Fiil fara Sakob dó mꞌmof mara Goseen
47
Suseef najow agaan áyiih aahu hara Esípt arogool : « Gutiom mꞌpaayom gúpurulopur mꞌmof mara Kanaan nꞌsikajiil ró son wan gubaj mee peepe. Ubugu mꞌmof mara Goseen. » 2 Naŋar dó nꞌgutiool goono futok min aliigiil áyiih aahu. 3 Ayíih aahu narogiil : « Waa wommee gújagaguul ? » Ngúsuupool gurogool : « Ujágagai umaha naŋ sipaayiil gufaan. » 4 Ngurok áyiih aahu benen : « Elí ujaalojow be econg dáare mꞌmof me, mara mꞌmof mara Kanaan ban úpurulo mee, étuuhuur elet bo bu nꞌsikajóli ; ban bacaar baabu bubabaj bo sembe. Ubonket újii újagagai min gucin mꞌmof mara Goseen. »5 Ayíih aahu narok Suseef : « Paayi nꞌguti'i gujaalojow bu baabe nꞌaw, 6 mof mara Esípt umue. Uñeer tareg mee bajak nubaŋiil to. Useniil ngucin mꞌmof mara Goseen. Eéni dó mꞌbugo babaj gájuhe gucookoor sikooreom, nuseniil so guyekenom. »
7 Ñeer Suseef náŋarul paayool Sakob aliik áyiih aahu. Sakob náduwa áyiih aahu. 8 Ayíih aahu narok Sakob : « Símit soono buu nubaje ? » 9 Sakob násuupool arogool : « Batoosooreom baabe nꞌdúniya baje símit ceme nꞌsímit gafaakan nꞌguñen (130). Buroŋom bubaagut ban mbútaañi. Ibaagut naŋ sipaayom gufaan gatootoosoor mee may. » 10 Sakob nabenen áruwa áyiih aahu afaak nápurul dó nu yaŋ áyiih aahu.
11 Ñeer Suseef nawalen paayool nꞌgutiool min gucin nꞌgahaja gareg mee bajak dó nꞌEsípt mꞌmof man gurege mee Ramises. Nájii'iil etaam yaayu, naŋ min áyiih aahu arogool mee. 12 Ho nja aseniil may múcahoaay bu nꞌfiil fara paayool dó, naŋ min yaŋóoyaŋ ereh mee.
Buu Suseef ajawulene Esípt nꞌsímit sara bacaar baabu
13 Bacaar baabu buruuruuk jaram bajut múcahoaay dó mꞌmof maamu. Bugan bugara Esípt mꞌbugara Kanaan guyooyoon mara bacaar baabu. 14 Suseef nahomen síkori san bugara Esípt mꞌbugara Kanaan guŋarulo mee bu funoom múcahoaay, abaŋ dó yaŋ áyiih aahu. 15 Nan bugara Esípt mꞌbugara Kanaan síkori'iil sifaago mee, ngújool gutook Suseef min gurogool : « Usenóli múcahoaay. Gábajaahioli síkori be ecilóli nucet, aw to ? » 16 Suseef narogiil : « Nemma jibajut síkori, jisenom sikooreuul nitihuul so mꞌmúcahoaay. » 17 Ngúŋarul sikooreiil gusen Suseef. Gabaj mee sipilinj, sifalo, sijaameen, sísaaja nꞌsiyaha, ngutit so mꞌmúcahoaay. Emít yaayu uyu, Suseef naseniil múcahoaay butit nꞌsikajiil.
18 Nan émit yaayu ewuj mee, ngúbaañul gutook Suseef ngurogool : « Anafaanóli, éli újuhut ukoopeni mara síkorioli sifaagofaago ban sikajóli aw ucil so. Elí ñeer siniinóli son etaamóli nuŋañene. 19 Mat újuh uñeeróli nucet nꞌetaamóli ró. Unoom éli fannaóli son etaamóli, nusenóli múcahoaay min óoni emiigeel bugara áyiih aahu. Nusenóli may eruugiit be enaaf mimbil uroŋ, jambil sitaamóli sikaan gútumb. » 20 Bacaar baabu mburuuk mee, bugara Esípt ñeer ngunoomen urageriil Suseef. Nanoom etaam yaayu peepe bu nꞌáyiih aahu. Maa mof maamu mukaan mee mara áyiih aahu. 21 Suseef náŋarul bugan gaagu nꞌgahaja ganoogan gara mof maamu bu ró nꞌsísuk sáamak sara Esípt. 22 Bare anoomut etaam yara úsimena waawu mara babaj fuyuhoum faroge nꞌguñen gara áyiih aahu ngooma. Ayíih aahu aseneiil múcahoaay, yo ecil mee gunoomenut etaamiil.
23 Kindiŋ Suseef narok bugan gaagu : « Jaat inoomuunoom son sitaamuul bu nꞌáyiih aahu. Eruugiit uyee, jíjuhe jiŋar yo be enaaf. 24 Nan jibil mee eyim, buguul be esen yakaan mee futok áyiih aahu, saasu may sammee sibaagiir jípuren dó eruugiit be enaaf urager waawu, waŋaño mee wo fúcahouul buguul nꞌguleehuul nꞌgan to mee siyaŋuul. » 25 Ngurogool : « Aw upagenólipagen nꞌecet. Mara mujak man ukaanóli mee, usonsoŋ be ekaan emiigeel bugara áyiih aahu. » 26 Maa Suseef ayihen mee fuyuhoum faafu faroŋ mee nejow bu jaat : Wabil mee ekaan futok dó mꞌbayimer baabu, be esen wo áyiih aahu. Bare etaam yara úsimena waawu let yara áyiih aahu.
Sakob nalob Suseef mara gafogool
27 Ñeer Sakob nacin dó mꞌmof mara Esípt nꞌgapana gan gurege mee Goseen. Nkaan etaam yooliil, ngubugoor dó meeeŋ. 28 Sakob abaje dó nꞌEsípt símit guñen gaat nꞌsíruba (17), bare símihool búroom so soono ceme nꞌgafaŋ gúruba nꞌfutok nꞌsíruba (147). 29 Sakob nan ámir mee ecehool étintiiŋ, nawook aleehool Suseef min arogool : « Naŋ maregen ucamenancamen, uliigom gacamen gaagu, ubaŋ gañeni nꞌfataam fuboŋom min ukali mara mat ufogom dáare nꞌEsípt. 30 Eéni émit eŋarom, núpurenom nꞌEsípt min utebom ufok nꞌguyaak sipaayom. » Suseef narogool : « Be ekaan naŋ min urogaam mee. » 31 Sakob nabaañ arogool : « Ukaliom ! » Suseef nakaliool. Ñeer Sakob najok fukow eralool min asal Atúuha.