Abraham itoroba pijajiwitonë petojaitsinexa pexënato pijawanexa
24
1-2 Abraham baja bitso perujunëyo. Jehová yawenonabiabatsi pexaniacuenia daxitacuenejawalia. Nexata, itsamatacabijawabelia Abraham junata pijajiwitonëa pewitsatsinë, perujuponaponaenë daxita amoneya petonacuenebiwitsiwecua. Bajaraponë petonamatacaitorobaponaponaenë daxita Abraham pijajiwijawabelia, peto-ewetaponaponaenënua daxitaxua Abraham xaina. Nexata, Abraham jumaitsi bajaraponëjawabelia:—Nacobebuatsianame tathaëbëxëpanayotab tayapëtaenexa itsa jejamëjitsia pacuenia ca-itorobijitsiatsi. 3 Nexata, najumecapanepaeya nejumaitsimëre Jehová pewënëta, Ponë pewetaponaponaenë athëbëpijicuene, irapijicuene-ata, tanetocopatsiyaniwamë itsamatacabi taxënato Isaac penacojiobiyaniwa Canaán nacuapijipetiriwajawabelia, panacuata xanë ponaponajë. 4 Saya ponaename tajanacuamijawabelia. Nexata, bajarajotalia neto-itapetsianame taxënato pijawanexa, tajamonaeyajuwënëwa —jai Abraham.
5 Nexata, pijajiwitonë jumecanawiatatsi:
—Itsa bajarapapetiriwa apojitsipae tsane peponaenexa xanë tapëta, ¿denexata itsinë tsane? ¿Nexata meta, caponaenajë nexënato bajarabelia, panacuajawawerena wecuapitsapame? —jai Abraham pijajiwitonë.
6-7 Abraham nexata jumaitsi:
—¡Jume! ¡Pëtsa netocaponame taxënato bajarabelia! Apoxanepanae, tsipaji Jehová Dioso, athëbëtatsia pe-ecaenë, nejuta taxapijinëmi pijamonaewecua, pa-irata-ata bajarapamonae jinawanapa. BajaraPonë najumecapanepaeya nerajutsiapaeba mapaCanaán nacuaje, tamomoxi tawënamuto pejinawanapaenacuanexa. Nexata xuata, bajaraPonë cato-itorobiana pija-ángelnë peca-ewetsinexa itsacueneyaniwamë, jamatejema tanetocapatsinexamë maberenaje petiriwa taxënato pijawanexa. 8 Itsa bajarapowa apojitsipae tsane peponaenexa xamë nepëta, apo-itsacuene. Nexata, xamë apo-exanae-atamë nejumaitsicowëya, itsiata, aponajumecowënaneconitsimë tsane. Itsiata baitsi jane, apojitsipaenë necaponaejawa taxënato bajarabelia —jai Abraham.
9 Nexata, Abraham pijajiwitonë nacobebuata bajaraponë pethaëbëxëpanayowetsina. Najumecapanepaeya naliwaisicajoneya jumaitsi:
—Xua nejumaitsimë, cato-exanaenatsi —jai Abraham pijajiwitonë. 10 Bajaraxuacujinae, caetuata itapetsiaya bitso pexaniawiriajawanë, xua pijatuxanenë pexainaeyajuwënëjawanë, petocaponaenexa bajarapowa, pijamonaenexa-ata. Nexata, pita diez ponëbeje camello pecaponaenexa. Bajaraxuacujinae, barënaropota Nacor pe-ecaetomarajawabelia, patomara eca Mesopotamia nacuata.c 11 Itsa baja Abraham pijajiwitonë barëpata bajarapatomara pënëwelia, caniwiyo baja tsanajetarucae. Bajarapatomarapijipetiriawi caniwiyo puanabiaba mera, pecueyetsimeramëthëjawabelia. Nexata, Abraham pijajiwitonë bajarapaepatota nacuera-ewetsia-exana pijacamellomonae, bajarapameramëthë imoxoyojawata. 12 Bajaraxuacujinae, taxuxuaba pewajëcaejawa Diosojawabelia, peyapëtaenexa powa xanepana Isaac pijawanexa. Jumaitsi mapacueniaje:
—¡Jehová Diosomë, tajatuxanenë Abraham pijaDiosomë, tajumaitsicowëya tanetopitsapaenexa xaniawaetsia, pexaniajamatabëcuene to-exanare tajatuxanenë Abraham-jawabelia! 13 Majotaje nacopatanucajë mapamëthëmuxunenejawataje, pepatsiwajënaeya pejanawaxi mera pepuanaenexa mapanacuapijiwaxije. 14 Nexata, pexaniacuene neto-exanaename. Netsitajëtsianame powa to-itapetame tajatuxanenë pexënato Isaac pijawanexa. Xaniawaetsia tayapëtaenexa, peneta nerajutsiana mera tawajëtsijawata ta-apaenexa. Apo-itorobi-atanënua, peneta pijacuata camello mera netomitsapuanaena. Nexata, bajarapacuenia xanë yapëtaenajë xamë bajarapowa neto-itapetsijawa nijajiwitonë Isaac pijawanexa. Bajarapacuenianua yapëtaenajë pepacuene pexaniajamatabëcuenia neyawenonaejawa tajatuxanenë Abraham —jai Abraham pijajiwitonë pewajëtsijawata Diosojawabelia.
