30
Itsa Raquel nayapëtane apopexainaejawa pexi Jacob-jawabelia, nexata jamatabëcueneca-ëbiaya tane pematapijiwa Lea. Nexata, Raquel jumaitsi pamonajawabelia:—¡Xanë-ata nerajure taxijiwiyo, tsipaji itsa xanë aponebarëxainaemë tsane taxijiwiyo, xanë tëpaenajë ta-aurajamatabëcuenecobexae! —jai.
2 Nexata, Jacob anaeya jumaitsi:
—¿Xanë tsaja nexata Diosonë? Dioso raja pejamatabëcuene apoxainaemë nexi —jai.
3 Nexata, xuacujinae icatsia Raquel jumaitsi:
—!Nejumetaema xaniawaetsia! Mapacuenia belia xainaejitsipajëje taxi xamëjawabelia. Mapowaje, Bilha, pitsianame amoneya tanetonacuenebabiabiwa. Bajarapowa pitaponaponaename. Nexata, bajarapowa itsa catoxainaena nexijiwiyo, nexata betaxijiwiyocueniaa xanë xainaenajë. Belia, bajarapacuenia taxi xainaejitsipajë —jai Raquel bepexijiwiyocuenia petaenexa. Nexata, Jacob jejai.
4 Nexata, Raquel rajuta Bilha, amoneya petonacuenebabiabiwatsi, Jacob petaenexa bepijawacuenia.b Jacob nexata yajawamajita bajarapowa. 5 Nexata, Bilha nacoxita. Pebinëyo wecuanaexanatsi.
6 Nexata, bajaraponëyo yabara Raquel jumaitsi: «Maponëyoje wënërubianatsi Dan, tsipaji Dioso nejumetane tawajëtsijawa. Nexata, pexaniacuenia neto-exana tanerajutsijawata taxënato», jai.
7 Bilha icatsia nacoxita itsajiwiyo. Itsapebinëyo wecuanaexanatsi. 8 Nexata, bajaraponëyo yabara Raquel jumaitsi: «Bajayajebi tamatapijiwabeje panacuene-ëjëbajëbeje. Matapania maponëyota baja jamatabëcuene-amoneyabajë, bajaraxuata maponëyoje wënërubianatsi Neftalí», jai.
9 Nexata, Lea itsa baja nayapëtane apopexainaejawanexa pexi Jacob-jawabelia, nexata comacapitaba amoneya petonacuenebiwatsi Zilpa. Rajuta Jacob pijawacuenia pexainaenexa. 10 Itsa baja Jacob yajawaponapona, Zilpa nexata toxaina pexijiwiyo.
11 Nexata, Lea bajaraponëyo yabara jumaitsi: «Yacueniaxanepanatsibeje. Nexata, bajarapanacuetonëyo wënërubianatsibeje Gad», jai.
12 Xuacujinae, icatsia Zilpa toxaina Jacob itsanëyo. 13 Nexata, Lea icatsia bajaraponëyo yabara jumaitsi: «Bitso barëyanë, tsipaji tawënapetiriawi nesiwajamatabëjumaitsi tsane: ‘Dioso pexaniacuenia peyawenonaewatsi,’ nesiwajamatabëjai tsane. Bajaraxuata, bajaraponëyo wënërubianatsi Aser», jai.
14 Nexata, itsamatacabi trigo penotsimatacabijawa, Lea pexënato Rubén pabiabelia peponaenë caxitajaraba mandrágoracuai. Nexata, pena tocaparena. Raquel itsa cobetane bajarapacuai petocapatsijawatsi pexënato, bajarapowa jumaitsi pematapijiwajawabelia:
—¡Pexaniacuene ne-exanare! ¡Nenarajure mandrágorayajuwënëcuai, pacuai catocaparena nexënato Rubén! —jai Raquel.
15 Nexata, Lea jumaitsi:
—Xamë imoxoyo taneyacajërëtsimë tamona. ¿Baja maje icatsia jitsipame taneyacajërëtsijawamë taxënato tanetocapatsicuairena? —jai Lea Raquel-jawabelia.
Nexata, Raquel jumaitsi:
—Bajarapacuaito pejamatabëcuene ajena pamerawi Jacob cayajawamajitsiana —jai Raquel.
16 Itsa baja merawiyo Jacob patanajetaruca wayafowerena penacuenebinë. Nexata, Lea mata-enenalia pejumaitsinexa:
—Ajena raja xanë neyajawamajitsianame, tsipaji rabaja Raquel-jawabelia matamotajë cacomuatsiaya mandrágoracuaitota cae-epatoyocuenia xamë tanenacowaetsia-exanaenexa —jai Lea.
