Sara petëpaejawa, yabara peliwaisi
23
1-2 Sara itsa xaina ciento veinte y siete pawaibeje, bajarapowa baja tëpa Quiriat-arba tomarata. Itsawënë pijinia xaina bajarapatomara. Pewënë Hebrón, Canaán nacuata pe-ecaetomara. Abraham bitso najamatabëxainaeya wënua pijacuenecuenia pijawa, pewecuatëpaexaetsi. 3 Cae-epatoyo pewënuecujinae, wecuapona itsajota boca Sarapijiwami petëpaewa. Pona imoxoyo pejinawanapaewijawabelia, heteomonaejawabelia,a ira yabara pebarëcuaicuaijainexa, pexainaenexa itsajota mëthëtsijitsia pijawami.4 Jumaitsi:
—Itsanacuapijinë-atanë paxamëtuatuajëta tsaponaponae, panerajutsianame patacacomuatsinexa ibowajumëthë, taxuabinexa tajawami —jai Abraham.
5 Itsiata baitsi jane, heteomonae jumecanawiatatsi:
6 —Abaxë raja, patajatuxanenë. ¡Panenamuxuna-ewere! Xamë raja cajena paxanëtuatuajëta peca-itapetsinë Dioso. Paxanë raja paxainajë ibowajumëthëanë patamëthëcaenexa pamonae panewecuatëpapona. Nexata, pa-ibomëthëwajujawata catsitaxanepana nemëthëtsinexa, mëthëtsianame nijawami. Acuenebi paxanëyajuwënëwi-ata pecawecua-asiwajawa —jai heteomonae Abraham-jawabelia.
7 Abraham nexata nonotapuna. Xuacujinae, nawëbuatabareca yaiyataeya pecuaicuaijaiwajënaeya heteomonaejawabelia.
8-9 Jumaitsi:
—Pepacuene itsa pacatsitaxanepana tamëthëtsijawa tajawami mapanacuataje, nexata pexaniacuene paneto-exanaename. Panetowajëtsianame panijamonaenë Efrón-jawabelia, Zohar pexënatota, tanerajutsinexa petsutoyenepanata pa-ibowaju boca bajaraponë pija-iramuxunenetalia, Macpelawënë ibowaju. Xanë bajarapawajumatamo rajutsianajë pacuenia namatamota. Nexata, bajarapacuenia tajamëthëwaju tsanucae tsane mapanacuataje —jai Abraham.
10 Bajarapaepatota, Efrón heteomonaeyajuwënënë na-eca bajarapatuatuajëta, tomara peyacaranatanutsijawapijibaupa canacujitsita. Nexata, jumecanawiata Abraham-jawabelia, jamatejema itsamonae-ata pejumetaenexatsi, pamonae penajua-enaewi, pamonae-ata pelialiawi bajarapatomara matatoyorotsia peyacaranatanutsijawapijibaupajawalia.
11 Efrón nexata jumaitsi daxita pijamonae pitabëta:
—¡Jume raja, patajatuxanenë! ¡Abaxë nenamuxuna-ewere! Xanë raja carajutsianatsi amoneya bajarapa-irayo, pa-ibowaju-ata boca bajarajota. Daxita mapamonaeje nejumetaeyena amoneya tacarajutsijawanexa bajarapa-irayo. Mëthëtsianame baja nexata nijawami —jai Efrón.
12 Abraham icatsia nawëbuatabareca yaiyataeya bajarapatomarapijiwijawabelia. 13 Xuacujinae, jumecanawiata Efrón-jawabelia daxita bajarapamonae pitabarata:
—¡Abaxë nenamuxuna-ewere! Xamë raja cajumaitsitsi orijibia tanewecuapitsinexamë bajarapa-iramatamo. Bajarajane xuacujinae, tajawami mëthëtsianajë —jai Abraham.
14 Efrón nexata jumecanawiata Abraham:
15 —¡Nejumetaema tajatuxanenë! Bajarapa-irajawayo raja namatamota cuatrocientos ponëbeje palatanëanë. Bajaraxua yabara acuenebi wajacuaicuaijaitsaponaejawabeje. Nexata, jamatejema mëthëtsianame nijawami —jai Efrón.
16 Nexata, Abraham bajaraxua jumejejai pematamotsinexa bajarapamatamowajëto Efrón-jawabelia, pacuenia bajaraponë wajëtatsi daxita jiwituatuajëta. Matamota daxita pematamocaëjëpaecuenia bajarapamonae pitabëta. 17 Bajarapacuenia Abraham comuata Efrón-jawabelia Macpelawënë ibowaju. Yajawacomuata itsa pa-irayojawata boca bajarapa-ibowaju, daxita penubenaenaejawaxi-ata. Macpela petsutoyenepanata pa-ibowaju boca Mamremacabo imoxoyojawatareca. 18 Perajutsixaetsi bajarapa-irayo, Abraham baja pepopija-irayo exana. Bajarapacuenia natoxainabeje pejumetaewitsibeje ira penawijatsijawa heteomonae pejumetaeyenaewitsi, daxita pamonae-ata lialia tomara peyacaranatsipijibaupajawalia.
19 Bajaraxuacujinae, pematamotsicujinae baja, Abraham pijawa mëthëta bajarapa-ibowajumëthëjawata. Macpelawënëmëthë ibowaju boca Mamremacabo imoxoyojawatareca, Canaán nacuata pe-ecaetomara. Itsawënë pijinia Hebrón. 20 Bajarapacuenia nexata Abraham canacopatab bajarapa-ibowaju, patsutota bajarapa-ibowaju ruca, patusatota-ata eca bajarapatsuto, heteomonae pecanajetsixaetsi pemëthëtsinexa pijawami.