6. Atúuha najok bapaalay n'Aburaham
6. Dieu crée une alliance avec Abraham
Aburam najam gawook gara Atúuha
1 1 Acehériit mee narok Aburam :
« Púr mꞌmofi,
nꞌfiili,
nꞌfukeelum fara paayi,
min ujow bu mꞌmof man ibil mee eliigi.
2 2 Injé be ekaan min búbajumi bumeeeŋ,
Injé bu gásoonieni.
Ban be ekaani min ujamo,
miiya mubil mee ecil nísoonien bugan gaagu.
3 3 Gabili mee gásoonien – be ésoonieniil.
Bare gabili mee gadanka – be edankaiil.
Miiya mucile nísoonien fiilóofiil nꞌdúniya. »
4 4 Ñeer Aburam nápur ajow naŋ min Acehériit mee arogool mee,
ngujawoor bugo nꞌLoot aleeh hara atiool.
Nan Aburam ápur mee Haran,
ho min abaje símit gafaŋ gúfaajiir nꞌguñen gaat (75).
5 5 Aburam naŋar akoñaool Saaray bugo nꞌLoot,
nguŋar emiigeeliil gan gunoomulo mee Haran nꞌfubajiil peepe min gujow bu Kanaan.
Gútiiŋ to Kanaan,
6 6 ngútip mof maamu káŋ bu Sisem,
to mꞌbununuk báamak baabu bara Moore.
Nin naanu unu bugara Kanaan gucineene dó nꞌésuk yaayu.
7 7 Acehériit mee nápurul to Aburam narogool :
« Mꞌbúbajumi nibil mee esen mof mee.
» Ñeer Aburam nateep to fúsimenum bu nꞌAcehériit mee mara nápurulool to.
8 8 Púr to najow bu Betel ban bunak búpureul mee nꞌgapana gan simontaañ saasu sommee.
Naŋar gabaas min ayihen éguut etuhoor Betel ban bunak bulohe mee,
son ésuk yan guroge mee Aay ban bunak búpureul mee.
Nabaañ ateep to fúsimenum fucee bu nꞌAcehériit mee min nak áciin to Acehériit mee.
Bapaalaay Atúuha nꞌAburam
9 1 Nan púr to mee,
Acehériit mee nalob nꞌAburam nꞌsíyaut.
Narogool :
« Aburam,
jambil úsebi !
Injé ebangal bu gapooyi ban be eseni bacaam báamak. »
10 2 Aburam násuupool arogool :
« Acehériit mee,
Atúuhaom,
tíiŋut bacaamom mara ibajut aleeh ban íjuhut ebaj aleeh.
Eliyeseer hara ésuk yara Damaas ho abilaam etun. »
11 3 Nabaañ arogool :
« Naŋ min usenutaam mee gabugoor,
ájagaga hara yaŋom abile etun fubajom. »
12 4 Acehériit mee narogool :
« Haani !
Let ho abili etun,
bare aleeh han aw fannai ubile ebaj. »
13 5 Acehériit mee narogool ñeer ápurul bu tíyaŋ.
Nabaañ arogool :
« Apu úkaken min upin siwuut saasu,
néeni aw be éjuh.
» Nabenen arogool :
« Búbajumi mee mbubile emeeŋ. »
14 6 Aburam gáyinenool Acehériit mee,
gucile najogool an átilintiliŋ.
15 7 Acehériit mee nabenen arok Aburam :
« Injé emmee Acehériit mee ápurenuli mee nꞌésuk yara Uúr yammee dó Kalide,
be eseni mof maamu tan oommee mee jaat,
mbil mukaan miiya. »
Atúuha nálowul gajow Aburam narogool Aburaham mara bapaalaayiil
16 1 Nan Aburam abaj mee símit gafaŋ gubaagiir nꞌsímit guñen gaat nꞌsibaagiir (99),
Acehériit mee nápurulool.
Narogool :
« Injé emmee Atúuha ara sembe.
Ulagenom nanoonan,
ban uroŋ buroŋ babilaam ésuum.
17 2 Injé be ekaan bapaalaayola mbuliŋ :
búbajumi be emeeŋ máaamak. »
18 3 Aburam nayah gújuul,
nayah fúriiŋool nꞌetaam.
Atúuha naroŋ nelob nu ho.
19 4 Injé,
wan ibil mee ekaan mꞌbapaalaayola uwee :
aw be ekaan pay giil gamemmeeŋ.
20 5 Maareer let gajai Aburam.
Gajai Aburaham (yo yommee :
pay giil gamemmeeŋ) mara ínje be ekaan nꞌaw pay giil gamemmeeŋ.
21 6 Injé be ekaan búbajumi mbumeeeŋ jaram guyihen giil gamemmeeŋ,
ban gúyiih be épurul nꞌaw.
22 7 Bapaalaayom nꞌaw,
ínje bu gasuten bo káŋ bu mꞌbúbajumi,
nꞌgambacóogambac gaam bo néjool.
Bapaalaay be bara ñáleb,
mimbil ikaan Atúuhai nꞌhara búbajumi peepe babil mee éjool mꞌbúsoli.