Abraham xaina pemomoxi itsamonae Ceturawënëwajawabelia
25
Abraham xaina itsawa pijawa. Bajarapowa pewënë Cetura. 2 Bajarapowajawabelia xaina pexi, mapamonaeje: Zimram, Jocsán, Medán, Madián, Isbac, pecotocaewinë pijinia pewënë Súa. 3 Jocsán pexënato xaina anijanëbeje pewënë Seba, Dedán-beje. Dedán-jawawerena pitsapa Asurim-monae, Letusim-monae, Leumim-monae. 4 Abraham pexënato Madián-ata pexi xaina mapamonaeje: Efa, Efer, Hanoc, Abida, Elda. Daxita bajarapamonae pijapemomoxi tsaponae Cetura,a Abraham pijawa. 5 Isaac canacopata daxitaxua paxa Abraham pecobecowë pexainaejawanë. 6 Itsamonae pijinia pamonae xaina itsapetiriawijawabelia saya rajutapona pijajawaxinexa caejiwi canacujitsia. Abaxë Abraham itsa asaë tsaponaponae, pamonae xaina pexi itsapetiriawijawabelia itoroba pemutuabereca pejinawanapaenexa Isaac-wecua.Petëpaejawa Abraham, yabara peliwaisi
7 Abraham asaë tsaponaponae ciento setenta y cinco pawaibeje. Bajaraxuacujinae, tëpa. 8 Bajaraponë tëpa pijaperujunëwixaeta, pepuaperujunëyo bitso. Nexata, bajarapacuenia itsa tëpa, mëthëtatsi pacuenia pijamonaemi petëpaewimi mëthëcabiaba.b 9 Pexënatobeje Isaac, Ismael-beje, xuabatsi Macpela petsutoyenepanata pebocae-ibomëthëjawata, pamëthë boca Mamremacabo imoxoyojawata, Efrón pija-iramiyajuwënëjawata, Zohar pexënato heteowirianë. 10 Bajarapa-ira cajena Abraham comuatabuata heteomonaejawabelia. Nexata, bajaraponëmi-ata buatatsi pa-ibowajumëthëjawata Sarapijiwami copiaya buatatsi. 11 Abraham petëpaecujinae, Dioso pexaniacuenia yawenonaponatsi Isaac. Abraham petëpaecujinae, Isaac ponapona imoxoyojawata pameramëthë eca Neguev-tusatojawata pewënë, «Dioso piasaëtsaponaponaenë wajanacataenë», pejaiwënë.
Ismael pemomoxi, yabara peliwaisi
(1 Cró 1:28-31)
12 Mapamonaeje Ismael pexi, Abraham-pijinë pexënato Agar-jawabelia. Ponë xaina Egipto nacuapijiwata, Sarapijiwami pijajiwitowami. 13 Ismael-jawawerena mapamonae naexanabuataponaje: Nebaiot, Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis. Pecotocaewinë pewënë Cedema. 16 Pamonaeje Ismael pexi pewënëanë doce ponëbeje. Bajarapadoceponëbeje naexana caenë canacujitsia peyanacua-ewetsinënexa pijamonae pijanacuata. Bajarapamonae pewënëanëcuenia wënërubapona pejinawanapaetusatonëmijawa.
17 Ismael itsa xaina ciento treinta y siete pawaibeje, bajaraponë tëpa. Nexata, mëthëtatsi pacuenia pijamonaemi petëpaewimi mëthëcabiaba. 18 Daxita bajaraponë pemomoxi jinawanapa Havila nacua, Shur nacuabejetuatuajëajawa, Egipto nacua imoxoyojawabetsia. Panamuto najetaruca Egiptojawawerena Asiria nacuajawabelia, bajarapanamuto pemuxuneneta jinawanapa. Ismael pemomoxi itoya nanaëcota Cetura pexita penaexanaewijawabelia, bajarapacuenia Isaac pemomoxijawabelia-ata. Daxita bajarapamonae caenë Abraham-pijinëjawawerena picani pepitsapaponaewi. Bajarapacuenia itoya nanaëcotsi-ata, itsiata, Ismael pemomoxi jinawanapa bajarapanamutojawa Cetura pemomoxituatuajëjawa, Isaac pemomoxituatuajëjawa-ata.
