Isaac pexënatobeje yapëtaeya-exana Dioso pexaniacuenia peyawenonaenexatsibeje
27
Pamatacabijawa Isaac itsa baja perujunë, bitso baja itaxutotsëcëna, apotae-ata baja. Nexata, itsamatacabi junata pexënato matapijinë Esaú. Jumaitsi:—Taxënato —jai.
—¡Axa, nejumaitsimëre xua namatawenoname! —jai Esaú.
2 —Yapëtaneme rabaja perujunëjawanë bitso. Imoxoyo tawajënae tatëpaejawanexa. Apoyapëtaenë pacujinae tëpaejitsianë. 3 Nexata, tatëpaewajënaeya jitsipajë neponaejawa unuabelia, tanetojaitsinexamë itsacuenenëyo unupijidujuainë taxaenexa. ¡Nexata, pire nijabitsabi, nijaxuata yajawa, neponaenexa! 4 Itsa capatsianame itsacuenenë unupijidujuainëyo, netosetsianame pexaniapexaejawa taxaenexa, pacuenia bitso xanë janijitsipabiabajë. Nesetsicujinae, netocapatsianame maberenaje taxaenexa. Bajaraxuacujinae, cayapëtaeya-exanaenatsia tatëpaewajënaeya pexaniacuenia Dioso pecayawenonaejawanexa —jai Isaac.
5 Nexata, bajarapaepatota Rebeca jumetaenuca xua jumaitsi Isaac pexënato Esaújawabelia. Itsa baja nexata, Esaú pona petonarujuaitsinë paxa unuabelia, 6 nexata Rebeca jumaitsi, Esaú pecowëta, pexënato Jacob juyapijinëjawabelia:
—¡Nejumetaema xaniawaetsia! Xanë raja jumetaniji axa pebarëcuaicuaijawa nematapijinë Esaújawabelia pejumaitsijawa: 7 «¡Unuabelia netojaire itsacuenenëyo unupijidujuainë, taneto-exanaenexamë pexaniapexaejawa jamatejema taxaenexa! Bajaraxuacujinae, cayapëtaeya-exanaenatsi tatëpaewajënaeya Jehová pexaniacuenia pecayawenonaejawanexa», jai raja axa —jai Rebeca Jacob-jawabelia—. 8 ¡Nexata, aeconoxaeta nejumecowënëre xua ca-itorobianatsi! 9 ¡Ponare baja wecae, itsajotalia wajadajubibitsaëto nubena! ¡Anijanëyobeje netocarenamëre pejana cabranëyobeje, penasitsinëyobeje! Cato-exanaenatsi pexaniacuenia pesetsijawa, pacuenia axa janijitsipabiaba. 10 Nexata, xamë tocaliamë tsane pexaenexa axa, pecayapëtaeya-exanaenexa pexaniacuenia petëpaewajënaeya Dioso pecayawenonaejawa —jai Rebeca Jacob-jawabelia.
11 Nexata, Jacob penajawabelia jumaitsi:
—Tamatapijinë baitsi jane peperabëna̱juwinë. Xanë apoperabëna̱juwinë. 12 Paepatota taxa nejayatsiparena neyapëtaejitsipa. Bajaraponë netaejitsipa apotayaiyataejawa. Nexata, xanë xua jitsipajë taneyapëtaeya-exanaenexa, pexaniacuene tacanacopatsinexa, caranata neyapëtaeya-exanaejitsipa pibisiacuenia tanetocopiapatsijawanexa —jai Jacob.
13 Itsiata, Rebeca jumecanawiata pexënato Jacob mapacueniaje:
—Taxënatonëyo, bajarapapibisiacuene xua cayapëtaeya-exanaejitsipa pecatocopiapatsinexa, xanë netsijumajopaena. ¡Xua cajumaitsitsi, nejumecowënëre! ¡Netopiremelia bajaraponëyobeje! —jai.
