Jacob va en Egypte, la mort de Jacob et Joseph
(Audio de ce chapitre disponible dans Gagur gara Mútiliŋ
Sakob naŋar fiilool najow bu nꞌEsípt
46
Sakob ñeer naŋar wan abaj mee peepe najow. Nan átiiŋ mee Beer-Seba, násimen to bu nꞌAtúuha hara paayool Isaak. 2 Nu fuk faafu Atúuha náyauhenool. Nawoogool : « Sakob ! Sakob ! » Sakob nátuulool : « Oóo, ínje umee. » 3 Narogool : « Injé emmee Atúuha, Atúuha hara paayi. Jambil úsebi ejow bu nꞌEsípt. Mara bo nꞌEsípt nibil mee ekaan min búbajumi bumeeeŋ. 4 Injé be epooyi bu nꞌEsípt, ban ínje ibili dó gápurenul. Nan ubil mee ecet, Suseef abile gawalen gúcili. »5 Ñeer Sakob nápur Beer-Seba, guleehool ngújup paayiil, nꞌukoñaiil, nꞌguleehiil dó nꞌsisaret saasu san áyiih hara Esípt asen mee bu mara ejayiil. 6 Nguŋar sikooreiil son fubajiil peepe fan gubaj mee dó mꞌmof mara Kanaan. Ñeer Sakob nátiiŋ nꞌEsípt mꞌbúbajumool peepe : 7 guleehool gumaañen nꞌukoña, nꞌguleehiil gumaañen nꞌukoña. Sakob fiilool búroom fo naŋare nan ammee nejow bu nꞌEsípt.
8 Waawe ujow wara guleeh Sakob gan aŋar mee najow bu nꞌEsípt nꞌwara guleeh-guleehool. Aleeh Sakob átiyaara gajaool Ruben.
9 Ruben guleehool : Hanok, Palu, Heseron nꞌKarumi.
10 Simeon guleehool : Yemuel, Yamiin, Ohad, Yakiin, Sohaar, nꞌSauul. Sauul jaaool hara Kanaan.
11 Léwi guleehool : Gereson, Kehat mꞌMerari.
12 Suda guleehool : Seela, Peres nꞌSeraah, bare afogulofok bo Kanaan guleehool gútiyaara Eer bugo nꞌOnan. Peres nabaj guleeh gumaañen gúruba : Heseron nꞌHamuul.
13 Isakaar guleehool : Tola, Puwa, Yasuub nꞌSimiron.
14 Sabulon guleehool : Sered, Elon nꞌYahalel. 15 Ubuge gommee guleeh gumaañen, bugara Leya nꞌSakob, áliiniil gajaool Diina. Bugo búroomiil peepe goono gafaakan nꞌguñen nꞌgúfaajiir (33) gabaji mee nꞌgásilimb gara Aram.
16 Gaad guleehool : Sifion, Hagi, Suuni, Esebon, Eeri, Arodi nꞌAreeli.
17 Aseer guleehool : Yimina, Yisewa, Yisewi mꞌBeriya nꞌáliiniil Sera. Beriya nabaj guleeh gumaañen gúruba : Heber mꞌMalikiel. 18 Sakob, guleehool, nꞌguleeh guleehiil bugo nꞌSilipa, goono guñen gaat nu hanur (16). Silipa amiigeel han Laban akahen mee aleehool akoña han guroge mee Leya.
19 Raseel, akoña Sakob, guleehool gúruba : Suseef bugo mꞌBenseme. 20 Suseef guleeh gúruba nabaje nꞌakoñaool Asanaat mꞌmof mara Esípt ; Asanaat aleeh Potifera ammee ásimena hara ésuk yan guroge mee On. Bugo gommee Manaase nꞌEfurem.
21 Benseme guleehool goono guñen : Bela, Beker, Asebel, Gera, Naaman, Ehi, Roos, Huupim, Muupim nꞌAreed. 22 Sakob, guleehool, nꞌguleeh-guleehool bugo nꞌRaseel, goono guñen nꞌgubaagiir.
23 Daan aleehool Husim.
24 Nefutali guleehool : Yasesiel, Guni, Yesere nꞌSilem. 25 Sakob guleehool nꞌguleeh-guleehool bugo mꞌBiliha goono futok nꞌgúruba. Biliha amiigeel han Laban akahen mee aleehool akoña han guroge mee Raseel.
26 Ñeer Sakob nꞌguleehool nꞌguleeh-guleehool gajaalo mee bu nꞌEsípt, kankaan bugan gafaŋ gúfaajiir nꞌfutok nu hanur (66), ukoña guleehool gupinuti. 27 Néeni ubenen to guleeh Suseef gammee gúruba gan abaj mee nꞌEsípt, fiil Sakob fanogenulo mee Esípt, be étiiŋ bugan gafaŋ gúfaajiir nꞌguñen (70).
Sakob nátiiŋ nꞌEsípt
28 Bala gujow bu ban guñum mee bucin, Sakob naboñ Suda ajow tíro bu nꞌSuseef mimbil aliigool mof mara Goseen. 29 Suseef naŋar esarehool min ajow ngurehoor mꞌpaayool Sakob bo Goseen. Nan añow mee paayool, náñag aroopool nakuumool liŋ tiŋ min afaak mufuu reg. 30 Sakob narogool : « Sehanset ñeer aw umu bo mꞌburoŋ ! Maareer éeni icehe, eñalenom bu garaahen mara iñoñow buhuli. » 31 Ñeer Suseef narok gutiool mꞌbugara yaŋ paayool : « Nijow igaan áyiih hara Esípt mara gutiom nꞌfiil fara paayom gápurulo mee Kanaan, gulagenulanlagen bu mof me. 32 Be egaanool may mara buguul umaha sikaj ban jijaalojow nꞌsikooreuul ró son fubajuul peepe. 33 Néeni áyiih aahu aroguul jíjool nasonkenuul waa wommee gújagaguul, 34 buguul be ésuupool jirogool “Kábiriŋ nꞌfuleeheóli bu jaat, gakur son gamat déhooro númire, naŋ sipaayóli gufaan.” Mo buguul be éjuh jicin nꞌgapana gara Goseen mara bugara Esípt gucamenut umaha sísaaja son sijaameen ganogoore naŋ buguul. »