Penaexanaejawabeje Jacob, Esaúbeje, yabara peliwaisi
19 Marapaliwaisi Isaac-pijinë pexi yabara tsaponaeje, Abraham-pijinë pexënato. 20 Isaac baja itsa xaina cuarenta pawaibeje, nacojioba Rebecajawabelia Betuel pexënatoyo, Labán pejuyapijiwa. Bajarapamonae arameowi pejinawanapaewi Padan-aram nacuata. 21 Rebeca apotoxainae pexënatojiwiyo Isaac-jawabelia bajayajebi. Bajaraxuata, Isaac wajëca Jehovájawabelia, bajarapowa pexi petoxainaenexatsi itsamatacabijawabelia. Jehová jumetanetsi Isaac petowajëcaejawa pijawa Rebeca. Bajaraxuacujinae, jemata baja tonacoxitatsi. 22 Yacotajina anijanacuetobeje. Bajarapowa peyacotaponaponae-epato, tsicotonabeyabiabatsibeje bitso. Nexata, bajarapowa najamatabëxaina: «Bajarapacuenia itsa tsitecaponaena, aponetoxanepanae ta-ajamatabësaëjawa», jamatabëjai. Nexata, lia bowecua pewajëcabiabitaxunaejawabelia, yanijobijitsia Diosojawabelia bajaraxua yabara.
23 Jehová jumecanawiatatsi:
—Yacotamë raja anijanëbeje nexijiwiyobejenexa. Nexata, bajaraponëtabeje pitsapaena anijawiriabitsaëtobejenexa, anijanacuabejenexanua. Bajaraxuata raja, catsicotonabeyabiababeje penaexanaewajënaeyabeje. Caenë piacuenesaënë tsane itsanëwecua. Matapijinë jamatabëcuene-ewetsiana pejuyapijinë —jai Jehová.
24 Itsa baja tocopiapatatsi pexanaejawa, Rebeca exana anijanëyobeje. 25 Copiaya penaexanaenëyo pena̱tsobianëyo. Bitso na̱juweca. Nexata, bajaraponëyo wënërubatsi Esaú.c 26 Bajaraxuacujinae, naexana itsanëyo, taxusalibëwaetabarucaeya pematapijinë. Bajaraponëyo wënërubatsi Jacob.d Isaac bajarapacujinaeta xaina sesenta pawaibeje pacujinae wecuanaitajëtatsi Rebeca pexënatonëyobeje.
Esaú canajetaxuaba pejuyapijinëjawabelia matapijinëjamatabëcuenemi
27 Itsa bajaraponëbeje naweretaponabeje baja, Esaú nexata bitso pejitsipaenë penarujuaitsijawa unuabelia. Peyopianë bitso. Jacob apopejitsipaenë penarujuaitsijawa. Aposiwajamatabëcuenebëjainua itsajawabelia peponabiabinexa. 28 Nexata, Isaac asiwaya tane bitso Esaú, tsipaji bajaraponë xaeyabiaba pecapatabiabi-unupijinëxi. Rebeca pijinia asiwa Jacob. 29 Nexata, itsamatacabijawabelia Jacob seteta pexaejawacuene. Nexata, bajarapaepatota Esaú, bitso piajaninë, cueranaeya patanajetaruca unuwerena penarujuaitsinë.
30 Nexata, Esaú jumaitsi:
—¡Pexaniacuene ne-exanare! ¡Nerajure bajarapatsobiatsapajawa xua setetame pexaniapexaejawa, tsipaji bitso tajani tsanajetarucae! Cueranajënua —jai Esaú. (Bajaraxuata, Esaú itsawënë xaina. Pewënë Edóm.)e
31 Jacob jumecanawiata. Jumaitsi:
—Copiaya nerajutsianame matapijinëjamatabëcuenemë,f xua canacopatsijitsiamë waxabeje pewënamuto matapijinëxaemë —jai Jacob Esaújawabelia.
32 Nexata, Esaú jumaitsi:
—Xanë raja bitso tëpaejitsianë. Tajani. Asaëjibinë baja. Nexata, itsa tëpaejitsipajë, apocabarëyanë tsipae xua canacopatsijitsianë picani waxa pecobecowë matapijinëxaenë. Bajaraxua cajena aponetoxanepanae itsacuenejawayonexa-ata —jai Esaú.
33 Jacob jumaitsi:
—¡Nejumaitsimëre aeconoxaeta nexaniajaicuenia! —jai Jacob.
Bajaraxuacujinae, pexaniajaicuenia jumaitsi Esaú:
—Jãjã, carajutsianatsi baja —jai.
Bajarapacuenia nexata Esaú tocopata, pecanacopatsinexa pejuyapijinë xua picani matapijinëxae canacopatsijitsia paxa pecobecowë. 34 Nexata, Jacob, pematapijinë pexaejawa rajuta, pan yajawa, lentejaxutsapato yajawa. Itsa baja Esaú werene pexaejawa, piapaera matawëjëa-apanua. Bajaraxuacujinae, nonotapuna. Bajaraponë pona itsacuenejawayo aponajamatabëxainaenejewa. Aposiwajamatabëbëjainejewanua xua canajetaxuaba pejuyapijinëjawabelia.