(Audio de ce chapitre disponible dans Gagur gara Mútiliŋ
Benseme ngujogool ákuu
44
Mpúr to, Suseef nasen acookoora yaŋool bulago arogool : « Upuusen gulaacen gara ubugu. Useniil múcahoaay meeeŋ naŋ min gújuh mee guteb. Nubaañen anooan síkoriool ukaan dó nꞌfulaacenool. 2 Dó nꞌfulaacen fara ati'iil áriita, núrur dó éraanumom yarapi mee nꞌékori, nukaan dó may síkoriool sara funoom múcahoaay. » Ñeer nakaan naŋ min Suseef alobool mee.3 Fara gajom mꞌbújom, nan bunak búpurulo mee, ngukahen bugan gaagu min guŋar sifaloiil ngujow bóot. 4 Nan gúpur mee nꞌésuk yaayu déhooro, gukuhiut, Suseef narok acookoora aahu : « Uteylen bugan gaagu, jaram utoogeniil. Nusonkeniil urogiil : “Waa ucile nikaanuul jak, njikaanom kóji maa ? 5 Waa ucile min jíkuet éraanum yara anafaanom yan aŋare mee bu marem ban yo nja aŋar be émir wammee néjool ? Bakaaneruul bufeegut.” » 6 Ñeer acookoora aahu natoogeniil nagaaniil gúboñ gaagu.
7 Gutii Suseef ngurogool : « Waa ucile aw ammee anafaanóli, nulob gurim ganogoor mee mee ? Elí uhaañiut ekaan waaf naŋ waawu ! 8 Nꞌejaalóli étiyaara, utootook síkori dó nꞌgulaacenóli. Bare nubaañenuluubaañen so kábiriŋ Kanaan. Ñeer buu mbile ekaan min úkuet síkori nꞌéwurus dó yaŋ anafaani ? 9 An han ubilaal mee etook dó nꞌfulaacenool éraanum yaayu, mbil umugool. Ban éli bu gáani emiigeeli. » 10 Násuupiil arogiil : « Iyoo, nisonsoŋ ! Ukaanaal wan jilob mee. Bare an han ubilaal mee etook yo nꞌfulaacenool, ho bu gáani amiigeelom, min bugaagu guwaay. » 11 Ñeer anooan nawaaken awalenúl fulaacenool min ajal fo. 12 Acookoora aahu namundum aŋaalo nꞌfulaacen fara ati'iil anafaan jaram átiiŋ nꞌfara ati'iil áriita ; dó natook mee éraanum yaayu nꞌfulaacen fara Benseme. 13 Ngujis újuwoiil caac mara min táañi'iil. Anooan nabaañen bútebool nꞌefalo'ool, min gubaañ bu bo nꞌésuk yaayu.
Suda náginden Benseme
14 Suda bugo nꞌgutiool ngútiiŋ nu yaŋ Suseef ngutoogool to, nguyah gújuul kírib fácilool min gúciinool gabonket. 15 Suseef narogiil : « Waa ucile njikaan mee ? Buguul jímirut mara amaañen hanogoore naŋ ínje, álibenliben be émir wam bo mee néjool ? » 16 Suda násuupool arogool : « Aw ammee anafaanóli, waa nújuhe ulobi ? Ujúhut urien. Atúuha fannaool añoñow bakaaneróli bafeegut mee. Elí ñeer bu gáani emiigeeli bu nꞌan aahu ró haŋar mee éraanum yaayu akaan dó nꞌfulaacenool. » 17 Ñeer Suseef narogiil : « Muk ! Mat ikaan mo. Han itook mee éraanum yaayu nꞌfulaacenool, ho noonool nibile eŋar ikaan amiigeelom. Buguul njibaañ nꞌgásuumaay bu bo mꞌpaayuul. »
18 Suda nacik Suseef min arogool : « Anafaanom, aw ukankaan an atakajom naŋ áyiih aahu hara Esípt. Yo ecil mee, ínje umu néciini jambil uñigen bu nꞌínje. Bare ubonket újiom min ilobi elob ye. 19 Nꞌejaalóli étiyaara usonkenólisonken teer paayóli nꞌatióli acee ubugu bo mꞌburoŋ. 20 Núsuupi urogi : “Paayóli umu bo mꞌburoŋ bugo nꞌatióli áriita han abaj mee mꞌbafallenerool. Nábooliool máamak mara ho noonool naŋañene nꞌakoñaool han areg mee nacamene. Aleehool aahu nacecet.” 21 Nurogóli uŋaruli ho nuñowool. 22 Nurogi : “Aleeh aahu ájuhut ápur to mꞌpaayool mara néeni ápurulo to, paayool be ecet.” 23 Bare nurogóli : “Néeni atiuul áriita ajawooruloot mꞌbuguul, mat iyabuul.” 24 Ñeer, nan ubaañ mee bu bo mꞌpaayóli, ammee ájagagai, nulobool gurimi peepe. 25 Paayóli narogóli : “Jibaañ jínoomul múcahoaay.” 26 Núsuupool urogool : “Elí újuhut ubaañ bu bo baŋarut atióli áriita mara ajawulena hara Esípt agaanóligaan mat ayabóli éeni ajawoorut nꞌéli.” 27 Paayóli násuupoli arogóli : “Buguul jímimir mara akoñaom Raseel guleeh gumaañen gúruba déhooro nabajaam. 28 Aahu alilliim, nijok énunkureŋ futaŋaat yoohool émer. Kábiriŋ no bu jaat, ibaañut iñowool. 29 Njicamen bandiŋ ébaañul jiŋar aahe aleeh ! Nífaanul mee, néeni waaf ubajool dó nꞌgajawooruul, ínje be ecet nꞌgáwusaet mara búkaanumuul.”
30 Ñeer anafaanom, tan emmaa maa, mat íjuh ibaañ bu bo mꞌpaayom baŋarut aleeh aahu, mara nu ho nabaŋe yaaloorool. 31 Néeni ubaañ añowutool, éli újagagai be ecilool nacet nꞌgáwusaet nꞌfufallenool. 32 Ban ínje irorok paayom akat aleeh aahu nꞌguñenom. Nirogool néeni ibaañenuloohool, nibij nu ho bu nanoonan. 33 Níciiniciin, ujogom taahe naŋ amiigeeli, min ukahen aleeh aahu naat nꞌgutiool. 34 Mat íjuh ibaañ bu bo mꞌpaayom baŋarut aleeh aahu nijow. Ibiloot éjuh ihankulenoor neñow mátaañie mabil mee eloh paayom. »