15 Bajaraponë itsa abaxë apoweretsi pewajëcaejawa Diosojawabelia, tane penajetarucaejawa pejanawa, pijacanalito wëtacara. Bajarapowa tsaena Rebeca, Betuel pexënatoyo. Betuel, Nacor pexënato, Milcawënëwabeje. Abraham pejuyapijinë Nacor, Betuel paxa. 16 Bajarapowayo Rebeca bitso pexaniawayo. Pejanawayo itsapebi-ata abaxë apopeperabëyapëtaewa. Nexata, Rebeca runareca bajarapameramëthëabereca pijacanalito pewënëtsinexa mera. Itsa baja pitsapaina pepuatsicujinae mera, nawiataba najetarucalia baja boyabelia. 17 Nexata, bajaraponë pëbaralia pepëcaxinaenexa. Itsa baja pëcaxina, jumaitsi bajarapowajawabelia:
—¡Pexaniacuene neto-exanare! ¡Mera nerajure ta-apaenexa, nijacanalitopijimera! —jai.
18 Nexata, bajarapowa jumaitsi:
—¡Ãjã, apaema tajatuxanenë! —jaitsi bajarapowa. Bajaraxuacujinae, etsica bajarapameracanalito. Bajarapowa cobenanucaya abata bajaraponë piapaenexa. 19 Itsa bajaraponë apaewereta piapaejawa, Rebeca icatsia jumaitsi:
—Xanë catopuanaenatsinua mera nijacamellonexa, bajarapamonae piapaenexa pacuenia jitsipa —jai.
20 Bajarapowa nexata naxatsiayo epanaxuaba pijacanalitowecua dajubi piapaeyabiabimoyojawabelia. Nexata, bajarapowa topuanapona mera, daxita camello piapaenexa. 21 Nexata, bajaraponë ajumejibia abaxë taenuca jamatabëcuenenabenajacaeya, jumaitsinejewa abaxë itsaliwaisi. Bajaraponë jamatabëjumaitsi: «¿Xaniajai meta mapowayo tsaneje? ¿Xaniajai meta Jehová neyawenona tajanamuto tanetoxanepanaenexa?», jamatabëjai tsanucae. 22 Bajaraxuacujinae baja, daxita camello piapaeweretsicujinae, nexata bajaraponë jutsina oro anillo perajutsinexa bajarapowa. Bajaraxua arewe tsecae bejamatabë seis pagramobejecuenia. Nexata, tsipumuruta. Yajawarajutanua bajarapowa anijapenamaxëxatatsijawabeje, orojawata pexanaejawa. Bajaraxuabeje arewe bejamatabë cien pagramobejecuenia. 23 Nexata, jumaitsi bajarapowajawabelia:
—¡Nejumaitsimëre! ¿Jipatsa xamë pexënatoyomë? ¿Paxainame tsaja axa pijabota taxunaenë patanapatsinexa, itsajota-ata patanamajitsinexa? —jai.
24 Bajarapowa jumecanawiata:
—Xanë raja Betuel pexënatoyonë, Milca pexënato, Nacor pijawa. 25 Patajabojawatalia raja, paxainajë itsajota papatsijitsiamë, panenamajitsinexa-ata. Paxainejebajënua pexaniabacamësi nijacamello bajarapajumata pebobenaenexa, bajarapacuenia pexaniapo̱na patanotsijawami pexaenexa-ata —jai Rebeca Abraham pijajiwitonëjawabelia.
