(Audio et chansons de ce chapitre disponible dans Aburaham)
Atúuha nálowul gajow Aburam narogool Aburaham mara bapaalaayiil
17
Nan Aburam abaj mee símit gafaŋ gubaagiir nꞌsímit guñen gaat nꞌsibaagiir (99),
Acehériit mee nápurulool.
Narogool :
« Injé emmee Atúuha ara sembe.
Ulagenom nanoonan,
ban uroŋ buroŋ babilaam ésuum.
2 Injé be ekaan bapaalaayola mbuliŋ :
búbajumi be emeeŋ máaamak. »
3 Aburam nayah gújuul,
nayah fúriiŋool nꞌetaam.
Atúuha naroŋ nelob nu ho.
4 Injé,
wan ibil mee ekaan mꞌbapaalaayola uwee :
aw be ekaan pay giil gamemmeeŋ.
5 Maareer let gajai Aburam.
Gajai Aburaham (yo yommee :
pay giil gamemmeeŋ) mara ínje be ekaan nꞌaw pay giil gamemmeeŋ.
6 Injé be ekaan búbajumi mbumeeeŋ jaram guyihen giil gamemmeeŋ,
ban gúyiih be épurul nꞌaw.
7 Bapaalaayom nꞌaw,
ínje bu gasuten bo káŋ bu mꞌbúbajumi,
nꞌgambacóogambac gaam bo néjool.
Bapaalaay be bara ñáleb,
mimbil ikaan Atúuhai nꞌhara búbajumi peepe babil mee éjool mꞌbúsoli.
8 Taahe tan ucin maa maa,
aw para ajawoora.
Mof me mara Kanaan ínje be eseni mo peepe,
aw mꞌbúbajumi.
Mo be ekaan mooliil bu nanoonan,
ban ínje be ekaan Atúuhaiil.
9 Atúuha nabaañ arogool :
« Min aw Aburaham,
ujok bapaalaay baabu liŋ.
Búbajumi,
nꞌgambacóogambac,
ngúkaanum may bapaalaay baabu.
10 Fuyuhoum fan ibili mee esen aw mꞌbúbajumi ufee :
amaañenóomaañen be esunnai.
11 Gasunnauul,
go guñum mee eliik fúfaasum fara bapaalaayolaal.
12 Gambacóogambac guleeh gaagu gumaañen bu nak gusunnai,
bugo babajer gunak futok nꞌgúfaajiir.
Nukaan mo may emiigeeli peepe :
gabaji to mee nꞌaw,
nganaput mee nꞌfiili gan unoomulo mee tíyaŋ.
13 Bajut han ubile ekat bo :
emiigeel gabaji to mee síndoi son gan unoomulo mee,
be esunnai.
Ñeer érangamaasi yabil mee galako dó nꞌsiniinuul,
ebil mee ekaan min bapaalaayom bulako mꞌbuguul bu nanóonan.
14 Bare amaañen asunnauti mee,
bu gápurenool dó mꞌbuganool,
mara ajogut bapaalaayom. »
15 Atúuha nabaañ arok Aburaham :
« Mara akoñai :
maareer let gajaool Saaray.
Gajaool Saara.
16 Injé be ésoonienool ban nu ho niñum mee eseni aleeh amaañen.
Eem ínje be ésoonienool,
ho be ekaan jaw giil gamemmeeŋ ban gúyiih be épurul nu ho. »
17 Aburaham nabaañ ayah gújuul,
nayah fúriiŋool nꞌetaam,
naber.
Narok dó mꞌbúyegehool :
« Injé ibaje símit ceme (100),
mee bu gabugoor ?
Ban Saara abaje símit gafaŋ gubaagiir nꞌsímit guñen (90),
mee ho be éjuh abaj aleeh ? »
18 Aburaham narok ñeer Atúuha :
« Upooyom Isumayeel déhooro ;
sambil abaak ! »
19 Atúuha násuupool :
« Haani let mo.
Akoñai Saara fannaool abili ebaj aleeh amaañen,
nurogool Isaak (yo yommee :
eber).
Bu gasuten bapaalaay baabu nu ho káŋ bu mꞌbúbajumool,
nkaan bapaalaay bara ñáleb.
20 Mara Isumayeel,
ijanjam báciineri.
Injé bu gásoonienool,
búbajumool be emeeŋ máaamak.
Eséef goono guñen nꞌgúruba be ebaji dó,
ban ho bu gáani pay afaan hara sísuk samemmeeŋ.
21 Bare nꞌIsaak nibile gasuten bapaalaayom,
aleeh han Saara abili mee ebaj toon timaa maa. »
22 Atúuha nan afaak mee elob nꞌAburaham,
nakahool to najaw.
23 Ñeer Aburaham naŋar aleehool Isumayeel,
nꞌemiigeelool :
gabaji to mee nu yaŋool nꞌgan anoomulo mee.
Ñeer umaañen gan to mee nu yaŋool peepe nasunnaiil fo funak naŋ min Atúuha alobool mee akaan.
24-25 Aburaham abaje símit gafaŋ gubaagiir nꞌsímit guñen gaat nꞌsibaagiir (99),
aleehool Isumayeel nabaj símit guñen nꞌsífaajiir (13) nan gusunnai mee.
26 Funak fanur faafu ngusunnai,
27 nu ganur nꞌumaañen gan to mee peepe nu yaŋ Aburaham nꞌemiigeel gabaji to mee,
nꞌgan anoomulo mee tíyaŋ.