Fúcihum 45

(Audio de ce chapitre disponible dans Gagur gara Mútiliŋ

Suseef nakaan min gutiool gufaasool

Gurim Suda gukankaan Suseef ájuhut ajogooro fácil újagagaool. Narok újagagaool gúpur. Nŋaño to gutiool, no nagaaniil mee ho ammee ay. 2 Nahuu máamak jaram bugara Esípt gujamool, bu nu yaŋ yara áyiih aahu ró. 3 Suseef narok gutiool : « Injé emmee Suseef. Paayom umu bo mꞌburoŋ ? » Nguŋaŋo jaram gújuhut gúsuupool. 4 Narogiil : « Jibonket jicigulom ! » Ngucigool, narogiil : « Injé Suseef, atiuul han jinoomen mee min guŋarool bu nꞌEsípt. 5 Jambil úyegehuul uyuho, ban jambil táañiuul mara njinoomenaam dáare mꞌmof mee, mara Atúuha fannaool aboñulaam bu baabe nilohuluul fácil, mimbil ipagenuul. »

6 Nabenen arogiil : « Símit síruba usee, alaal mꞌbacaar. Roŋulo símit futok san úmire an mat anaaf, mat ayim. 7 Atúuha nacamen mee mbil buguul mꞌbúbajumuul jiroŋ jambil jiniiho, naboñulom bu baabe nilohuluul fácil mbil íjuh ipagenuul. 8 Let buguul jiboñulaam bu baabe, bakaaner Atúuha. Ban Atúuha umee nakaanaam nireg nicige áyiih aahu hara Esípt, nen anafaan hara yaŋool peepe, nen ajawulena hara Esípt búroom yo. 9 Ñeer jiwaaken min jijow jirok paayom : “Aleehi Suseef aboñulóli furim fe : Atúuha akaanankaan ajawulena hara Esípt búroom yo. Ujóol tímer utoogulom baabe. 10 Aw be ecin ucigom dó nꞌEsípt nꞌgapana gan guroge mee Goseen, aw nꞌguleehi, nꞌguleeh-guleehi, sikaji, son waafi peepe. 11 Injé bu gacookoori, aw, nꞌfiili son sikaji, jambil bacaar bujoguul, mara símit futok sara bacaar siroŋulo bo.” »

12 Suseef nabaañ arok gutiool : « Buguul fannauul jiñoñow yo nꞌgúciluul, atiom Benseme may añoñow yo nꞌgúcilool, mara ínje fannaom ilobe mꞌbutumom. 13 Jijow jigaan paayom fuyuhoum fajak mee fan ibaj mee baabe nꞌEsípt. Njigaanool peepe wan jiñow mee jifaak, njiŋarulomool tímer bu baabe. » 14 Ñeer Suseef náñag aroop atiool Benseme nguhuu márubaiil. 15 Suseef nagaab may gutiool búroomiil min afaak mufuu reg. Ñeer kindiŋ, gutiool ngusaboor nu ho.

Ayíih aahu narok Sakob atoosoorúl bu nꞌEsípt

16 Dó nu yaŋ yara áyiih aahu ngujam mara gutii Suseef gútiiŋulotiiŋ nꞌEsípt. Nan áyiih aahu mꞌbuganool gujam yo mee, nsúumiil máamak. 17 Ayíih aahu narok Suseef : « Urok guti'i gújup waafiil nꞌsifaloiil min gubaañ bu Kanaan, 18 ngúŋarul paayuul nꞌfiilool peepe bu baabe. Injé be ebaŋiil nꞌgapana gareg mee ngujage dáare nꞌEsípt, bo bugo be etiñ mutiñ mareg mee básuum dáare mꞌmof mee. 19 Nurok guti'i guŋar may sisaret nꞌEsípt min gujow gútebul ukoñaiil, guleehiil mꞌpaayiil. 20 Jambil gujok émiremma mara wan gukahulo bo mee ; bugo be ejow gulako nꞌgapana gareg mee bajak dáare nꞌEsípt. »

21 Guleeh Sakob ngukaan wan gulobiil mee. Suseef naseniil sisaret naŋ min áyiih aahu alob mee, naseniil may wan gubile futiñ mꞌbulago. 22 Nájii anooan gájuwo gajajak. Bare nasen Benseme újuwo woono futok wajajak son ukuparu woono siceme sífaajiir. 23 Naboñ may bu mꞌpaayool sifalo simaañen soono guñen satebe wareg mee nujage dó nꞌEsípt, saasu may sifalo sikoña soono guñen nsiteb múcahoaay nꞌgúmbuur bu mara éjool yara paayiil mꞌbulago. 24 Ñeer Suseef nakahen gutiool min gujow. Narogiil : « Jambil jímuy mꞌbulago. »

25 Ngúpur Esípt min gubaañ bu Kanaan to mꞌpaayiil Sakob. 26 Ngugaanool gurogool : « Suseef umu bo mꞌburoŋ. Ho ayekene mof mara Esípt búroom mo. » Bare nánif yemm mara áyinenutiil. 27 Ngulobool peepe gúkoŋen Suseef. Sakob nan añow mee sisaret saasu san Suseef aboñulo mee be etebool, ñeer kindiŋ náfillo. 28 Narogiil : « Ñeer íyinenuuyinen ! Aleehom Suseef umu bo mꞌburoŋ. Injé be ejow iñowool bala icet. »