26 Bajarapaepatota nexata, Abraham pijajiwitonë pematabacabëta nuca, pexaniajamatabëcuene perajutsinexa Jehovájawabelia. 27 Jumaitsi:
—Bitso pexaniajamatabëcuenenëmë, tajatuxanenë Abraham PijaDiosomë. Caejamatabëcuene nexainaenë, tsipaji pexaniajamatabëcuene to-exaname tajatuxanenë Abraham-jawabelia. Nexata, yapëtaniji tanematacaponaejawamë tapatsinexa bajaraponë pijamonaejawabelia —jai Abraham pijajiwitonë pexaniajamatabëcuene perajutsijawata wënëcacuaicuaijaiya Jehovájawabelia.
28 Rebeca nexata cujinaeponalia pena pijaboyabelia, petsipaebinexa daxitaxua jumaitsitsi bajaraponë. 29 Bajarapowa xaina pematapijinë pewënë Labán. Bajaraponë pejumetaecujinae pejuyapijiwa, nexata cujinaelia bajarapameramëthëjawabelia penamataëxënaenexalia bajaraponë. 30 Ponalia, tsipaji pumutane oro anillo. Maxëtanenua penamaxëxatatsijawa orojawabeje pejuyapijiwa. Xua tsipaebanuca penajawabelia, jumetane bajaraponë pejumaitsijawatsi. Nexata, Labán itsa lia bajaraponëjawabelia, caxitajaraba Abraham pijajiwitonë. Bajarajotalia, bajaraponë yajawanuca pijacamello meramëthë imoxoyojawata. 31 Jumaitsi Labán:
—¡Naxatsia! Xamë Jehová pexaniacuenia pecayawenonaenë. Xamë acuenebi nenacopatsijawa majotarenaje wayafota. Pacatoxainatsi paxanë botalia itsajota neyajawaponaewi papatsijitsiamë, panijacamello-ata itsajota pacapatsijitsiamë —jai Labán.
32 Nexata, bajarapacuenia Abraham pijajiwitonë napënalia Labán pijaboyabelia. Bopanabojawata, Labán towejuma-isica daxita pijacamello xua capona. Rajutanua camello pexaejawa. Bajaraxuacujinae, carena mera bajaraponë petaxuquiatsinexa, peyajawaponaewi-ata petotaxuquiatsinexa.
33 Itsa baja totsanatsi pexaejawa pexaenexa, nexata Abraham pijajiwitonë jumaitsi bajarapamonaejawabelia:
—Xanë abaxë apoxaenë tsane pacatsipaebinejewatsi xua yabara najetarucajë —jai.
Nexata, Labán jumaitsi:
—¡Cuaicuaijamëre pacuenia jitsipame! —jai Labán.
34 Bajaraponë jumaitsi:
—Xanë raja tanewitsatsinë Abraham. 35 Bajaraponë yawenonatsi bitso pexaniacuenia Jehová. Nexata, pexainaenë naexana. Xaina ovejamonae, vacamonae, oronua, palatanëanë-ata. Ayaibitsaëto amoneya petonacuenebiwitsi xaina pebinëxi, petiriwaxi-ata. Camellomonaenua orijibia yajawaxaina, burromonae yajawa. Nexata, xaina ayaijawa, Dioso perajutsixaetsi. 36 Itsa baja Sara bitso perujuwa, bajarapaepatota, Abraham pexijiwiyo toxaina. Nexata, bajaraponë canacopata daxita paxa pecobecowë. 37 Tajatuxanenë nitoroba najumecapanepaeya tajumaitsinexa pexaniajaicuenia bajaraponëjawabelia mapacueniaje. Nexata nejumaitsi: «¡Pëtsa netocopatame taxënato penacojiobinexa mapanacua, Canaán nacuapijipetiriwajawabelia, panacuata xanë ponaponajë! 38 Biji rajane, xamë ponaename taxapijinëmi pijamonaejawabelia. Bajarapamonaeyajuwënëpijipetiriwa neto-itapetsianame taxënato pijawanexa, tajawiriawa», nejai. 39 Xanë nexata jumaitsinë: «Tajatuxanenë, ¿de-itsinë tsane bajarapowa itsa apojitsipae peponaejawa xanë tapëta?», janë. 40 Bajaraponë nexata nejumecanawiata: «Xanë raja Jehová pejitsipaecuenia tajumecowënëtaponaponaenë. Bajaraponë raja cato-itorobiana pija-ángelnë, xaniawaetsia nijanamuto neponaenexa, nenacueratsiyaniwa-ata, netocaxitajarabinexa powa taxënato pijawanexa tajamonaeyajuwënëwa. Baitsi, taxa Tarépijinëmi pijamonaeyajuwënëwa. 41 Jane baitsi, itsa apocatocopatsijitsipae tsane pejanawa pijamonae, matapania xamë nexanaenexa cato-acuenebi tsane xua najumecapanepaeya nejumaitsimë taneto-exanaenexamë picani. Nexata, apo-exanae-atamë, aneconijibimë baja xanëjawaberena», nejai tajatuxanenë Abraham.