Nexata, bajarapamerawi Jacob yajawamajita pijawa Lea. 17 Bajarapamerawi Dioso to-exana Lea pewajëcabiabicuenia. Nexata, tonacoxita cinconacueto. 18 Pewecuanaexanaecujinaetsi, Lea bajaraponëyo yabara, jumaitsi: «Dioso pexaniacuenia nerajuta taxainaenexa taxijiwiyo, icatsia amoneya tanetonacuenebiwa tarajutsixae tamonajawabelia. Bajaraxuata, mapanacuetonëyo wënërubianatsi Isacar», jai.
19 Bajaraxuacujinae, Lea icatsia toxaina itsajiwiyo, seis-jiwiyo. 20 Bajaraponëyo yabara, bajarapowa jumaitsi: «Dioso nerajuta amoneyanacuetoyo. Nexata, ajenaconoxaeta tamona bitso asiwaya netaena, tsipaji baja toxainajë seis pajiwiyobeje. Bajaraxuata, bajaraponëyo wënërubianatsi Zabulón», jai. 21 Bajaraxuacujinae baja, pecopiarucaejiwiyo toxaina petiriwayo. Bajarapowayo wënëruba Dina.
22 Nexata, bajarapamatacabijawa Dioso najamatabëcuenewereta peto-exanaenexa Raquel xua wajëcabiaba. Nexata, tocopata pexainaenexa pexijiwiyo. 23 Bajarapowa pexanaecujinae copiayapijinacuetoyo, bajaraponëyo yabara jumaitsi: «Dioso baja newecua-ajibia-exana ta-auratsabiabijamatabëcuenemi taxi apotaxainaejawa. 24 Orijibia, icatsia bitso jitsipajë tanetocopatsijawa itsajiwiyo taxainaenexa», jai. Bajaraxuata, bajaraponëyo wënëruba José.c
Jacob, paxuyo Labán-beje, nayamaxë-itojorobabeje
25 Itsa baja Raquel pewecuanaitajëtsicujinaetsi Josénexa, bajaraxuacujinae, itsamatacabijawabelia Jacob jumaitsi paxuyo Labán-jawabelia:
—Necopatsianame rabaja tanawiataponaenexalia tajamonae pija-irajawabelia. 26 Neyajawacopatsianame taxibitsaëtoyo, tajawabeje yajawa. Bajarapowabeje yabara, bajayajebi xanë catonacuenebaponaponatsi. Nexata baja, necopatsianame taponaenexa. Xamë yapëtaneme pacuenia xamënexa catonacuenebaponaponatsi —jai Jacob.
27 Itsiata baitsi jane, Labán jumaitsi:
—Xanë cawajëtsianatsi pexaniacuene. Abaxë nacopatsianame patacayajawajinawanapaenexa. Xanë raja yapëtaniji Jehová Dioso taneyawenonaponaejawa pexaniacuenia xamë nejamatabëcueneta. 28 ¡Nexata, nejumaitsimëre nenacuenebijamatabëcuene pacuenia jitsipame tacamatamotsinexa! Nexata, bajarapacuenia camatamotsianatsi —jai.
29 Nexata, Jacob jumaitsi:
—Xamë rabaja yapëtaneme tacatonacuenebijawa xamënexa pexaniacuenia, tacato-ewetsijawanua pexaniacuenia nijadajubi. 30 Abaxë tapatsiwajënaerena patsiquiribitsaëtoyowajëto xainame matatoxenetsia baja ajenaconoxae cato-ayaibitsaëtoxaneto tsanajetarucae, Jehová pexaniacuenia pecayawenonaexae xanë tajamatabëcuene. Nexata, ¿depacujinae tajataxuxuabi tsane tajacuata taxainaejawa taja-ovejaxi? Xanë-ata raja pijinia namatawenonajë taxainaenexa taja-ovejabitsaëtoyo tajacuata tanacoxi-ewetsinexa —jai.
31 Nexata, Labán jumaitsi:
—¿Depacuenia jitsipame tacamatamotsijawa? —jai.
