Móyiis bugo nꞌAharoŋ ngujow bu bo nꞌFirawuna
5
Nan púr to mee,
Móyiis bugo nꞌAharoŋ ngujow gutook Firawuna min gurogool :
« Acehériit mee,
Atúuha hara Isirayeel aroge ukahen buganool ngujow gukaan gagaan nꞌerampaasa bu garuukenool. »
2 Firawuna násuupiil arogiil :
« Ay ammee Acehériit mee mimbil íyenten elobool nikahen bugara Isirayeel ngujow ?
Imírutool ban mat ikaheniil ngujow. »
3 Móyiis bugo nꞌAharoŋ ngurogool :
« Atúuha hara éhebura nápurulolipur.
Ucíiniciin min ukahenóli nujow gunak gúfaajiir ukaa gásimen baaba nꞌerampaasa yaayu bu nꞌAcehériit mee ammee Atúuhaoli.
Mo mat abehulóli gásomut gafeegut mba futiik. »
4 Bare áyiih aahu hara Esípt narogiil :
« Móyiis buguul nꞌAharoŋ,
waa ucile njicamen bugan gaagu gukahen gújagagiil ?
Jibaañ jikaa búlaaruul ! »
5 Nabenen arogiil :
« Bugan gaagu maareer gumemmeeŋ dáare mꞌmof me.
Buguul njicamen gukahen gújagagiil ! »
Firawuna nareg nakaane gújagak bugara Isirayeel ngutaf
6 No nꞌfunak fanur faafu,
Firawuna nasen éseef nꞌgújagak gaagu bugara Esípt bugo nꞌékafatiya bugara Isirayeel fuyuhoum arogiil :
7 « Jambil jibenen jisen bugan gaagu ubugu mujit be ekaan síbirik,
naŋ min ukaanale mee kábiriŋ no bu jaat.
Bugo fannaiil gubile ejow guŋesooro mujit.
8 Buguul bu gapinceniil min gukaan síbirik sirehen nꞌsara gaagu gunak,
haani yanur jambil éŋesuli,
mara bugo úgot.
Yo ecil mee ngon gahuoor nak gurok bugo be ejow gásimen bu nꞌAtúuhaiil.
9 Jicooñeniil máamak nꞌgújagagiil,
mo mat gúkaanum elob yara sibuujoor. »
10 Ñeer éseef yaayu nꞌékafatiya yaayu ngúpur gujow be egaan bugara Isirayeel gurogiil :
« Firawuna aroge maareer mat asenuul mujit.
11 Buguul fannauul jibile ejow jiŋesúl mo tan jibil mo mee ebaj.
Bare buguul be ekaan síbirik sirehen nꞌsara gaagu gunak. »
12 Ñeer bugara Isirayeel ngufanjoor mꞌmof maamu peepe mara Esípt bu fuŋes guyaasen.
13 Eséefiil nꞌgújagak nak gucooñeniil ngurogiil :
« Jifaak gújagaguul gara jaat.
Funagóofunak buguul bu gátiiŋen síbirik san nja jikaan mee no nan useneuul mee mujit. »
14 Eséef bugara Esípt ngutek ékafatiya bugara Isirayeel gan gucaap mee.
Ngurogiil :
« Gunak ge gúsola,
jítiiŋenut síbirik san nja jikaan mee.
Waa ucile ? »
15 Ñeer ékafatiya bugara Isirayeel ngujow guloloboor to nꞌFirawuna,
ngurogool :
« Waa ucile nukaan éli újagagai mee ?
16 Dit gusenóli sah mujit ban ngurogóli :
“Jikaan síbirik !”
Tan oomaal maa maa újagagai nja gutególitek.
Bakaaner bugani bufeegut ! »
17 Firawuna násuupiil arogiil :
« Buguul úgot,
eem úgot fanna wo !
Yo ecil mee nak jirok :
“Ujaal úsimenaal bu nꞌAcehériit mee.”
18 Ñeer jijow jikaa gújagak !
Mat gusenuul benen mujit,
ban buguul be ekaan síbirik sirehen nꞌsara no. »
19 Ekáfatiya bugara Isirayeel ngurok nꞌúyegehiil:
« Ñeer uteeraale mara gubilooholaal gáŋesul síbirik san ubilaal mee ekaan funagóofunak. »
20 Nan gúpurulo mee nꞌyaŋ Firawuna,
ngútiiŋ nelooŋ Móyiis bugo nꞌAharoŋ,
tan gommee nenaakiil,
21 ngurogiil :
« Mbil Acehériit mee añow wan jikaan mee nacafolaal !
Bakaaneruul bucile min Firawuna nꞌújagagaool gufoyolaal.
Nogoonogoor naŋ gajaasi njiseniil bu jamugolaal. »