42-43 »Itsa baja patajë meramëthëjawaberena, nexata wajëtajë Jehovájawabelia. Jumaitsinë: «Jehová, ponëmë tajatuxanenë Abraham pijaDiosomë, itsa neyawenonaename xaniawaetsia tajanamuto xua yabara najetarucajë, netocopatsianame tanetoxanepanaenexa wecae nucaenajë meramëthë imoxoyojawata. Powa patsiarena mera pepuatsinexa, itsa bajarapowajawabelia jumaitsinë tsane mapacueniaje: ‘¡Pexaniacuene nexanare! ¡Mera nerajure tana-apaenexa!’, itsa janë tsane bajarapowajawabelia, 44 bajarapowa peneta taneto-itapetsiwamë tsane tajatuxanenë Abraham pexënato Isaac pijawanexa, jitsipaenajë tanejumecanawiatsijawa mapacueniaje: ¡‘Apaema xamë! Jucaenajënua mera tacatorajutsinexa nijacamello’, nejai tsane peneta», janë tawajëtsijawata tajatuxanenë pijaDiosojawabelia. 45 Itsa abaxë paepatota apoweretsinë tawajëtsijawa Jehovájawabelia, nexata taniji penajetarucaejawa Rebeca. Pijacanalito wëtacaranucapona. Bajarapowa runareca meramëthëareca, pepuatsinexa mera. Penawiatsiwatsina xanë nexata jumaitsinë: «¡Nenarajure mera!», janë. 46 Nexata, bajarapowa bepijiayo nawewëtacarapitsica tanerajutsinexa. Nejumaitsi: «¡Nijacueneta apaema!», nejai. Orijibia, nejumaitsinua: «Rajutsianajënua mera nijacamellomonae», nejai. Bajarapowa nerajuta mera. Tajacamellomonaenua netorajuta mera. 47 Bajaraxuacujinae, yanijobajë: «¿Jipatsa xamë pexënatoyomë?», janë. Bajarapowa nejumecanawiata: «Xanë raja Betuel pexënatoyonë, Nacor pexënato, Milcabeje», nejai. Nexata, bajarapaepatota anillo tsipumurutajë. Tsimaxërutajënua anijapenamaxëxatatsijawabeje oronanito penacuenebijawanë. 48 Nexata, xanë tamatabacabëta nucajë asiwaya pexaniajamatabëcuene tarajutsinexa barëyaya, wënëxaniatsiaya Jehovájawabelia, ponë tajatuxanenë Abraham pijaDiosojawabelia. Bajarapacuenia wajëtajë tanecapatsixae xaniawaetsia maberenaje, itsaberena tajatuxanenë Abraham papijamonaemë pajinawanapame, tatocaxitajarabinexa pexënato pijawanexa —jai Abraham pijajiwitonë.
49 Icatsia, bajaraponë jumaitsi:
—¡Ajenaconoxaeta nexata, panejumaitsimëre itsa pexaniajamatabëcuene paxainame tajatuxanenëjawabelia panerajutsinexa pexënato pijawanexa! ¡Itsa jume, itsa apopajitsipaemë bajarapajamatabëcuene, panejumaitsimëre tayapëtaenexa xua exanaejitsianë! —jai Abraham pijajiwitonë Rebeca pijamonaejawabelia.
50 Nexata, Labán, Betuel-beje, jumecanawiata:
—Bajaraxua raẽta pitsapa Jehovájawawerena. Nexata, paxanëbeje acuenebi patacajumaitsinexabeje, «jãjã», itsa jume, «jume», patacajainexabeje. 51 ¡Taema! Nuca rabaja maje Rebeca. Nexata, tobarëponaename bajarapowa, jamatejema nijatuxanenë pexënato pijawanexa, pacuenia Jehová tocaëjëtatsi bajarapowajawabelia pe-exanaenexa —jaibeje.