Jacob icatsia jumecanawiata:
—¡Pëtsa nematamotame! Xanë saya abaxë icatsia ajena pamatacabijawaweliacujinae cato-ewetaponaponaenatsi nijadajubi, jane baitsi pijinia pacuenia xanë cajumaitsijitsiatsi itsa nejumejejamë tsane. 32 Nexata, ajena necopatsianame taponaenexa nijadajubibitsaëtotuatuajëajawa, tatsatsinexa ponëxi petsaebianëxi, bajarapacuenia penayaquibinëxi, bajarapacuenia ayai-itanetonë-ata pexainaenëanë. Bajarapitsi-itanenëxi tsatsianajë tapitsinexa ovejabitsaëtojawata, cabrabitsaëtojawata-atad tacatonacuenebijamatabëcuene. 33 Nexata, bajarapacuenia xamë yapëtaename apotacayamaxë-itojorobijawa. Pacujinae taenajetarucaename tajadajubijawa, nexata itsa nanucaena apopenayaquibinëyo, peniojainëyo-ata, piaitanejibinëyo-ata tajadajubibitsaëtotuatuajëta, nexata xamë yapëtaename tacatonacobetoxotabiabijawa —jai Jacob.
34 —Xanepana pacuenia xamë nejumaitsimë —jai Labán.
35 Nexata, bajarapamatacabi Labán itapetsiaya natotsatapona pija-ovejabitsaëtowecua, pijacabrabitsaëtowecua-ata daxita pamonae penayaquibinëxi, ayai-itanetonë pexainaenëanë. Bajarapacuenia pitanenioponaenëxi najëpaeya tsata, petsaebianëxi-ata. Nexata, bajarapatsatsidajubi wecuacapitsapa, Jacob pecanacopatsinexa caewiria color pexainaenëxi, petonacoxiwiatsiyaniwatsi penayaquibiwi Jacob peto-ewetsiwijawata. Nexata, petsatsiwi Labán pexi rajuta pecaponaenexa tajë Jacob-wecua. 36 Nexata, xuacujinae bajarapamonae pona acueyabi pamatacabibejecuenia Jacob peponaponaejawawecua, bajarabelia peto-ewetawanapaenexa paxa pijadajubi.
Bajarapacowëta Jacob nacopata peto-ewetaponaponaenexa paxuyo Labán pijadajubi. 37 Paxuyo pecowëta Jacob apocaecueneyo exanapona pacuenia topitsapaejitsiatsi pecunuabitsaëto penayaquibiwi. Nexata, maxërana ucubaba álamonae, almendranae, castañonaemaxëranaxi-ata, piasiamaxëranajawanë. Pemaxërana-ucubabecujinae, xuacujinae bajaraponaenë yërëbocotobita peyërëyaquijaicuenia pecopatsinexa. 38-39 Nexata, bajaraponaenë, peyërëbocotobitsinaenë, itsajota oveja mera apaeyabiaba, bajarajota bajaraponaenë rubabiaba merata. Nexata, paepatota dajubi naimoxoyoba mene-itapata, bajarapanaimoxoyobiwi itsa tane bajarapayërëyaquijainaenë pecowëcuenia pexi petopitsapaponaenexatsi. 40 Jacob nexata wecuatsatapona daxita pamonae naexanapona pitanebiwitsi pijadajubinexa. Jacob nexata bajarapacuenia taxuxuaba pexainaejawa pijawicuenia saicaya Labán peto-ewetsidajubiwecua. 41 Nexata, paepatota dajubi bitso pexaniawi, penasitsiwi, naimoxoyobabiaba penaquenetsiataenexa, bajarapaepatota Jacob naejawanë peyërëtobitsinaenë tsitarubabiaba merata. Bajarapanaejawaxi rubabiaba mera piapaejawata, dajubi petaenexa, bajarapacuenia pecowëcuenia penayaquibinëxi petopitsapaponaenexatsi. Nexata, bajarapacuenia ëpexanianëxi topitsapaponatsi pijadajubinexa. 42 Itsiata, pacujinae dajubi pibisianëanë, pejiopaenëxi imoxoyobijitsia penaquenetsiataenexa, bajarapacuenia apo-exanae. Nexata, Labán pijawinexa tonacopataponatsi ëpibisianëxi, pejiopaenëxi, itsanëxi bewelianëxi Labán pijanëxinexa. Jacob juya canacopatabiaba ëpexaniawie pijawinexa. 43 Bajarapacuenia Jacob naexana bitso pexainaenë. Xaina ayaibitsaëto oveja. Xainanua ayaibitsaëto jiwi amoneya petonacuenebiwitsi, petiriawi, pebijiwi-ata. Bajarapacuenia camello-ata ayaibitsaëto xaina. Burromonae-ata xaina ayaibitsaëto.