Epúrul
épurul bugara Isirayeel mꞌmof mara Esípt
Fumiigeelet guleeh Isirayeel nꞌEsípt
1
Guleeh gumaañen bugara Sakob (gajaool gaagu Isirayeel) gajaoorulo mee nu ho bu nꞌEsípt,
anooan nꞌfiilool ujaiil uwee :
2 Ruben,
Simeyoŋ,
Léwi,
Suda,
3 Isakaar,
Sabulon bugo mꞌBenseme.
4 Daan bugo nꞌNefutali,
Gaad bugo nꞌAseer.
5 Sakob búbajumool búroom bo kankaan bugan gafaŋ gúfaajiir nꞌguñen (70).
Bare aleehool aahu han guroge mee Suseef,
tootook min am bo nꞌEsípt.
6 Piyo bo,
Suseef nacet bugo nꞌgutiool nꞌgambac gaagu peepe galako to mee.
7 Bugara Isirayeel gubugoobugoor meeeŋ,
ngupuusen mof maamu mara Esípt jaram mufik.
Ngubaj sembe mara mújalako gayooŋiil.
8 Ñeer mbaj áyiih acee haŋare fúyiihet faafu min an gajawulen mof mara Esípt,
bare ámirut wanoowan nꞌSuseef.
9 Narok buganool :
« Jiñoñow mara bugara Isirayeel gumeeŋulomeeŋ jaram gon eregulolaal sembe.
10 Tíntiiŋ ñeer nuŋesaal min ubilaale ekaan núŋesulaal gabugooriil.
Eéni ukaanutaal mee min futiik fúpurul,
bugo be ejow gunap nꞌulahoorolaal ngutiigenolaal,
gufaak ngúpur mꞌmofolaal. »
11 Ñeer bugara Esípt ngujok ekosombilo gabile gacooñen bugara Isirayeel ngújagak gatataf min guyihen sísuk san guroge mee Pitoom son Ramises be ebaŋ búfaen bu nꞌFirawuna.a
12 Bare min gommee nereg ngukaaniil gúnuur,
mo ngommee nereg ngumeeŋe,
buciniil mbureg min buwuŋe.
Ñeer bugara Esípt ngureg ngúkaanumiil ngulahiil.
13 Ngucooñeniil ngújagageniil taf naŋ emiigeel.
14 Bugara Esípt ngukaan min buroŋ bugara Isirayeel bureg min butafe.
Ngufareniil min gukak ekap,
ngukaan síbirik son may gújagak ganoogan gara nꞌurager waawu.
Dáaru ngújagageniil mee taf babonkehut.
Firawuna narok gumuk aleehóoleeh amaañen hara Isirayeel habaji
15 Tooge babaj ukoña gúruba Sifera bugo mꞌPuwa garandene mee ukoña éheburab bugo nebaj guleeh.
Funak fucee áyiih hara Esípt narogiil :
16 « Eéni ukoña éhebura gon ebaj guleeh,
njiñeeroor guleeh gaagu.
Kaan aleeh amaañen,
njimugool ;
mimbil kankaan aleeh akoña,
njikahool naroŋ. »
17 Bare ukoña garandene mee gupaaliil ukoña gúsebisebi Atúuha,
ngufoy ekaan wan áyiih aahu arogiil mee.
Ngukat guleeh gumaañen gaagu nguroŋ.
18 Ñeer áyiih hara Esípt nawooguliil,
narogiil :
« Waa ucile min jikaan mee,
njikahen guleeh gumaañen gaagu nguroŋ ? »
19 Ngúsuup áyiih aahu gurogool :
« Ukoña éhebura gunogoorut naŋ bugara Esípt.
Gubabaj sembe guyok.
Eéni ewaatoiil étiiŋ,
bala éli be étiiŋul,
bugo gutaasoe gufaak. »
20 Atúuha nakaan majage bu nꞌurandena ukoña waawu,
min gayooŋ bugara Isirayeel gureg ngumeeŋe ban ngubaj sembe máamak.
21 Ñeer urandena waawu ngúsebi mee Atúuha,
naseniil gabugoor.
22 Ayíih aahu nasen buganool fuyuhoum arogiil :
« Eéni aleeh amaañen ajook ebaji,
njibehenool nꞌeraal yaayu !
Eéni aleeh akoña,
njikahool naroŋ ! »