Sakob natar guleehool náruwaiil bala acet
49
Sakob naboñ gúwoogul guleehool min arogiil : « Jihomenoorúl min igaanuul wañumuul mee ebaj taahe nꞌfácil. 2 Guleehom, jíjool jijanten ínje paayuul Sakob.3 Ruben, aw ommee aleehom átiyaara,
han ibaj mee fúsimom netey.
Urereg guti'i bahank ban nuregiil sembe.
4 Bare úreporepo naŋ mal,
mat uŋar funafaanet faafu
mara abet jaayi nufiihene ;
nusuulenansuulen.
5 Simeon bugo nꞌLéwi batiaay.
Gajamooriil gara múlaaj.
6 Ilet ró mꞌbusangiil bara gakajen ;
gapinooriil, icamenut go.
Gumumuk bugan mara giiñiil gutiñe ;
mꞌbásuum booliil ngusaahe gucil goot gujiŋa.
7 Irankaranka giiñ gaagu gooliil gafeegut mee
son síñigeniil sajagut mee.
Bu gafanjen búbajumiil dó nꞌIsirayeel,
be eyiisiil mꞌmof maamu.
8 Min aw Suda, guti'i be esali,
ban nguyahi gújuul,
mara aw be eheek ulahoori.
9 Suda, aw unogoonogoor naŋ éjato yáliling
yatogoñulo énunkureŋ nébaañul bu nꞌyaŋ yo.
Ejáto econgecong nefiiho.
Ay abile gahaañi ayihen yo ?
10 Suda, fúyiihet bu gáani nꞌfiili bu nanoonan ;
furas fara áyiih bu galako mꞌbúbajumi,
káŋ bu nꞌan añum fo mee ecil ájool,
han bugan gaagu peepe gubil mee esoŋ.
11 Suda bu gatoonoor jaram ájuh akok efalo'ool nꞌununugool wara mutiñ ;
nájuh akok sikajool nꞌuhan wara umoobaayool.
Súumool naŋar bíiñ min ataas gájuwo'ool ;
naŋar gaguuj gara gumoobaay bu nꞌgásabadoorool.
12 Gúcilool be éjuuk mara bíiñ yaayu yan areme mee ;
gúŋiiŋool bu gahiina mara míih.
13 Sabulon, ho be ecin nꞌgapana fal
ban nja usaana wáamak waawu uyah mee.
Mofool be ewuŋ káŋ gúlingoor nꞌSidoŋ.
14 Isakaar anogoonogoor naŋ efalo yabaje sembe,
yan nja efiiho nꞌyaŋ yabaje guteep galilliŋ.
15 Nañow tan nja áyolen mee jajak
ban mof maamu mmujak,
nayah gújuul min ateb búteb bálebie,
nakaanekaan gújagak gara amiigeel.
16 Daan, ho bu gajawulen buganool
naŋ min bugara waawu uyooŋ wara Isirayeel gubil mee gajawulen buganiil.
17 Daan bu ganogoor naŋ enaab mꞌbulago,
naŋ bálikib nꞌgagur ;
be eŋaap gaat gara epilinj
min ara yo álohul ejambásola.
18 Acehériit mee, epagom nꞌaw nyooma.
19 Gaad, utiiga bu gatiigeni
bare aw bu gateooriil.
20 Aseer, etaamool be enog,
mutiñ mabil dó mee épurul
be ejak jaram asen áyiih atiñ.
21 Nefutali, ho ebook yara mahooro,
yabajebaj muleeh majage.
22 Suseef, ho bununuk babugebuk máamak
bariiriil cik gafuy
uhan bo nukaay futeep.
23 Uyaha gúkanga gukaanookaan silob ;
ngulaafool gutiigen.
24 Bare fúkangaool najok fo liŋ,
guñenool ngureg bawus
mara Atúuha nasenoosen sembe.
Atúuha hapooy mee ínje Sakob,
ho Amaha aahu ammee Elánkiin yara Isirayeel.
25 Suseef, Atúuha hara paayi bu gáriikeni,
Atúuha ara sembe mbil ásoonieni.
Gásuumaay ganoogan bu galako nꞌaw
gásuumaay gara mal maloheúl mee fatiya
mmápureul mee nꞌetaam.
Ukoñaiil, gariil be ésuum
ban ngubaj miil meeeŋ.
26 Gásuumaay gan paayi aseni mee
gurereg simontaañ sara nay.
Gásuumaay gaagu mbil gulako nꞌSuseef
ammee ácibena gutiool.
27 Benseme esaamaay.
Mꞌbújom, ho be éjogul énunkureŋ natogoñ,
gárusa, nawaajoor eluu yan aŋañen mee. »
28 Ubuge guyihen mee giil gammee guñen nꞌgúruba gara Isirayeel. Maa paayiil alako mee elob mꞌbugo nan ammee ngáruwaiil. Nasen anooan gáruwaool.
Ecet Sakob
29 Sakob nan ammee nefaak elob nꞌguleehool, narogiil : « Injé be ecet. Mbil jifogom to nꞌsipaayom, mꞌbúwaay bammee mꞌbarager ban Efuroŋ ahiitiit aahu acileen mee. 30 Búwaay baabu bammee Makapela cik Mamure mꞌmof mara Kanaan, mꞌbarager ban Aburaham anoom mee nꞌEfuroŋ, ahiitiit aahu, bu mara efok buganool. 31 To may ngufok mee Aburaham bugo nꞌakoñaool Saara, nꞌIsaak nꞌakoñaool Rebeka, to may nifoge Leya. 32 Barager baabu son búwaay baabu ban dó mee, unoominoom nꞌehiitiit yaayu. » 33 Nan Sakob afaak mee elob guleehool wan guñum mee ekaan, nabaañenúl goohool abaŋ nꞌeral yaayu nafiiho. Nañak dáak, nawalo. Najow atook bo sipaayool gacet mee.