Jacob patajopa Harán nacuata
29
Jacob nexata najetaruca panamuto ruca pemutuabereca. 2 Bajaraponë bajaraxuayoreca itsa najetaruca, tane meramëthë pe-ecaejawa Harán tomara imoxoyojawata. Bajarapameramëthëjawata, ibotoxaneto wëpa-acatabuata. Bajarapameramëthë imoxoyojawata, tane acueyabi padajubibitsaëtobeje oveja pewetawanapaewi pebobobenaejawa. Oveja pewetsiwi nacuera-eweta pija-oveja yajawa bajarapameramëthëjawata, piabatsinexa pepuapatsi itsamonae oveja pewetsiwi pija-ovejabitsaëtoxi yajawa. 3 Paepatota matapania itsa nacaetuata daxita pamonae oveja pewetsiwi pija-ovejabitsaëtonë yajawa mera perajutsinexa, matapania bajarapamonae iboto nacobenawëpatixitabiaba bajarapameramëthë. Perajutsicujinae mera pija-oveja, xuacujinae, icatsia mëthë-acatabiaba. 4 Jacob nexata yanijoba oveja pewetsiwijawabelia. Jumaitsi:—¿Detsa werena paxamë paneponaewi, tajamonae? —jai.
Nexata, bajarapamonae jumaitsi:
—Paxanë raja Harán-jawawerena pataponaewi —jai.
5 Icatsia, Jacob yanijoba:
—¿Payapëtaneme Labán, pemomo Nacor? —jai bajaraponë.
—Jãjã, payapëtaniji —jai bajarapamonae.
6 —¿Jamatejema ponapona? —jai icatsia Jacob.
—Jãjã, jamatejema ponapona —jai. Nexata, bajarapamonae oveja pewetsiwi jumaitsi:
—Taema! Marawerena najetarucaje Raquel, pija-oveja yajawa, Labán pexënatoyo —jai bajarapamonae.
7 Jacob nexata jumaitsi:
—Abaxë bitso ayaimatacabi. Tajë juameto ruca paneyabaupaxatatsinexa panija-oveja. ¿Dexuajitsia nexata bepijiayo apoparajutsimë mera panija-oveja, icatsia abaxë panecaponaenexa petusatojawabelia, po̱na pexaenexa panija-oveja? —jai.
8 Nexata, bajarapamonae jumecanawiatatsi:
—Apoxanepanae pata-exanaejawa bajarapacuenia. Panamatawenonajë itsamonae pata-ewetsijawa, daxita oveja patanajua-ewetsiwi patanacaetuatsinexa, jamatejema patawecuatixitsinexa meramëthë pewëpa-acatsi-iboto. Bajaraxuacujinae, pataja-oveja mera parajutabiabajë piapaenexa —jai oveja pewetsiwi.
9 Paepatota abaxë Jacob barëcuaicuaijai tsanucae bajarapamonae, Raquel bajarapaepatota capatanajetaruca paxa pija-oveja peto-ewetsiwi. 10 Nexata, Jacob itsa tane Raquel oveja pecapatanajetarucaejawa, paxuyo Labán pijawi, bajaraponë iboto wewëpatixitaxuaba meramëthë. Torajutanua mera Raquel pija-oveja. 11 Bajaraxuacujinae, bajaraponë bajacoba itabaratsutsuniaya. Jacob bajarajota ayaijumeta itaxutuanua Raquel. 12 Jacob nexata nawajunupaeba Raquel-jawabelia pexënatocuene Rebeca. Labán piopaxacuene naitajëta. Bajaraxua itsa jumetane, Raquel nexata cujinaelia petsipaebinexa paxa.
13 Labán bajaraxua itsa jumetane Jacob yabara, pejuyapijiwa pexënatocuene, bajaraponë cujinaelia pecopiapitsinexa. Itsa baja Labán palia Jacob-jawabelia, wëtaicarucapona. Bajacoba itabaratsutsuniaya. Bajaraxuacujinae, carena pijabojawaberena. Nexata, Jacob itsa pata paxuyo pijabota, nawajunupaeba pijamonae yabara, pacuenia bajaraponë exana, pacuenianua tocopiapatatsi namuto-epatua.
14 Nexata, Labán jumaitsi:
—Pepacuene tsaena cajena xamë tajamonaenëmë —jai.
Jacob nexata nacopata paxuyo Labán pijabojawata.
Jacob tonacueneba paxuyo Labán pepitsinexa Raquel, Leabeje, pijawabejenexa
15 Paxuyo pijabota caejuameto peponaponaecujinae, Labán jumaitsi Jacob-jawabelia:
—Xanë apojitsipaenë tanetonacuenebijawamë amoneya, saya tajamonaenëxaemë yabara. ¡Nejumaitsimëre pacuenia jitsipame tacamatamotsijawa! —jai.
