Isaac pona Gerar nacuayabelia
26
Panacuata Isaac ponapona, bajarapamatacabijawa janiboxaneto tocopiapatatsi. Pacuenia paxa Abraham-pijinë pitsijanibo tocopiapatatsi, bajarapitsijaniboxaneto Isaac-ata tocopiapatatsi. Nexata, Isaac pona patusatojawabelia Gerar tomara eca, patomarata ponapona Abimelec, peyanacua-ewetsinë filisteomonae. 2 Bajarajotalia itsa bajaraponë pata Gerar-jawata, nexata Jehová tsitanaitajëtatsi. Jumaitsi:—¡Pëtsa poname Egipto nacuayabelia! ¡Ponaponare abaxë itsajota cajumaitsitsi! 3 Itsiata baitsi jane, xanë jitsipajë neponaponaejawa abaxë cae-epatoyo mapanacuataje. Xanë cayajawa tsanetsi. Cayapëtaeya-exanatsi pexaniacuenia tacayawenonaejawanexa. Xamë, nemomoxi-ata pacarajutsianatsi daxita mapa-iranëje. Nexata, xanë pacato-exanaenatsi pacuenia jumaitsinë najumecapanepaeya axa Abraham-pijinëjawabelia. 4 Cayawenonaenatsinua nemomoxi ayaibitsaëto pepitsapaponaenexa. Pacuenia nawitsia taneme athëbëyo perubenaejawa tulupu, bajarapacuenia bajarapamonae itsi tsane. Itsamatacabi bajarapamonae rajutsianajë daxita mapa-iranëje. Nemomoxiyajuwënënë pejamatabëcueneta daxitanacuanëpijiwia yawenonaenajë penatoyapëtaenexa pexaniacuene. 5 Bajarapacuenia cato-exanaenatsi, tsipaji axa Abraham-pijinëjawabelia xua tonajumecopatajë tanejumeyaiyataenë. Xuanë-ata itawetajë, xua itorobajë tacujarubiliwaisianëta, daxita bajaraxua nejumecowënëtanajetarucaenexa —jai Jehová Isaac-jawabelia.
6 Nexata, bajarapamatacabijawa Isaac nacopata Gerar tomarajawata peponaponaenexa. 7 Bajarapanacuata pejinawanapaewi yanijobatsi Isaac pijawa yabara. Nexata, Isaac jumaitsi:
—Tajuyapijiwa raja —jai. Bajaraponë nayawajunuaxaina tajawa raja pejaijawa, tsipaji Isaac bitso junawa bajarapamonaejawabelia. Bajaraxuata, pijawa yabara nayawajunuaxaina pebeyaxuabiyaniwatsi. Rebeca bitso pexaniawaxae, nexata bajaraponë jamatabëjumaitsi: «Belia mapowa tajawa yabaraje nebeyaxuabijitsipa», jamatabëjai. Nexata, bajarapaepatota bajaraponë nayawajunuaxaina pijawa yabara. 8 Isaac bajayajebi pepuaponaponae bajarapatomarata, nexata itsamatacabi ventanawojotojawalia tanetsi Abimelec, pewetsinë filisteomonae, Isaac-beje, pijawa Rebecabeje, penawëtaicaecuenia penabarëyataeponaponaejawabeje. 9 Nexata, Abimelec junata Isaac. Jumaitsitsi:
—Mapowa tsaena pepacuene nijawaje. ¿Denexata xuajitsia xamë nejumaitsimë: «Tajuyapijiwa ra», nejamë? —jai.
Nexata, Isaac jumaitsi:
—Xanë jamatabë-itsinë: «Belia nebeyaxuabijitsipa mapowa pejamatabëcueneje», jamatabëjanë —jai Isaac.
10 Icatsia, Abimelec jumaitsi:
—¿Dexuajitsia nexata bajaraxua xamë paneto-exaname? Imoxoyo ra nexata mapanacuapijiwije nijawa pecatobarëmajitsi yapëtaenejewa nijawacuene. Xamë itsa bajarapacuenia paneto-exaname, nexata pibisiacuene imoxoyo pata-exanae Diosojawabelia, pataneyamaxë-itojorobixaemë —jai.
11 Nexata, Abimelec pijajiwi caetuata daxita petsipaebinexa mapacueniaje:
—Pajiwiyo jamatabë-itonotsiana, itsacueniabiana-ata Isaac pijawa, bajaraponë-ata, bajarapajiwiyo naneconitsia-exanatsi petëpaejawabelia —jai Abimelec.
