Génesis
Daxitacuene petaxuxuabiliwaisi
Pacuenia Dioso exana daxitacuene mapanacuataje, athëbëpijicuene yajawa, yabara peliwaisi
1
Dioso petaxuxuabimatacabi pexanaejawa mapanacuaje, exanaa itaboxo, ira yajawa. 2 Bajarajota, iracuene abaxë aponayapëtae xaniawaetsia. Abaxë saya ëmera daxitajawa. Aitaquirinua daxita nacua meramatatsënëwereca. Itsiata baitsi jane, Espíritu Santob nacueneweretsiaya ponapona mera matatsënëwereca.3 Nexata, Dioso jumaitsi:c
—¡Naexanare pitayotsicotia! —jai. Nexata, naexana pejumeta pitayotsicotia.
4 Itsa Dioso tane pitayotsicotia, tsitaxanepanatsi. Nexata, xuacujinae Dioso tsata pecotia pitaquirijawawecua. 5 Penaitayotsicotia wënëruba matacabi. Pitaquirijawa pijinia wënëruba merawi. Bajaraxua exanaewereta penamataxainaematacabita.
6 Icatsia, xuacujinae Dioso jumaitsi:
—Mera natsatsi. Itsamerayajuwënëjawa junaetsia athëbëabetsia, athëbëyo perubenaenexa. Nexata, nacopatsi petusato bajarapanatsatsimerajawabejetuatuajëalia —jai. Nexata, bajarapacuenia natsatabeje.
7 Dioso bajarapacuenia tsata petusatotuatuajëalia, perubenaenexa mera athëbëabetsia. Itsajawa nacopata petusatobëxëpanayo, irawetsia pe-enaemeranënexa. 8 Bajarapatusato wënëruba itaboxo. Bajaraxua exanaewereta cotocaewimatacabita.
9 Icatsia, bajaraxuacujinae Dioso jumaitsi:
—¡Itaboxobëxëpana pebocaemera panacaetuare caejawabelia! Bajarapameratuatuajëatsina pitsapaetsina petsewijawa —jai. Bajarapacuenia pejumaitsijawata naexana.
10 Bajaraxua pepitsapaejawatsina petsewijawa Dioso wënëruba ira. Pamera pijinia nacaetuata caejawabelia, bajaraxua wënëruba manuamene. Bajarapacuenia itsa Dioso nacobecowëtane, tsitaxanepanatsi.
11 Icatsia, xuacujinae Dioso jumaitsi:
—¡Pajuware daxitawiria irajumawereca pejuwijawanë, pexu pecapitsapaejawanë-ata, pecuai pecapitsapaejawanë-ata, bajarapacuenia daxitawirianaejawanë, daxitawiriabotonë, daxitawiria po̱na, pe-ubijawanënexa-ata! d Nexata, caewiria canacujitsia nacuaitsijitsia pijawiriacuenia saicaya —jai. Nexata, bajarapacuenia naexana.
12 Ira nexata capitsapa daxitawiria naejawanë daxitawiria pexu pecapitsapaejawanë, banacale-ata, bajarapacuenia daxitawiria po̱na, bajarapijinia pacuenia, daxitawiria naejawanë, pecuai pecapitsapaenaejawanë pijawiria canacujitsia. Dioso itsa nacobecowëtane, tsitaxanepanatsi. 13 Bajaraxua exanaewereta acueyabi matacabita.
14-15 Icatsia, Dioso jumaitsi:
—Naexanae pitayotsijawanë, penaitayotsinexa athëbëwetsica irajumabereca, xaniawaetsia penawecuanatsatsinexa matacabibeje, merawibeje, bajarapacuenianua penamata-ëjëtsixanepanaenexa wainë, penamata-ëjëtsinexa juametonë, matacabianë-ata, bajarapacuenia pecanaëjëtsinexa Dioso pitapetsimatacabianë-ata —jai. Nexata, bajarapacuenia naexana baja pitayotsijawanë.
16 Dioso exana anijapitayotsijuametobeje. Pinijicotia pitayotsijuameto tocopata pitayotsinexa matacabita, tsiquiripitayotsijuametoyo pijinia pitayotsinexa merawi. Yajawa-exana tulupucuene. 17 Dioso exanaruba bajarapa-itayotsijawanë athëbëtatsia pitayotsinexa irajumawereca. 18 Bajarapijinia pacuenia, matacabipijijuameto exana matacabita pitayotsinexa. Merawipijijuameto exana merawi pitayotsinexa. Bajarapacuenia exana xaniawaetsia pewecuatsatsinexa matacabipijicuene, merawipijicuenewecua-ata. Dioso itsa nacobecowëtane, tsitaxanepanatsi. 19 Bajaraxua exanaewereta cuatro matacabita.
