Sakob náruwa guleeh Suseef
48
Púr to wabaj mee, ngugaan Suseef mara paayool ájuheriit. Naŋar guleehool gammee gúruba, Manaase bugo nꞌEfurem, min gujow be eñow paayool. 2 Ngugaan Sakob gurogool : « Aleehi Suseef umee najaalo be eñowi. » Ñeer Sakob nahankulenoor min ayuho alako nꞌeralool. 3 Sakob narok Suseef : « Atúuha ara sembe ápurulampur nꞌésuk yan gurege mee Lúus mꞌmof mara Kanaan. Násoonienom 4 arogom : “Injé be eseni gabugoor gamemmeeŋ, aw bu gáani pay giil gamemmeeŋ. Búbajumi babil mee éjool mꞌbúsoli, bo nibil mee esen mof mee mbucil mo bu nanoonan.” » 5 Sakob nabenen arogool : « Guleehi gammee gúruba, Efurem bugo mꞌManaase, gan ubaj mee dáare mꞌmof mara Esípt bala ínje be etooguli ; bugo búgumbaam. Bugo guleehom naŋ Ruben bugo nꞌSimeon. 6 Bare guleeh gan ubil mee ebaj búsoliil, bugo bugiiya. Bugo guti'iil gunafaan (gammee Efurem mꞌManaase) gubiliil esen gaŋariil. 7 Nan emmee nébaañul Padan-Aram, bala ítiiŋ Afúrata dó mꞌmof mara Kanaan, jaayi Raseel nacet nꞌguñenom, éli nejow mꞌbulago bara Afúrata yo yommee Beteleem. Nifogool to. (Moola mucil mee nijok guleehi gúruba gaagu naŋ búgumbaam.) »8 Sakob nañow guleeh bugara Suseef, nasonken : « Ubugu búgey goom ? » 9 Suseef násuupool : « Ubugu guleeh gan Atúuha asenaam mee Esípt. » Narogool : « Uŋarulomiil bu taahe nꞌínje min íruwaiil. » 10 Tootook Sakob min afallene máamak ban eñowool eŋesuloŋesulo. Suseef natoosen guleeh gaagu gucigool, Sakob nagaabiil nakoheniil nꞌeniinool. 11 Narok Suseef : « Iyíneneenut sah be eñow buhuli, taŋ Atúuha be esenom guleehi iñow. »
12 Suseef nayihenúl guleeh gaagu nꞌgújuul paayool, násit káŋ bu nꞌetaam. 13 Nabaañ ájogul guleehool gammee gúruba gujooŋoor paayool. Efurem nꞌgañenool gárib, nkaan gañen gamay gara Sakob. Manaase nꞌgañenool gamay, nkaan gañen gárib gara Sakob. Suseef natoosenuliil bu to nꞌSakob. 14 Sakob napangenoor guñenool min ateb gañenool gárib abaŋ nꞌfukow fara Efurem ammee aleeh, min gañenool gamay nꞌfukow fara Manaase ammee anafaan. 15 Náruwa Suseef min arok :
« Níciin Atúuha han paayom afaan Aburaham mꞌpaayom Isaak gúyinen mee,
hapooyaam mee kábiriŋ fuleeheom bu jaat.
16 Amalayika hapagenaam mee mꞌmajagut, ásoonien guleeh gee,
mbil gajaom guwoseni naŋ gara paayom afaan Aburaham bugo mꞌpaayom Isaak,
mbil gubugoor meeeŋ dáare mꞌmof me. »
17 Suseef nan añow mee mara paayool gañenool gárib naŋare abaŋ nꞌfukow Efurem, ntáañiool. Najok gañen paayool gammee nꞌfukow Efurem bu gátiigul go abaŋ nꞌfukow Manaase. 18 Narok Sakob : « Paam, ulilimb, Manaase ammee anafaan, uŋar gañeni gárib ubaŋ nꞌfukowool. » 19 Bare paayool nafoy narogool : « Aleehom, nímimir. Manaase búbajumool be emeeeŋ máamak, ho fannaool be ebaj sembe. Bare atiool áriita be eregool nabaje sembe. Guleehool nꞌguleeh-guleehool búbajumiil be emeeŋ máamak ban bu gayihen giil gamemmeeŋ. »
20 Funak fanur faafu náruwaiil arok :
« Bugara Isirayeel nꞌujowuul ngubile gáruwa gurok :
“mbil Atúuha akaani jak naŋ min akaan mee Efurem bugo mꞌManaase !” »