12 Bajarapawaita Isaac itsa nacueneba pe-ubijawanë, bajarajota bitso ayaijawa topitsapatsi, tsipaji Jehová yawenonatsi pexaniacuenia. 13 Bajarajota nexata baja, Isaac bitso pexainaenë naexana. Pexainaejawa pewajënaeyabelia bitso to-ayaijawatsi tsaponae. Ayaijamatabëcuenenë naexanapona pecobecowë yabara. 14 Bajarapacuenia pexainaenëxae, xainanua dajubi, pacuenia ovejabitsaëtonë, vacabitsaëtonënua. Xainanua ayaibitsaëto pamonae amoneya petonacuenebiwitsi. Bajarapamatacabi nexata filisteomonae cueneca-ëbatsi pecobecowë yabara. 15-16 Nexata, Abimelec jumaitsi Isaac-jawabelia:
—¡Ponare baja mapatomarawecuaje! Panewecuanatsatsianame baja, tsipaji bitso xamë panetsuxainaponame paxanëwecua. Ayaijamatabëcuenesaënua xainaponame paxanëtuatuajëta —jai Abimelec.
Nexata, Isaac jejai. Wecuapona baja Gerar tomarawecua, saicaya peponaponaenexa.
Itsa abaxë pamatacabijawa ponapona Abraham-pijinë, pijajiwi pecueyejebimeramëthëanëmi Gerar-tusatojawata, nexata bajarapameramëthëanëmi filisteomonae acabejeba atsatab Abraham-pijinë pewënamuto. Nexata, acuenebi mera pepuanaejawa.
17 Nexata, Isaac pona pepatsinexa Gerar-tusatojawabelia, petsutobejetuatuajëta pebocaenamatajëpaetusato, Abimelec pecapitsapaexaetsi Gerar tomarawecua. Bajarajotalia nacuenebanuta pijacarpaboxi peponaponaenexa. Nexata, bajarajota ponapona. 18 Itsa baja jinawanapa Gerar-tusatonamatajëpaejawata, nexata pijajiwi cua meramëthëanë, pameramëthëanëmi paxa Abraham-pijinë cueyejeba. Pamëthëanëmi acabejeba filisteomonae Abraham-pijinë petëpaecujinae, bajarapamëthëanëmi icatsia mataropotsia yacuepona Isaac pijajiwi. Nexata, pacuenia paxapijinëmi wënëruba bajarapameramëthëanëmi, bajarapawënëcuenia icatsia wënëruba Isaac-ata. 19 Nexata, itsamatacabi Isaac pijajiwi cuewanapa pejanameramëthënexa Gerar-tusatojawata. Nexata, bajarajota caxitajaraba pecuejawata pexaniamera, bëpënëa pepitsaparucaemera. 20 Nexata, Gerar-tusatojawata oveja pewetawanapaewi, filisteomonae, Isaac pijinia pijajiwi oveja pewetawanapaewi yanijobatsi anaeya bepijameramëthëcuenia. Nexata, Isaac pijajiwi barënabia meramëthë yabara. Bajaraxuata, Isaac bajarapameramëthë wënëruba Esek, «Peyabaranabemeramëthë», pejaiwënë. 21 Nexata, xuacujinae Isaac pijajiwi itsameramëthë taxuxuaba pecuejawa, pejanameramëthënexa. Icatsia, bajarapameramëthë-ata yabara nabia filisteomonae Isaac pijajiwijawabelia. Isaac nexata bajarapameramëthë wënëruba Sitna, «peyabaranaitoyameramëthë», pejaiwënë.
22 Nexata, xuacujinae icatsia Isaac pijajiwi barëpona saicaya itsatusatojawabelia. Bajarajotalia, icatsia taxuxuaba pecuejawa itsameramëthë. Bajarapameramëthë apoyabarabetsi baja filisteomonae. Isaac nexata bajarapameramëthë wënëruba Rehobot, «Ayaitusatonacua wajajinawanapaenexa», pejaijume. Isaac nexata bajarajotalia jumaitsi: «Bajarajane matapania Jehová nacato-itajëta pinijitusatoxaneto, aliwaisijibiaya wajajinawanapaenexa. Matsaena jotaje jamatabëcuenexanepanaeya jinawanapaenatsi, ayaijawa wajacapitsapaenexa waja-ubijawanë bajarapa-irata, bajarapijinia pacuenia wajanacatonawitsinexa wajamonae, wajadajubi-ata», jai.
