Atúuha naliik sembeool Móyiis
4
Móyiis násuup Acehériit mee arogool :
« Gubiloohom kum gáyenten ban mat gúyinenom.
Bugo be erogom “Acehériit mee ápuruloohi !” »
2 Acehériit mee narogool :
« Waa nuyekene nꞌgañeni ?
» Násuupool arogool :
« Egol. »
3 Narogool :
« Ubet yo nꞌetaam.
» Móyiis nabet yo nꞌetaam,
nélowulo enaab.
Móyiis natey.
4 Acehériit mee narok Móyiis :
« Uñuhen ujok yo nꞌgálej.
» Móyiis nañuhen ajok enaab yaayu,
nebaañ ekaan egol nꞌgañenool.
5 Narogool :
« Dáaru bil mee ecil ngúyinen mara ínje Acehériit mee Atúuha hara sipaayiil gufaan Aburaham,
Isaak nꞌSakob maregen ípurulipur. »
6 Acehériit mee naroŋ nelob mꞌMóyiis :
« Urúr gañeni to mꞌbágangi.
» Móyiis nárur gañenool to mꞌbágangool.
Nan ápurenulo go mee,
ngubaj útisilaa (útihulaw) uhiina pararar,
taŋ haahaae.
7 Acehériit mee nabenen arogool :
« Ubaañen gañeni úrur to mꞌbágangi.
» Móyiis nabaañen go árur to.
Nan ápurenulo go mee,
ngubaañ mara go.
8 Acehériit mee narogool benen :
« Eéni bugara Isirayeel gusoŋuti,
ban gúyinenut nan gubil mee eñow útiyaara waawu wabil mee gajaahali an,
bugo bu gáyinen nan gubil mee eñow úruten waawu.
9 Eéni guñow waaf wammee úruba wabile gajaahali an,
nguroŋ nꞌgáyinenaahi'iil ban gusoŋuti,
núbajul mal nꞌeraal yaayu yan guroge mee Niil úyuh nꞌetaam.
Nan mal maamu mubil mee egor etaam,
mo bu gálowulo mukaan fúsim. »
10 Móyiis narok Acehériit mee :
« Atúuhaom mbil ubonkehom.
Kábiriŋ nan ibaji káŋ bu jaat nulobaale maa maa,
íjuhut elob ;
fúleelumom fúleehileehi. »
11 Acehériit mee narogool :
« Ay akaane an fúlelub ?
Ay nja akaan an futiiŋoon,
nakaan émumune,
nakaan an nañow mba nápiim ?
Let ínje Acehériit mee ?
12 Maareer ñeer aw be ejow.
Nan ubil mee elob,
ínje bu gáani nꞌaw ban niliigi buu nuñum mee elob eeno. »
13 Bare Móyiis narogool :
« Atúuhaom,
ubonkehom.
Uboñ acee ! »
14 Ñeer Acehériit mee náñigen bu mꞌMóyiis min arogool :
« Ati'i Aharoŋ hara fiil fara Léwi naŋ aw,
alet to ?
Imímir mara ájujuh elob.
Umue néjool sah min jirehoor.
Nan abil mee eñowi,
be ésuumool tambi.
15 Aw be egaanool wan abil mee elob.
Nan jibil mee elob márubauul,
ínje bu gáani mꞌbuguul,
niliiguul wan jiñum mee ekaan.
16 Ho abil mee elob mꞌbugan nꞌgajow giiya,
ho bu gáani butumi aw nóoni naŋ Atúuhaool.
17 Ujok egol yaayu nꞌgañeni.
Yo nuñum mee eŋar nukaan waaf waawu wabil mee ekaan an najaahali. »
Móyiis nabaañ bu nꞌEsípt
18 Ñeer Móyiis nabaañ bu bo nꞌarolool Seturo min arogool :
« Icamencamen ebaañ bu nꞌEsípt be eñow teer gutiom ubugu bo mꞌburoŋ.
» Seturo násuupool arogool :
« Ujow nꞌgásuumaay ! »
19 Acehériit mee narok Móyiis bo mꞌmof mara Midian :
« Ubaañ bu nꞌEsípt mara bugan gaagu peepe gacameneen mee jamugi gucecet. »
20 Ñeer Móyiis naŋar akoñaool nꞌguleehool gumaañen,
najiŋeniil nꞌefalo min abaañ bu nꞌEsípt.
Najok egol yara Atúuha nꞌgañenool.
21 Acehériit mee narok Móyiis :
« Maareer ñeer aw umu mꞌbulago be ebaañ bu nꞌEsípt.
Isenisen sembe sara ekaan waaf wabile gajaahali an.
Eéni útiiŋ nꞌEsípt,
nukaan waaf waawu fácil Firawuna.
Bare ínje be ekaan nu ho balas min afoy gakahen bugara Isirayeel ngujow.
22 Aw be erok Firawuna ínje Acehériit mee iroge :
“Isirayeel aleehom amaañen átiyoora.
23 Irogi ukahen aleehom amaañen mimbil ajow áciinom.
Eéni ufoy gakahenool najow,
ínje be emuk aleehi amaañen átiyoora.” »
24 Dó nꞌejow yaayu,
Móyiis nahaj tan abil mee gaŋot,
Acehériit mee nacigulool naŋes bu jamugool.
25 Ñeer akoñaool Sefoora nátiiŋ neŋar ekenkereŋ yañeñek nasunna aleehool amaañen afaak,
naŋar fúsim faafu agor goot Móyiis narok :
« Aw araaŋom hara fúsim. »
26 Acehériit mee ñeer nakat bo Móyiis.
No Sefoora arok mee :
« Aw araaŋom hara fúsim » mara gasunna gaagu.
27 Acehériit mee narok Aharoŋ :
« Ujow bu bo nꞌerampaasa yaayu min jirehoor mꞌMóyiis.
» Ñeer Aharoŋ najow.
Natook atiool Móyiis bo nꞌemontaañ yara Atúuha,
nagaabool.
28 Móyiis nátiiŋen atiool gurim gaagu peepe gan Acehériit mee asenool mee,
nátaculool waaf waawu wabil mee ekaan an najaahali náyinen,
naŋ min Atúuha arogool mee.
29 Ñeer Móyiis bugo nꞌAharoŋ ngujow guhomen unafaan bugara Isirayeel.
30 Aharoŋ nagaaniil peepe wan Acehériit mee arok mee Móyiis,
ban nakaan fácil gayooŋ gaagu waaf waawu wabil mee ekaan an najaahali náyinen.
31 Ñeer bugara Isirayeel ngúyinen.
Nan gujam mee mara Acehériit mee añoñow gúnuuriil ban áriikeniiriiken,
nguyah gújuul,
ngunaakool.