28
Isaac icatsia junata Jacob pexaniacuenia pecuene-itajëtsinexa Dioso peyawenonaejawanexatsi, namuto pexanaewajënaeya. Junatatsinua pemuxujiobinexatsi pepitsiyaniwa Canaán nacuapijipetiriawiyajuwënëwa. Nexata, jumaitsitsi mapacueniaje:—¡Pëtsa pitame mapanacuapijipetiriwa! 2 ¡Ponare Padan-aram nacuayabelia itsajotalia amo Betuel ponapona! Bajaraponë pijabota ponaponaename. Napitsianame bajarajotalia axuyo Labán pexënatoyoyajuwënëwa, ena pematapijinë. 3 Dioso daxitawecua piacuenesaënë pexaniacuenia cayawenonaena. Nexata, xainaename bitso ayaibitsaëto nemomoxi, peyacaëjëpaenexa itsanacuanëjawa nawitsia xamëjawawerena pepitsapaewi. 4 Bajarapacuenia pacanacopatsianame xamë, nemomoxi-ata xua Dioso amo Abraham-pijinë najumecapanepaeya pexaniacuenia yawenonaeyapaebatsi, pa-ira-ata rajutsiapaebatsi itsajota ajenaconoxaeta jinawanapatsi wajanapatsiwicuenia —jai.
5 Nexata, bajarapacuenia Isaac itoroba pexënato peponaenexa Padan-aram nacuajawabelia, itsajota ponapona pena Rebeca pematapijinë Labán, Betuel pexënato, arameowirianë.
Esaú nacojioba paxuanë Ismael pexënatoyojawabelia
6-8 Esaú tane pacuenia Isaac pecuene-itajëtsijawata pexaniacuenia Dioso peyawenonaejawanexatsi Jacob. Tanenua pitorobijawatsi Padan-aram nacuayabelia, penacojiobinexa bajarajotalia. Jumetanenua pitawetsijawa penacojiobiyaniwa Canaán nacuapijipetiriawijawabelia. Tanenua Jacob peponaejawa Padan-aram nacuayabelia, pacuenia paxa jumaitsitsi, penabeje. Bajaraxua petaejawata, Esaú jamatabëcueneyapëtane apopeto-itaxanepanaejawatsi pijawabeje Canaán nacuapijiwabeje. 9 Esaú nexata pona petaenexa paxuanë Ismael, Abraham pexënato. Bajarajota-ata, icatsia pita itsawa pijawanexa, Mahalat Ismael pexënatoyo, pejuyapijiwa Nebaiot. Copiaya papetiriawi nota Canaán nacuapijiwabeje-ata yajawaponapona.
Dioso tsitanaitajëtatsi Jacob Betel-jawata
10 Jacob baja itsa pitsapa Beerseba nacuawecua, nexata pona panamuto ruca Harán nacuayabelia. 11 Bajaraponë itsa patajopa itsanacuayojawata, nexata bajarajota majitajopa, tsipaji baja bitso caniwiyo tsanajetarucae. Nexata, bajaraponë iboto pita, bajarajota pebobenaeyajuwënë-iboto, pemajitanucaenë penamatabëxëyaëtanucaenexa. 12 Bajarajota, bajaraponë amajitsinae tsanucae. Tane majitsinaebota escaleraxaneto, piupipatsijawa irabetsica, athëbëabetsia-ata. Tanenua bajarapa-escalerajawatsica Dioso pija-ángelewi perunaejawatsica, icatsia pejunaejawatsia-ata. 13 Bajarapa-escaleramatatujawatatsia, tane Dioso penucaejawa. Bajarawetsica jumetane pejumaitsijawatsi Dioso:
—Xanë raja Jehovánë. Amo Abraham, axa Isaac-ata, PijaDiosonë tsaponaponae. Pa-irajawata majitanucame, carajutsianatsi xamë, nemomoxijawabelia-ata. 14 Bajarapamonae bitso ayaibitsaëto tsane, pacuenia itsi atsapërë. Nacayajatsiaya jinawanapaena matatoyorotsia, pa-iranë bobena pemutuabereca, waëyabetsia, nortenenia, sur-nenia-ata.a Nexata, xamë, nemomoxiyajuwënënë-ata pejamatabëcueneb natoyapëtaena pexaniacuenia tayawenonaejawa daxitanacuapijiwi. 15 Xanë raja cayajawa tsanetsi. Ca-ewetsianatsi pexaniacuenia itsabelia ponaponaename. Icatsianua, cacanawiatsianatsi mapanacuayaberenaje. Apocacopatsi tsanetsi cato-exanaenejewatsi pacuenia xanë cajumaitsitsi najumecapanepaeya —jai Jehová Jacob-jawabelia majitsinaebota.
16 Itsa Jacob nexata bajarapaepatota naëcotaxuaba, jumaitsi: «¡Cuaë! Matsaena jotaje pepacuene Tajatuxanenë peponaponaetusato. Xanë apoyapëtaenë», jai. 17 Nexata, bajaraponë bitso junawa. Bajarapaepatota, jamatabë-itsi: «Matsaena jotaje saicaya Dioso pijabo itsajawawecua, athëbëabetsia pepatsibaupanexa Dioso pijanacuayabetsia», jamatabëjai bajaraponë.
18 Itsa baja matacabi, bitso pepobajayacunua, Jacob namatacota. Nexata, pita pa-iboto namatabëxëyaëtanuca. Bajarapa-iboto matacotanuta penajamatabënapitabiabinexa Dioso pebarëcuaicuaijaitaxunaetsi. Xuacujinae, bajarapa-iboto tsimata-epanaxuaba aceiterata Dioso pewënëta.c 19 Nexata, bajarapataxunae wënëruba Betel. Copiayami picani pe-ecaetomarayomi bajarajota pewënë Luz. Jacob xuacujinae wënëruba Betel.d
20-21 Nexata, bajarajota Jacob najumecapanepaeya jumaitsi Diosojawabelia mapacueniaje:
—Itsa pepacuene xamë Diosomë neyajawamë tsane, itsa ne-ewetsianamenua mapanamuto tanajetarucaejawataje, itsa nerajutsianamenua taxaejawa taxaenexa, tanaxatatsijawa tanaxatatsinexa, itsanua nawiatsianajë xaniawaetsia taxa pijaboyabelia, nexata Jehovámë tajaDiosomë tsane. 22 Nexata, mapa-ibotoje matacotanutajë. Bajarapa-iboto itajëtanucaena Diosomë nijabocuene, tanajamatabënapitabiabinexa wajanajumeliwaisicajonejawabeje ajena. Daxitaxuanë nerajutame, xamënexa pijinia catotsatanajetarucaenatsi caejawayo diez xuayomibejeyajuwënëjawamie tacarajutsinexa —jai Jacob.