52 Itsa bajarapacuenia jumetane Abraham pijajiwitonë pejumaitsijawatsi, nexata bajaraponë pematabacabëta nuca yaiyataeya Jehová pitabarata, irabereca matabocopatsiaya. 53 Bajaraxuacujinae, bajaraponë jutsina xuanë capona perajutsinexa Rebecajawabelia, orojawata pexanaejawanë, palatanëanënua, nawanë yajawa. Itsajawanë pijinia Rebeca pijamonaejawabelia rajuta, xuanë jamatabënacapona perajutsinexa. 54 Xuacujinae, bajaraponë, peyajawaponaewinua, naxane pexaejawa. Namajitanua bajarajota. Itsa baja bajayacunua, bajarapamonae itsa namatacoba, nexata Abraham pijajiwitonë jumaitsi Rebeca pijamonaejawabelia:
—¡Panecopare baja taponaenexa tajatuxanenë Abraham pijabojawabelia! —jai.
55 Jane baitsi itsiata, Rebeca pematapijinë, pena-ata jumaitsi:
—Abaxë bajarapowayo nacopatsiana paxanëjawata diez pamatacabibejecuenia. Bajaraxuacujinae jane baja, barëponaename —jaitsi.
56 Bajaraponë jumecanawiata:
—¡Pëtsa baja panecuenenajematsia-exaname, tsipaji Jehová neyawenona xaniawaetsia tanetopitsapaenexa tajanamuto maberenaje! ¡Nexata baja, panecopare tanawiatsinexa tajatuxanenë Abraham pijaboyabelia! —jai bajaraponë.
57 Nexata, bajarapamonae jumecanawiatatsi:
—Junatsianatsi nexata bajarapowa, wajayapëtaenexa pacuenia najamatabëxaina —jaitsi.
58 Nexata, junatatsi Rebeca peyanijobinexatsi:
—¿Naponaejitsipame tsaja maponë pepëtaje? —jai.
Bajarapowayo jumecanawiata:
—Jãjã. Naponaenajë —jai.
59 Nexata baja, copatatsi Rebeca penaponaenexa. Yajawapona powa ewetabiabatsi tsiquiriwayojawaweliacujinae, amoneya petonacuenebiwatsi. Nexata baja, barëpitsapa Abraham pijajiwitonë, pebarëpatsiwi yajawa.
60 Penapëjiobijawatatsi, Rebeca pijamonae yapëtaeya-exanatsi Dioso pewënëta itsamatacabi pexaniacuene petaenexa. Jumaitsi mapacueniaje:
—Patajuyapijiwamë, pacatojitsipatsi xamëjawawerena bitso pepitsapaponaejawa nemomoxibitsaëtoxaneto. Patojitsipajënua bajarapamonae pecuene-amoneyababiabinexa tomaranëjawabelia pijawajabitsaë —jai pijamonae.
61 Nexata, bajaraxuacujinae Rebeca ecaya camellojumatsia. Itsawaxi pijinia pona itsacamellonëta pepënaponaewitsi. Pënanajetarubena Abraham pijajiwitonë. Bajarapacuenia nexata, Abraham pijajiwitonë itsa caxitajaraba Isaac pijawanexa, wecuabarëpona Rebeca bajarapatomarawecua.
62-63 Abraham pijajiwitonë pecowëta, Isaac pijinia ponapona Neguev-tusatojawabelia itsajota meramëthë eca, pamëthë wënëruba «Dioso piasaëtsaponaponaenë wajanacataenë»,d pejaiwënë, bajarajota peponaponaenexa cae-epatoyo. Penawiatsicujinae bajarawerena, pata icatsia paxa pijataxunaejawata. Itsamatacabi caniwiyo bowecua pitsapa wayafotusatuabelia peponaponaenexa. Bajarajotalia, asiwaya najamatabëxainaeya ponapona Diosojawabelia. Bajarapaepatota, tane camello pimoxoyobijawatsirena bajaraponëjawaberena. 64 Rebeca-ata pijinia tane bajarapaepatota Isaac. Nexata, bajarapowa runaica camellojumawetsica. 65 Yanijoba Abraham pijajiwitonëjawabelia:
—¿Demaponë najetarucaje waxaitsijawaberenaje? —jai bajarapowa.
Bajaraponë jumaitsi:
—Tajatuxanenë raja Isaac —jai bajaraponë.
Nexata, bajarapowa pita penaitabaracaranatsipananexa. Naitabara-acataxuaba.
66 Pijatuxanenë pijataxunaebojawabelia pepatsicujinae, nexata Abraham pijajiwitonë tsipaeba Isaac-jawabelia daxitaxua exana. Bajaraxuacujinae nexata, Isaac barëpona Rebeca penapijiwami pijacarpabojawabelia. Bajarapacuenia baja Isaac pita Rebeca. Isaac nexata bitso asiwa Rebeca. Nexata, Isaac pewënajamatabëxainabiabijawami pena Sarapijiwa, Isaac baja copata.