3
Móyiis ho nja amat ekoore arolool Seturo (gajaool gaagu Rewuhel) ammee ásimena hara Midian.
Funak fucee,
naŋar ekoore yaayu najow awuj erampaasa yaayu jaram átiiŋ nꞌemontaañ yara Atúuha yan guroge mee Horeb.
2 To Amalayika hara Acehériit mee ápurulool mee nꞌetut jiñobol naŋ sambun sajeejeek.
Móyiis nañeer,
nañow mara jiñobol jaaju jisasap sambun ban jihabut.
3 Narok :
« Injé be epiil niñow táh búyiik be min ímir waa ucile jiñobol jaaju jihabut. »
4 Acehériit mee nan añow mee Móyiis nepiilúl,
nawoogulool dó nꞌjiñobol jaaju :
« Móyiis !
Móyiis !
» Násuupool arogool :
« Oóo,
ínje umee ! »
5 Acehériit mee narogool :
« Jambil ucigúl jiñobol je.
Upúren usamatoi mara tan oom maa maa ñaaoñaao,
sambosambo. »
6 Narogool benen :
« Injé emmee Atúuha hara paayi nꞌAtúuha hara Aburaham,
Isaak nꞌSakob.
» Móyiis naguben buhulool mara ásebisebi eñow Atúuha.
7 Acehériit mee nabaañ arogool :
« Iñoñow set min buganom gommee mbuyok nꞌEsípt ban ijanjam bakaaweriil mara gúnuur gan gagonceniil mee gommee nekaaniil.
Injé ímimir buyogiil.
8 Yo ecil mee niwaloúl bu gapageniil nꞌguñen gara Esípt,
mimbil ípureniil nꞌEsípt niŋariil bu mꞌmof majajak mmuwuŋ dan míih son múkum mufuye mee.
Gacin dó mee bugo gommee :
ekanaaniit,
ehiitiit,
emooriit,
eperisiit,
ehiwiit nꞌéyebusiit.
9 Nemma sikaaw sara bugara Isirayeel sítiiŋulantiiŋ,
ban iñoñow min bugara Esípt gommee nekaaniil gúnuur,
10 ñeer ujow.
Injé be eboñi bu nꞌFirawuna min úpurenul nꞌEsípt buganom bugara Isirayeel. »
Atúuha nakaan min Móyiis ámir gajawool
11 Móyiis násuup Atúuha arogool :
« Ay,
ínje fannaom,
ijow itook áyiih aahu ban nípurenul bugara Isirayeel nꞌEsípt ? »
12 Atúuha narogool :
« Injé bu gáani nꞌaw.
Wabil mee ecil núyinen ínje iboñi uwee :
Nan ubil mee gápurenul bugara Isirayeel nꞌEsípt,
buguul be éciinom taahe nꞌemontaañ ye. »
13 Móyiis narok Atúuha :
« Injé ñeer be ejow itook bugara Isirayeel min irogiil :
“Atúuha hara sipaayuul gufaan aboñulaam bu mꞌbuguul.”
Bare éeni gusonkenom gajaool,
nirogiil buu ? »
14 Atúuha narok Móyiis :
« Injé emmee ammee.a
Maa nubil mee ésuup bugara Isirayeel :
“Injé emmee aboñulaam bu mꞌbuguul.” »
15 Atúuha nabenen arok Móyiis :
« Maa nuñum mee erok bugara Isirayeel :
Acehériit mee,
Atúuha hara sipaayuul gufaan Aburaham,
Isaak nꞌSakob aboñulaam bu mꞌbuguul.
Go gommee gajaom bu nanoonan,
nu go may gambacóogambac gubilaam mee éciin.
16 Ñeer ujow uhomen unafaan bugara Isirayeel min urogiil :
“Acehériit mee Atúuha hara sipaayuul gufaan Aburaham,
Isaak nꞌSakob ápurulampur.
Arogandok ho bu gáriikenuul mara añoñow set wan bugara Esípt gommee nekaanuul.
17 Ho bu gápurenuul nꞌEsípt dan jommee mbuyok,
min aŋaruul bu mꞌmof dan míih son múkum mufuye mee,
mammee mara ekanaaniit yaayu,
ehiitiit yaayu,
emooriit yaayu,
eperisiit yaayu,
ehiwiit yaayu nꞌéyebusiit yaayu.”
18 Bugara Isirayeel,
bugo bu gáyenteni.
Nuŋar unafaaniil min jijow jitook áyiih hara Esípt njirogool :
“Acehériit mee Atúuha hara éhebura yaayu ápurulolipur.
Ñeer úciiniciin min ukahenóli nujow gunak gúfaajiir ukaa gásimen baaba nꞌerampaasa yaayu bu nꞌAcehériit mee ammee Atúuhaoli.”
19 Bare ínje Atúuha nímimir set mara áyiih hara Esípt abiloot esoŋ gakahenuul njijow,
éeni bajut waregool sembe.
20 Injé be eŋar sembeom nitek Esípt nibehúl nꞌetut yo waaf wan gumusut guñow.
No ñeer ho bu gakahenuul min jijow.
21 Injé be ekaan min mooluul músuum bugara Esípt ngukahenuul jak,
mo nan jibil mee épur mꞌmof maamu,
mat jijow guñenuul waroor go.
22 Akoñaóokoña hara Isirayeel be éciin akoña hara Esípt habaŋool mee mba acinoorool hara Esípt jógum wakaani nꞌékori,
nꞌéwurus son wañ.
Buguul be eŋar wo jisen guleehuul gumaañen nꞌukoña gukaano.
Maa njiñum mee ewuut bugara Esípt peepe. »