14 Nexata, Jacob lia, petopitsinexa anijacabranëyobeje, petocarenanexa pena. Nexata, pena tosetatsi pexaniapexaejawa, pacuenia paxa Isaac bitso janijitsipabiaba. 15 Bajaraxuacujinae, Rebeca tojuta Jacob-nexa pexënato Esaú penaxatatsiyajuwënëjawa, pexaniawirianaxatatsi, xua toxaniawaetabuata pijabota. Nexata, Rebeca xatata pexënato Jacob, Esaú pejuyapijinë. 16 Bajaraxuacujinae, maxëxatatatsi cabrabocotomi. Wësixatatatsinua itsaxuayo apona̱juwi. 17 Nexata, Rebeca tsicoberuta petosetsijawa. Rajutanua pan peto-exanaejawa, Jacob petocaponaenexa paxa.
18 Nexata jane baja, Jacob calia. Cajoneya itsaxuayolia paxa Isaac boca, jumaitsi:
—¿Jica, axa? —jai Jacob.
Nexata, Isaac jumecanawiata:
—Marajota bocajëje. ¿Detsa ponëmë xamë taxënatomë? —jai Isaac.
19 —Xanë raja Esaúnë, nexënato matapijinënë. Cato-exanatsi rabaja pacuenia nejumaitsimë. ¡Pexaniacuene ne-exanare! ¡Namatacore jane baja! ¡Ecare majotaje nexaenexa tacatobeyaxuabinëwito, bajaraxuacujinae taneyapëtaeya-exanaenexamë pexaniacuenia Dioso taneyawenonaejawanexa! —jai Jacob.
20 Nexata, icatsia jumaitsi Isaac pexënatojawabelia:
—Taxënato, ¿depacuenia caxitajarabatabame bepijiayorë? —jai.
Jacob pejumecanawiatsijawata jumaitsi:
—Jehová nijaDioso raja nerajuta, bepijiayo tacaxitajarabatabinexa —jai.
21 Nexata, Isaac jumaitsi Jacob-jawabelia:
—¡Weberenayo natixire tacajayatsinexa, itsa pepacuene taxënato Esaúmë, itsa jume, itsa apotaxënato Esaúmë tacayapëtaenexa! —jai Isaac.
22 Nexata, Jacob jejai. Cujilia paxa pejayatsinexatsi.
Nexata, Isaac jumaitsi:
—Itsiata baitsi jane, jumejëpame Jacob, juya baitsi jane nemaxë camaxëEsaúba —jai. 23 Bajarapacuenia nexata Isaac apoyapëtae Jacob peyamaxë-itojorobijawatsi, tsipaji bitso maxëna̱juwa pacuenia maxëna̱tsicujai Esaú. Isaac jane baja itsa yapëtaeya-exanaejitsia pexaniacuenia Dioso peyawenonaejawanexatsi, 24 icatsia yanijoba Jacob-jawabelia:
—¿Pepacuene taxënato Esaúmë? —jai.
—Jãjã, xanë rabaja Esaúnë —jai Jacob.
25 Nexata, jumaitsi Isaac:
—¡Natixiremena weberenayo! ¡Bajarajane netocajure taxaenexa ponëwito netocapatame nebeyaxuabinë! Nexata, xuacujinae cayapëtaeya-exanaenatsi pexaniacuenia Dioso pecayawenonaejawanexa —jai Isaac.
Jacob cujilia paxa perajutsinexa pexaejawa. Pematawëjëa-apaeranua toya-eta. Isaac baja itsa xane, itsa baja apanua pematawëjëa-apaera, 26 bajaraxuacujinae jumaitsi:
—¡Nimoxoyoremena, taxënato! ¡Nitabaratsutsunere! —jai.
27 Nexata, Jacob cujilia pitabaratsutsuninexa. Isaac bajarapaepatota juma-esetuxune pitabaratsutsunijawata Jacob. Nexata, Isaac yapëtaeya-exana pexënato pacuenia Dioso yawenonaejitsiatsi pexaniacuenia. Jumaitsi mapacueniaje:
—Mara taxënato tuxu-itsije pacuenia tuxu-itsi wayafopijicuene, Jehová pejamatabëcueneta penaxaniabiwayafo pexaniacuenia. 28 Catojitsipatsi Dioso pecarajutsijawa pexania-emanë, daxita ne-ubijawanë pecatonaxaniababiabinexa mapa-irataje. Bajarapacuenia xainaename bitso ayaijawa trigo nexaejawanexa. Ayaijawanënua xainaename nematawëjëa-apaejawanë uvabarëmeneranë.