16 Bajarapamatacabijawa Labán xaina anijawabeje pexënatoyobeje. Matapijiwa pewënë Lea. Juyapijiwa pijinia pewënë Raquel. 17 Nexata, Lea bitso pexania-itaxutoyobeje xaina. Raquel pijinia bitso daxitawa pexaniawa. 18 Bajarapacujinaeta, Jacob jitsipaponapona Raquel. Nexata, Jacob jumaitsi:
—Raquel yabara, nexënatoyo juyapijiwa, catonacuenebianatsia siete pawaibeje xamënexa —jai.
19 Nexata, Labán jumecanawiata:
—Xanepana tacarajutsijawa xamë, tarajutsijawaminexa itsanë apotayapëtaenë. Nexata, xanëjawata nacopatsianame neponaponaenexa —jai Labán.
20 Nexata, Jacob nacueneba siete pawaibeje Raquel yabara. Bajaraponë tsitacae-epatoyotsi saya bajarapawairenabeje, tsipaji bitso asiwa Raquel. 21 Nexata, itsa baja panepanajetaruca siete pawaibeje petonacuenebijawa Labán, Jacob nexata jumaitsi itsamatacabi paxuyo Labán-jawabelia:
—¡Nerajure baja tapitsinexa Raquel tajawanexa, tsipaji baja weretajë xua catocaëjëtatsi tacatonacuenebinexa bajarapowamatamo! —jai Jacob.
22 Nexata, xuacujinae Labán junata daxita penajua-enaewi penacojiobifiesta peto-exanaenexa bajarapajiwibeje. 23 Itsiata baitsi jane, pamerawi napitsijitsiabeje picani, bajarapamerawi Labán juya comacapita matapijiwa Lea perajutsinexa Jacob. Nexata, Jacob yajawamajita bajarapowa. 24 Bajarapacujinae, Labán rajuta pexënatoyo amoneya petonacuenebiwanexatsi Zilpawënëwa, peto-ewetabiabiwanexatsi pijabo. 25 Itsamatacabijawabelia, bajayacunua, Jacob yapëtane peyajawamajitsijawa Lea.b Nexata, xuacujinae bajaraponë yanijoba paxuyo Labán-jawabelia. Jumaitsi:
—Axu, ¿Detsa xuajitsia maxua neto-exanameje? Xanë raja catonacuenebatsi Raquel yabara. ¿Detsa xuajitsia neyamaxë-itojorobame? —jai.
26 Labán nexata jumecanawiata:
—Paxanë raja apopatajacuene majotaje copiaya penacojiobijawa juyapijiwa. Copiaya raja banacojioba matapijiwa, xuacujinae juyapijiwa —jai.
Nexata, icatsia jumaitsi Labán:
27 —¡Abaxë wepawererebeje panijafiestabejec mapasemanaje! Nexata, xuacujinae carajutsianatsi Raquel nijawanexa,d itsa baitsi jane netonacuenebianame itsasiete pawaibeje orijibia —jai Labán.
28 Jacob bajaraxua jejai. Itsa baja weretabeje caesemana pexanaejawa pijafiesta Leabeje, Labán baja icatsia rajuta Jacob pijawanexa Raquel. 29 Labán rajuta pexënatoyo Raquel amoneya petonacuenebiwanexatsi Bilhawënëwa, bajarapowa peto-ewetabiabiwanexatsi pijabo. 30 Jacob nexata bajarapowa barëmajita Raquel. Tonacuenebanua Labán-nexa siete pawaibeje icatsia pematatsënëa. Bajarapowa bitso asiwa Lea matatoxenetsia.
Jacob pexi pexainaejawa, yabara peliwaisi
31 Itsa Jehová tane Jacob bewelia penaëcotsijawa Lea, nexata tocopata pexainaenexa pexi. Jane baitsi Raquel apotocopatsitsi Dioso pexi pexainaenexa. Mawecowacuenia ponapona. 32 Lea nexata baja, nacoxitaponapona. Bajaraxuacujinae, itajëta pebinëyo. Bajaraponëyo wënëruba Rubén, tsipaji bajaraponëyo yabara jumaitsi: «Jehová netane najamatabëxainaeya taponaponaejawa, nexata nerajuta maponëyoje. Nexata, ajenaconoxaeta tamona bitso niasiwa tsane taxënato pejamatabëcueneta», jai.
33 Bajaraxuacujinae, icatsia Lea itsanëyo xaina. Bajaraponëyo wënëruba Simeón, tsipaji bajaraponëyo yabara jumaitsi: «Jehová newënëtane bijiaya tanenaëcotsijawa, bajaraxuata nerajuta itsanëyo pematatsënëa», jai.
34 Icatsia, xuacujinae itsanacuetonëyo xaina. Bajaraponëyo wënëruba Leví, tsipaji bajaraponëyo yabara jumaitsi: «Nexata, ajenaconoxae pamatacabi, tamona bitso neyajawaponaponaena,e tsipaji baja rajutajë acueyabi panacuetobeje», jai.
35 Nexata, Lea icatsia itsajiwiyo xaina. Bajaraponëyo wënëruba Judá, tsipaji bajaraponëyo yabara jumaitsi: «Maponëyo pejamatabëcuenetaje pexaniajamatabëcuenia wënëxaniatsianajë Jehová», jai. Bajaraxuacujinae baja, apoxainae pexi.