Majotaje nucajëje —jai.
2 Dioso jumaitsi:
—¡Pire Isaac, ponë nexënato caenëyo, bitso ni-asiwanë!a ¡Barëponare Moriah irabelia! Patsutojawata catsitajëtsianatsi, bajarapatsutojumatalia nerajutsiaya daxitanë netotajuitsianame, pacuenia exanabiabame dajubinëxijawabelia —jaitsi Dioso.
3 Nexata, itsamatacabijawabelia, pepobajayacunua, Abraham namatacota. Tsijumacëba silla pijaburroyo peponaenexa. Ucubaba iso petsewinaexi pecaponaenexa. Pexënato barëpona anijanëbeje pijajiwitonëbeje yajawa. Pona itsabelia Dioso itorobatsi peponaenexa, penacoxitajuitsinexa daxitanë Diosojawabelia. 4 Acueyabimatacabita Abraham tajëweliacujinae taeyelia bajarapatsuto itsabelia tocaëjëtatsi pepatsinexa. 5 Nexata, jumaitsi pijajiwitonëbejejawabelia:
—¡Bajarajota, payajawanacoparebeje burro! Paxanëbeje, pewëjëatobeje paponaenajëbeje orijibia webeliayo, patanajamatabë-itajëtsinexabeje pata-asiwajawabeje, yaiyataeya-ata patato-exanaenexabeje pejitsipaecuenia Dioso jawabelia. Bajaraxuacujinae, panawiatsiarenajëbeje —jai.
6 Abraham pita pa-isocunu capona penacoxitajuitsinexa. Nexata, tsiwëtacarabuata pexënato Isaac. Xuacujinae, pita cusiupa. Caponanua waxiyota iso-ita-ire! Nexata jane baja, najuaponabeje. 7 Bajaraxuacujinae, peponaejawatabeje Isaac jumaitsi paxajawabelia:
—Axa —jai.
Nexata, Abraham jumaitsi:
—¿Dexua jitsipame, taxënato? —jai.
—Xainatsibeje isocunu, pita-ire yajawa. ¿Detsa nexata jota nuca ovejayo wajatajuitsinexabeje daxitanëyo Diosojawabelia wajaneconibeje yabara? —jai Isaac.
8 Nexata, Abraham jumecanawiata:
—Ũjũãẽ, Dioso raja nacarajutsianabeje bajaraponëyo wajatajuitsinexabeje —jai.
Pewajënaeyabelia icatsia ponabeje. 9 Itsa baja patabeje bajarajota, itsajota Dioso tocaëjëtatsibeje, Abraham nacuenebanuta altar-jawa. Iso tsijumajeba bajarapa-altar-jumawereca. Bajaraxuacujinae nexata, pexënato cobecëta, taxucëta yajawa, pebuatsinexa Isaac isojumawereca altar-jawata. 10-11 Paepatota nacoxiwësicaxiunaejitsia cusiupata, nexata Jehová pija-ángelnë itacarajeta junataxuabatsi athëbëwetsica:
—Abraham, Abraham —jai.
Bajaraponë jumaitsi:
—Nucajë majotaje —jai jumecanawiatsiaya Abraham.
12 Ángelnë nexata jumaitsi bajaraponëjawabelia:
—¡Pëtsa itsacuene exaname bajaraponë! Yapëtaniji xanë, Diosonë, taneyaiyataejawamë, tsipaji aponewecua-asiwamë tanerajutsinexamë nexënato, caenëyo-ata —jai Jehová pija-ángelnë.b
13 Abraham naëcolia. Nexata, taenuta pepënëwerena penucaejawa oveja, pemata-e-arëbanucaenëtsi pemaxërananawitsinaeyojawabelia. Nexata, lia pepitsinexa. Bajaraxuacujinae, daxitanëyo tajuita Diosojawabelia pexënato pejamatabëcueneta penacoxitajuitsijawaminexa. 14 Bajaraxuacujinae, itsajota Abraham Dioso yawenonatsi wënëruba «Jehová wajanacarajutsinë wajanamatawenonaecuene», pejaiwënë. Bajaraxuata, abaxë bajarapatsuto wënëruba: «Jehová pijatsutojawata, bajaraPonë nacarajutsiana xua namatawenonatsi», jai wënërubiaya. 15 Bajaraxuacujinae, Jehová pija-ángelnë athëbëwetsica icatsia junataxuabatsi Abraham cotocaewijawa. 16 Jumaitsi:
—Jehová ra jumaitsi. Xamë taneto-exanaexaemë pacuenia cajumaitsitsi, aponewecua-asiwamë nexënato, nexata xanë xaniajaiya najumecapanepaeya cajumaitsitsi tacayawenonaenexa. 17 Pepacuene ajenaconoxaeta pexaniacuenia cayapëtaeya-exanatsi tacayawenonaejawanexa bitso ayaicuenia, orijibia nemomoxi ayaibitsaëto penaexanaponaenexa. Pacuenia athëbëpijitulupu nawita, bajara-itsi tsane. Pacuenia tajetamaxë-atsapërë nawita manuamene-itapaya, bajara-itsi tsane. Bajarapacuenia orijibia yawenonaenajë itsamatacabi pecuene-amoneyababiabinexa pijawajabitsaë. 18 Daxitanacuanëpijiwi nemomoxiyajuwënënë pejamatabëcuenetac yawenonaenajë pexaniacuene penatoyapëtaenexa, tanejumecowënëtsixaemë —jai Jehová pija-ángelnë Abraham-jawabelia.
19 Bajaraxuacujinae, icatsia Abraham nawiata pijajiwitonëbejejawabelia. Bajaraxuacujinae, daxita najuanawiaba Beersebajawabelia, itsajota Abraham ponapona.
Nacor pexi, yabara peliwaisi
20 Bajarapamatacabijawa matapania Abraham wënëliwaisitane Milca-ata penaxainaejawa pexi pejuyapijinë Nacor-jawabelia. 21 Copiayapijinëyo pewënë Uz. Cotocaewipijinë pewënë Buz. Itsanëyo pijinia Kemuel pewënë. Kemuel pexënato xaina Aram. 22 Kemuel-cujinae naexana Quesed, Hazo, Pildas, Jidlaf, Betuel-ata. 23 Betuel xaina pexënatoyo pewënë Rebeca. Nexata, bajarapa-ocho ponëbeje Milca toxaina Nacor-jawabelia, Abraham pejuyapijinë.
24 Bajaraxuacujinae, Nacor xaina itsajiwiyobeje Reúmajawabelia, powa cotocaewi pepitsiwa. Xaina pebijiwi pewënë Teba, Gaham, Tahas, itsawa pijinia pewënë Maaca. Bajarapajiwiyobeje xaina Reúmajawabelia.