29 »Cayapëtaeya-exanatsinua itsanacuanëpijiwi yaiyataeya pecatonacuenebawanapaenexa amoneyacuenia. Yaiyataeya pematabacabëta catonubenabiabiana. Bajarapacuenia yanacua-ewetsianamenua nejuyapijiwi, ena pexi. Bajarapamonae nitabarata yaiyataeya catonubenabiabiana. Pamonae pijinia pibisiacuenia cato-exanaena, bajarapamonae pijinia pibisiacuenia natoyapëtaena Dioso pejamatabëcuene. Pamonae pijinia pexaniacuenia cato-exanaena, bajarapamonae pijinia natoyapëtaena pexaniacuenia Dioso pejamatabëcueneta —jai Isaac peyapëtaeya-exanaejawata xua Jacob canacopatsijitsia, matapijinëcuenia petaexaetsi.
30 Itsa baja Isaac najumewereta peyapëtaeya-exanaejawa Jacob pexaniacuenia Dioso peyawenonabiabijawanexatsi, a̱jena̱ Jacob pitsatabalia paxawecua, bajarapaepatota pijinia baja Esaú patanajetaruca penarujuaitsinë unuwerena.
31 Bajaraponë-ata Esaú nexata to-exana pexaniapexaejawa, ponëyo tocapata paxanexa. Bajaraxuacujinae, tocalia paxajawabelia. Jumaitsi:
—¡Namatacore, taxa! Xaename baja ponëwito catocaponatsi, bajaraxuacujinae, tanetsitajëtsinexamë xua papexaniacuene Dioso taneyawenonabiabijawanexa —jai.
32 Nexata, Isaac yanijoba:
—¿Detsa ponëmë xamë? —jai Isaac.
Esaú jumecanawiata:
—Xanë ra Esaúnë, nexënato matapijinënë —jai.
33 Isaac nexata jamatabëcuenenajunawiacaeya jumaitsi jumeneconeconaeya:
—¿Denexata bajaya ponë pijaponae penarujuaitsinë, ponë tanecatocapatabi baja taxaenexa? Xaniji rabaja tanetocapatsiwitojawa nepatsiwajënaeya. Rajutsiaya baja cuene-itajëtajë papexaniacuene Dioso peyawenonaejawanexatsi. Bajaraponë rabaja nexata canacopata aeconoxae —jai.
34 Itsa bajaraxua Esaú jumetane paxa pejumaitsijawa, bajaraponë bitso pinijijumeta aëjai ayaicuenia. Jumaitsi:
—¡Axa, xanë-ata taneyawenonaejawanexa netsitajëre tanecopiapatsijawanexa pexaniacuenia! —jai mapacueniaje.
35 Icatsia, Isaac jumaitsi:
—Nejuyapijinë rabaja parena. Bajaraponë neyamaxë-itojoroba. Nexata, bajaraponë bajarapapexaniacuene Dioso peyawenonabiabinexatsi rajutajë baja, xua picani carajutsiapaebatsi xamë —jaitsi.
36 —Bajaraxuata tsaena, bajaraponë wënërubatsi Jacob-wënëb —jai Esaú. Bajarama-anijatobeje bajarapacuenia newecuanaxainaeyaba taxainaejawaminexa. Copiaya newecuapita matapijinëjamatabëcuene. Icatsia baja, maxua aeconoxae picani netoxainame tanerajutsinexamëje, xua canacopatsijitsianë newënamuto pexaniacuenia Dioso taneyawenonaejawaminexa, bajaraxua icatsia newecuapita. ¿Xanënexa tsabaja ajibi pematatsënëa tanetsitajëtsinexamë pexaniacuenia tanetocopiapatabiabijawanexa? ¿Apoxaniawaetsimë cajena xanënexa? —jai.
