Fúcihum 50

(Audio de ce chapitre disponible dans Gagur gara Mútiliŋ

Ñikul Sakob

Suseef ñeer náñup, nagaab eñalen paayool min ahuu. 2 Suseef nasen bulago újagagaool úsontena min gulogos paayool muloosoor jambil aput ; ngukaan wan alobiil mee. 3 Naŋ min nja gupii mee ngukaan, eñalen yaayu gucookoocookoor yo wátiiŋe gunak gafaŋ gúruba (40). Bugara Esípt nguhuu Sakob gunak gafaŋ gúfaajiir nꞌguñen (70).

4 Nan guhuool mee gufaak, Suseef narok bugara yaŋ áyiih aahu : « Eéni múmbaam músuumuusuum, jibonket jijow jirogom áyiih aahu 5 mara paayom bala acet, arogandok ikaliool mbil ifogool nꞌfuyaagool fan awok mee mꞌmof mara Kanaan. Icíinoociin nakahenom bulago min ijow ifogulool níbaañul. » 6 Ayíih aahu násuupulool arogool : « Ujow úfogul paayi naŋ min ukaliool mee. »

7 Suseef nan ammee nejow bu gafok paayool, bugara yaŋ áyiih aahu, nꞌújagaga áyiih aahu, nꞌunafaan bugara Esípt ngulagenool, 8 bugo mꞌbugara yaŋool, nꞌgutiool, nꞌfiil fara paayool peepe. Ngukat to mꞌmof mara Goseen guleehiil son sikajiil déhooro. 9 Upooyaiil guceeiil nguŋar sisaret, bugaagu ngujiŋ nꞌsipilinj min gútinen Suseef. Gayooŋ gaagu gubabaj sembe.

10 Nan gujow mee jaram gútiiŋ nꞌeŋaan yan guroge mee Ataad, yammee nꞌgapana Suruden, to ngukulool mee gakul gáamak. Suseef akukul paayool gunak goono futok nꞌgúruba. 11 Ekanaaniit yaayu gacin dó mee mꞌmof maamu, nan guñow mee bakuler baabu nꞌeŋaan yan guroge mee Ataad, ngurok : « Ñaañu ñikul ñigogor bugara Esípt. » Yo ecil mee ngurok tin taahu nꞌgapana gara Suruden : « Abel-Misira » (yo yommee : Ñikul ñara Esípt).

12 Ñeer guleeh Sakob ngukaan wan paayiil arogiil mee. 13 Nguteb eñalenool bu mꞌmof mara Kanaan min gufogool dó mꞌbúwaay bammee mꞌbarager bara Makapela bújooŋoor Mamure, ban Aburaham anoom mee nꞌEfuroŋ ahiitiit aahu mimbil kaan guyaagool. 14 Suseef nan afok mee paayool afaak, nábaañul bu nꞌEsípt, ho nꞌgutiool mꞌbugan galagenool mee.

Suseef nabonket gutiool

15 Ñeer gutii Suseef nan guñow mee mara paayiil acecet, ngurogoor : « Alaal pére Suseef be ebaŋolaal funamben min alugen ñiñuget ñan ukaanaalool mee ? » 16 Nguboñ gurok Suseef : « Paayi furim fe nakahóli bala acet. 17 Aroge “Mbil ubonket guti'i mara síjunubeiil son ñiñuget ñan gukaani mee.” Maregen maregen, gukaanikaan ñiñuget, bare gúciiniciin mbil ubonkehiil, mara gúyinenyinen Atúuha han paayi áyinen mee. Suseef nan ajam mee gurim ge, nahuu. »

18 Ñeer gutiool fannaiil ngújool guyahool gújuul ngurogool : « Elí emiigeeli ! » 19 Suseef narogiil : « Jambil jísebi, ilet Atúuha ! 20 Jicamenencamen ekaanom ñiñuget, bare Atúuha nálowul ño akaan majage, mara nacamene gapagen bugan gamemmeeŋ naŋ min jon mee neñow yo jaat. 21 Jambil jibaañ jísebi benen, maareer ínje be esenuul múcahoaay buguul nꞌguleehuul. » Gurim gaagu ngúsuum gutiool, úyegehiil nubeb.

Ecet Suseef

22 Suseef bugo nꞌfiil fara paayool nꞌEsípt ngucine. Suseef abaje símit ceme nꞌsímit guñen (110) kindiŋ nacet. 23 Añoñow gambac gáfaaten gara guleeh Efurem. Benen to, guleeh Maakir ammee aleeh amaañen hara Manaase, bugo gubajibaj fácil Suseef, aleebiileeb.

24 Funak fucee, Suseef narok gutiool : « Injé be ecet ; bare Atúuha bu gáriikenuul ban nápurenuul dáare mꞌmof mee mara Esípt bu mꞌmof man arok mee be esen Aburaham nꞌIsaak, mꞌpaayolaal Sakob. 25 Maregen maregen, Atúuha bu gáriikenuul. Ñeer jikaliom buguul be eŋar eñalenom min jijow. »

26 Suseef acehe ho babajer símit ceme nꞌsímit guñen (110). Ngulogosool muloosoor min gubaŋool nꞌekees mꞌmof mara Esípt.