23 Bajarajotacujinae, Isaac barëpona Beerseba nacuayabetsia. 24 Itsa baja barëpata Isaac Beersebajawabetsia, bajarapamerawi Jehová tsitanaitajëtatsi. Jumaitsi:
—Xanë raja pijaDiosonë tsaponaponae axa Abraham. ¡Pëtsa junawame, tsipaji xanë cayajawaponaponatsi! Pejamatabëcueneta tajajiwitonë Abraham asiwaya tanejumecowënëtsixae, cayawenonaenatsi pexaniacuenia. Ayaibitsaëtoxaneto cato-naexanaponaenanua nemomoxi —jai Jehová Isaac-jawabelia.
25 Nexata, Isaac to-exananuta altar-jawa. Bajarajota, yaiyataeya wajëta Jehovájawabelia. Nexata, bajarajota Isaac nacuenebanuba pijacarpaboxi peponaponaenexa cae-epatoyo. Bajarajotanua, icatsia pijajiwi amoneya petonacuenebiwitsi tocueyetatsi itsameramëthë.
Isaac, Abimelec-beje, najumeliwaisicajunuabeje
26 Itsamatacabi Abimelec pona Gerar nacuajawawerena, pepatsinexa Beersebajawaberena itsajotarena ponapona Isaac, pebarëcuaicuaijainexatsi. Bajaraponë Abimelec yajawapona peyapëtaenëtsibeje, Ahuzat, Ficol-beje.c Itsanë pijinia Ahuzat-wënënë pemuxujiobinë Abimelec, Ficol-wënënë pijinia penamatacaitorobinë wajabitsaëwi. 27 Nexata, Isaac jumaitsi bajarapamonaejawabelia:
—Itsa paxamë pane-ataejitsibimë, icatsianua baja panecapitsapame panija-irawecua, ¿dexuajitsia nexata paxamë panetae-othoparemena? —jai.
28 —Paxanë payapëtaniji pecayajawajawa Jehová. Nexata, paxanë panajamatabëxainajë wajanaliwaisicajonejawa, caeliwaisi wajanajuaxainaenexa. Wajanaliwaisicajoneliwaisibeje meta maxua tsaneje: 29 ¡Najumecapanepaeya panejumaitsimëre itsa xamë apopaneto-exanaejitsiamë pibisiacuene paxanëjawaberena, tsipaji paxanë-ata apopacato-exanaetsi pibisiacuene! Apopacajamatabë-itonotsitsi. Biji rajane, paxanë pexaniacuene pacato-exanabiabatsi. Pexaniacuenia pacacopatatsinua patanewecuaponaenexamë. Jehová pecayajawaxae, xamë pexaniacuenia cayawenonabiaba —jaitsi Abimelec.
30 Nexata, Isaac bajarapacujinae pinijifiesta barë-exana. Barëxane. Barë-apanua pematawëjëa-apaejawanë. 31 Itsamatacabi, bajayacunua, bajarapamonae penamatacobicujinae, nexata jane baja, namata-enetsia najumeliwaisicajunuabeje. Pacuenia copiaya jinawanapa penaitoyacuenia, bajarapacuenia penasiwajamatabëtsitecaeyaniwa, pemomoxibejejawabelia-ata penaitoyatsaponaeyaniwa. Nexata, xuacujinae itsa baja naliwaisiwereta, Isaac napëjioba bajarapamonae pexaniacuenia. Bajarapamonae-ata pijinia napëjiobatsi pexaniacuenia. 32 Bajarapamatacabita, Isaac amoneya petonacuenebiwitsi wajunucaparenatsi mera pecaxitajarabijawa pecuejawata, pamonae cuewanapa meramëthë itsajawayota. Nexata jumaitsi:
—Mera pacaxitajarabajë patacuejawata —jai.
33 Bajaraxuata, Isaac bajarapameramëthë wënëruba Seba.d Bajaraxuatanua, patomara eca imoxoyojawata, wënëruba Beerseba. Mapamatacabijawa-ata abaxë wënëtsiteca bajarapatomara.
34 Itsa baja Esaú xaina cuarenta pawaibeje nacojioba. Pita pijawanexa Judit-wënëwa, pexënatoyo Beerí heteowirianë. Itsawa xuacujinae pita. Pewënë Basemat, Elón pexënatoyo. Bajaraponë-ata heteowirianë. 35 Nexata, bajarapapetiriwabeje Isaac, Rebecabeje, bitso siwajamatabëcuenebëjaibeje itsawiriawaxaebeje.