20 Bajaraxuacujinae, Dioso jumaitsi:
—¡Nawitsia panaexanare daxitawiria menejawatae panejinawanapaewinexa, bajarapacuenia itaboxojawa pepunaewinexa-ata irajumawereca!f —jai.
21 Bajarapacuenia Dioso exana daxitacuenewiria menepijiwinexa, ayainëxanetonë-ata. Bajarapacuenia daxitawiria pepunaewi-ata exana Dioso. Tocopata caewiriawi canacujitsia penacoxiwiatsinexa saicaya pijawiriacuenia. Nexata, bajarapacuenia Dioso itsa nacobecowëtane, tsitaxanepanatsi.
22 Dioso pexaniacuenia cuenecaëjëpaeya-exanag bajarapamonae penacoxiwiatsinexa. Nexata jumaitsi:
—Panacoxiwiatsianame ayaijawa paneyacaëjëpaenexa daxitajawa, menepijiwi pewënëcaenexa daxitamenianëjawa, bajarapacuenia pepunaewi-ata daxitanacuanëjawa peyacaëjëpaenexa —jai Dioso, pexaniacuenia pecuenecaëjëpaeya-exanaejawata.
23 Bajaraxua exanaewereta cinco matacabita.
24-25 Icatsia, bajaraxuacujinae Dioso jumaitsi:
—¡Panaexanare irajumawerecah daxitawiriawi panejinawanapaewinexa, caewiria canacujitsia daxitawiria dajubi, bajarapacuenia daxitawiria unupijiwi, pamonae-ata pecotobëxëta penarobobocaewi irajumawereca! —jai. Bajarapacuenia naexana baja pijawiria canacujitsia. Dioso daxita bajarapamonae exana. Nexata, itsa nacobecowëtane, tsitaxanepanatsi.
26 Nexata, bajaraxuacujinae Diosoi najumaitsi: «Ajenaconoxae exanaenatsi jiwi.j Pacuenia waxaitsi jamatabëcuene-itsitsi, bajarapacuenia nacuenecataeya exanaenatsi,k bajarapajamatabëcuene pexainaenexa. Nexata, bajarapamonae daxita pejamatabëcuenematatoxenetsiwi tsane dujuai, pepunaewi, dajubi, daxita pamonae unupijiwi, pamonae-ata pecotobëxëta penarobobocaewi», najai.
27 Pacujinaeta Dioso exana pebi, petiriwa yajawa exanatsibeje najamatabëcuenejëpaeya.
28 Dioso pexaniacuenia cuenecaëjëpaeya-exanabeje pexi pexainaponaenexabeje. Bajaraxuata, jumaitsi:
—¡Paxainarebeje panexibeje, panemomoxibeje-ata ayaibitsaëto penaexanaponaenexa, peyacaëjëpaenexa daxitanacuajawa! Paxamëbeje, bajarapacuenia panemomoxi-ata, pewajënaeyabelia pa-ewetsianame, pajamatabëcuenematatoxenetsianamenua daxitawiria dujuai, pepunaewi-ata, daxitawiria pamonae irajumawereca pejinawanapaewi-ata —jai pexaniacuenia pecuenecaëjëpaeya-exanaejawatatsibeje.
29 Bajaraxuacujinae, Dioso jumaitsi:
—¡Panejumetaemabeje! Daxita pacatocopatsianatsibeje panexaenexabeje, bajarapacuenia panemomoxijawabelia-atabeje, pexu pecapitsapaebotonë, ponaenë-ata pijinia xaina pecuai. Daxita bajaraxua pacatoxanepanaena panexaewanapaenexa. 30 Pamonae pijinia ta-exanaewi pejinawanapaenexa irajumawereca, unupijiwi, pepunaewi-ata, daxita bajarapamonae rajutsianajë daxita irajumawereca xua pejuwijawanë, pacuenia po̱na, pemacanë pexaenexa —jai. Bajarapacuenia Dioso exana daxita pexanaecuene.
31 Bajaraxua pexanaeweretsicujinae, Dioso itsa nacobecowëtane, tsitaxanepanatsi bitso ayaicuenia. Daxita bajaraxua exanaewereta seis matacabita.