37 Nexata, bajarajota Isaac jumecanawiata:
—¡Nejumetaema xaniawaetsia! Yapëtaeya-exanajë rabaja nejuyapijinë Jacob pecanamatacaitorobinënexa. Tonajumecopatajënua petonacuenebinënexatsi pijawiriawi, bajarapacuenia bitso pexainaenexa ayaijawa trigo pexaejawanexa, bajarapacuenia piapaejawanë uvabarëmeneranë-ata. ¿Denexata xanë xua taxënatomë yabara cayapëtaeya-exanaejitsipatsi pexaniacuene pecatocopiapatsijawanexa ajenaconoxaeta? —jai Isaac.
38 Nexata, Esaú icatsia jumaitsi:
—¿Ajibi tsabaja pematatsënëa itsajawa? ¡Xanë-ata neyapëtaeya-exanare itsajawa pexaniacuenia! —jai. Nexata, bajarajota icatsia, Esaú bitso aëaëjai ayaijumeta.
39 Nexata, Isaac cuene-itajëtsiaya jumaitsi Esaújawabelia:
—Xamë ponaponaename tajë mapapexania-irawecuaje. Itsajota ema aporunabiabi. Itsajota pe-ubijawanë aponaxaniababiabi-ata. Bajarapitsinacuata ponaponaename. 40 Xamë nexata saya nenawajabitsaëtsicuenia neponaponaenë tsane. Xamë raja netonacuenebaponaponaenë tsane nejuyapijinë. Itsiata baitsi jane, xamë itsa ajamatabëcuenesaëmë tsane, bajarapajamatabëcuene cayawenonaena newecuapitsapaenexa nejuyapijinë pecanamatacaitorobijawa —jai Isaac pexaniacuenia pecuene-itajëtsijawata.
Jacob wecuanajetabijirawa Esaú
41 Nexata, bajarapamatacabi Esaú itoya tsaponaponae pejuyapijinë Jacob, xua cuene-itajëtatsi paxa pexaniacuenia Dioso peyawenonaejawanexatsi. Nexata, bajaraponë najamatabëxaina bajaraxua yabara mapacueniaje: «Itsa baja pataxabeje panewecuatëpaena, mapamatacabijawa nexata xanë tajuyapijinë beyaxuabianajë», jamatabëjai.
42 Nexata, itsa Rebeca jamatabëcueneyapëtane xua najamatabëxaina Esaú pexanaenexa Jacob-jawabelia, bajarapaepatota itoroba petojunatsinexatsi Jacob. Rebeca jumaitsi:
—Nejumecowënëtsianame xua cajumaitsitsi. Nematapijinë Esaú raja najamatabëcuenebarëyaya-exanaponapona pecabeyaxuabinexa. 43 ¡Nejumetaema taxënato! ¡Ponare Harán nacuayabelia,c itsajotalia tamatapijinë Labán ponapona! Bajaraponë pijabota ponaponaename Harán nacuatalia. 44-45 Bajarajotalia, bajayajebi ponaponaename axuyo Labán pijabota, nematapijinë pejamatabëcaewijawabelia pianaepanaejawa, daxitaxua xamë exaname pejamatabëwerewerecaejawabelia, tsipaji xanë apojitsipaenë caematacabita panenajuatëpaejawabeje. Nexata, xuacujinae catonajumexuabianatsi nenawiatsinexarena icatsia —jai.
46 Nexata, xuacujinae jumaitsi Rebeca Jacob-jawabelia:
—Bitso rabaja xanë jamatabëcueranajë Esaú pijawabejejawabelia heteowiriawabeje. Itsa Jacob nacojiobijitsipanua heteopijipetiriwajawabelia, nexata xanë aponetoxanepanae taponaponaenexa bajayajebi. Netoxanepanaejitsipa bepijiayo juya tatëpaenexa —jai pamonajawabelia.