Móyiis nabaji
2
Mbaj amaañen acee hara fiil fara Léwi hayabe akoña dó nꞌfiil fanur faafu.
2 Akoña aahu naŋar búteb,
nabaj aleeh amaañen.
Nañow mara aleeh aahu ajajak tambi,
nakoopenool wátiiŋe gujenna gúfaajiir.
3 Nan añow mee mara alet néjuh akoopenool,
naŋar gategel gabaje gagubenum nanaanen go egodoroŋ son batipan,
nabaŋ dó jileeh jimaañen jaaju.
Afaak nabaŋ gategel gaagu nꞌesiisiit yammee nꞌgabereberef eraal yaayu yan guroge mee Niil.
4 Alíin jileeh jimaañen jaaju nakot kuhi fáriit min añow waa ubil jo ebaj.
5 Piyout,
ájur áyiih aahu nawaloúl bu gataaso nꞌeraal yaayu.
Ujágagaool ukoña nak gujaoor nꞌgabereberef eraal yaayu.
Ajúr áyiih aahu naŋanden gategel gaagu nꞌetut esiisiit yaayu narok ájagagaool ajow áŋarul go.
6 Ajúr áyiih aahu nagubul go,
nañow mara jileeh jon dó.
Nkaan jileeh jimaañen jan nuhuu.
Nabonket jo narok :
« Jaaje jileeh jíhebura. »
7 Ñeer áliin jileeh jaaju nacigúl min arok bájur áyiih aahu :
« Ucamencamen ijow iŋesuli akoña áhebura mimbil ayeken jo namooben jo ? »
8 Bájur áyiih aahu mburogool :
« Eem,
ujow.
» Ñeer najow áŋarul jaw jileeh jaaju.
9 Bájur áyiih aahu mburok akoña aahu :
« Uŋar aleeh he numoobenomool.
Injé be ecaami.
» Ñeer akoña aahu naŋar jileeh jaaju amooben.
10 Nan jileeh jaaju jihank mee,
nabaañen jo asen bájur áyiih aahu.
Ajúr aahu nabaagen jo naŋ aleehool.
Nasen jo gajow arok jo Móyiis (yo yommee gápuren) mara aroge :
« Nu mal nípurenulool. »
Móyiis natey bu mꞌmof man guroge mee Midian
11 Nan Móyiis áliŋ mee,
funak fucee najow bu gayuugen gutiool éhebura yaayu,
nañow min gommee ngájagageniil taf.
Nañow an hara Esípt netek atiool acee áhebura.
12 Móyiis najegoor añowut an,
natek an aahu hara Esípt jaram acet,
naŋar garuus nafogenool.
13 Fara gajom nábaañul,
nañow bugan gúruba gúhebura gon ngámuy.
Nasonken habij mee :
« Waa ucile noon etek apaali ? »
14 Bare an aahu násuupool arogool :
« Ay aseni fúseefet mimbil ucafóli ?
Ucamencamen bandiŋ jamugom naŋ min umuk mee hara Esípt ?
» Ñeer Móyiis násebi,
narok dó mꞌbúyegehool :
« Hóh,
taŋ wan ikaan mee ujamojamo ! »
15 Nan áyiih aahu fannaool ajam mee wabaj mee,
naŋes bu jamuk Móyiis.
Bare Móyiis natey akuhi áyiih aahu min ajow bu mꞌmof man guroge mee Midian,
nalako acik ekoloŋ.
16 Guleeh gukoña goono futok nꞌgúruba ngújool bu gáyij uŋant waawu upuus bu garemen sísaaja son sijaameen sara paayiil ammee ásimena hara Midian.
17 Umaha ngútiiŋul,
ngoomiil nekam.
Ñeer Móyiis nayihoúl áriiken guleeh gukoña gaagu min asen sikooreiil sirem.
18 Nan gubaañulo mee bu to mꞌpaayiil Rewuhel,
nasonkeniil arogiil :
« Buu njíbaañaaliulo mee mee jaat ? »
19 Ngúsuupool gurogool :
« Umaha goomóli nekam,
an hara Esípt náriikenoli ban náyij mal meeeŋ naremen ekoore yaayu. »
20 Paayiil narogiil :
« Amaañen aahu úmey ?
Waa ucile njikahulool bo ?
Jijow jiŋarulool núcahoaal. »
21 Móyiis nasoŋ nacin nꞌyaŋ Rewuhel.
Nasenool aleehool akoña han guroge mee Sefoora ayab.
22 Nabajool aleeh amaañen.
Móyiis narok aleeh aahu Geresom (yo yommee :
ajawoora mꞌmof me),
mara naroge ho ajawoora mꞌmof malet moola.
Atúuha nacaap Móyiis bu gapagen Isirayeel
23 Piyo bo,
áyiih hara Esípt nacet.
Tooge bugara Isirayeel nguroŋ bo nériil nguyah sikaaw mara fumiigeelet fan gommee nu fo.
Bahuooreriil mbútiiŋ bo nꞌAtúuha.
24 Atúuha najam bahueriil,
nawosen bapaalaay ban ajok mee bugo nꞌAburaham,
Isaak nꞌSakob.
25 Ñeer Atúuha nañow mara guleeh Isirayeel guyoyok,
nakaan to búyegehool.