5. Atúuha napagen Nowé bugo n'fiilool (2)
5. Dieu sauve Noé et sa famille (2)
Nówe nápurul dó mꞌbusaana baabu
13 13 Nꞌfunak fútiyaara fara émit yan Nówe abaj mee símit siceme futok nu yanur nꞌémit yanur (601),
mal maamu no mmuyond mee nꞌetaam yaayu.
Nówe nápuren gañuuh gara busaana báamak baabu najegoor,
nañow mara etaam yaayu efuufuur.
14 14 Nan fujenna fúruten fubaj mee gunak gafaakan nꞌfutok nꞌgúruba (27),
etaam yaayu nehay kaŋŋ.
15 15 Ñeer Atúuha nalob nꞌNówe arogool :
16 16 « Upúrul dó mꞌbusaana baabu aw buguul nꞌakoñai,
nꞌguleehi gumaañen nꞌukoñaiil.
17 17 Núpurenul sínunkureŋ saasu peepe san to mee nꞌaw :
sikaj saasu,
upuu waawu,
son sínunkureŋ sáfuuloore mee nꞌetaam mimbil sifanjoor nꞌetaam yaayu nsibugoor meeeŋ. »
18 18 Ñeer Nówe nápurul dó mꞌbusaana baabu bugo nꞌakoñaool,
nꞌguleehool gumaañen nꞌukoñaiil.
19 19 Sínunkureŋ saasu peepe,
bu nꞌsikaj saasu,
sínunkureŋ sáfuuloore mee nꞌetaam son upuu waawu ró,
púrulopur may mꞌbusaana baabu,
gayooŋóoyooŋ mꞌbúnogoor go.
20 20 Nówe nateep to fúsimenum bu nꞌAcehériit mee.
Naŋar dó nꞌsínunkureŋ saset mee son dó nꞌupuu waset mee ásimen dó nꞌfúsimenum faafu,
nasow jaram reem.
21 21 Acehériit mee nan ajam mee gatiiŋ gásuum mee gara búsimen baabu,
narok dó mꞌbúyegehool :
« Maareer búkaanum an mat bucil nidanka benen etaam yaayu,
haani min gapinoor bugan gaagu peepe gufeegut mee kábiriŋ nꞌfuleeheiil.
Ñeer mat inimen benen wayife mee peepe naŋ min ikaan mee.
22 22 Dúniya ñeer neroŋ mee nejow maa :
eruugiit nꞌeyim,
ñook nꞌgásupa,
fúrih nꞌfureh,
fuk nꞌtufunak,
bu gabajo bu nanoonan. »
Atúuha napaalaay nꞌNówe bugo nꞌguleehool
23 1 Atúuha násoonien Nówe bugo nꞌguleehool arogiil :
« Jibugoor njimeeŋ jaram jipuusen etaam yaayu.
24 2 Sínunkureŋ saasu peepe sammee nꞌetaam,
upuu waawu peepe wáyihe mee,
sínunkureŋ saasu peepe sáfuuloore mee nꞌetaam son bucaaŋen baabu peepe bara fal bu gásebiuul máamak.
Dáaru peepe úru nꞌguñenuul.
25 3 Wanoowan wagoroore mee nuyif mbil wáani fúcahouul.
Dáaru peepe isenuusen dó,
naŋ min isenuul mee utoj watiñei mee.
26 4 Bare jambil jitogoñ eluu nꞌfúsim yo ró.
Ifírenuufiren yo,
mara fúsim fo fucil mee buroŋ.
27 5 Fúsimuul fo fommee buroŋuul,
yo ebil mee ecil nisonken énunkureŋoonunkureŋ yabil mee emuk an,
mo may nibil mee gasonken an amuk mee apaalool an.
Bu gasonken waa ucile min fúsim an fúyuhi.
28 6 Anooan áyuhe fúsim fara an,
acee may be éyuhool fúsim,
mara Atúuha átuutuut an anogoor nu ho.
29 7 Min buguul,
jibugoor meeeŋ njifanjoor banooban nꞌetaam yaayu. »
30 8 Atúuha nabaañ arok Nówe bugo nꞌguleehool :
31 9 « Injé ijoguujok bapaalaay bu mꞌbúbajumuul bam bo mee néjool ró,
32 10 son may wan to mee mꞌbuguul :
upuu waawu,
sikaj saasu,
sínunkureŋ sara futaŋaat,
wayife mee peepe wapúrulo ró mee mꞌbusaana baabu son sínunkureŋ saasu peepe sammee nꞌetaam yaayu.
33 11 Injé fuyuhoumom dó mꞌbapaalaay baabu ufee :
Mat ibaañ iwalenul mal mabile ganimen wayife mee peepe nꞌetaam yaayu,
mat benen baj mal mabile ganimen etaam yaayu. »
34 12 Atúuha narok benen :
« Fúfaasum fara bapaalaay baabu ban ijoguul mee,
bu nꞌwayife mee peepe wan to mee mꞌbuguul ró,
nꞌgambacóogambac gam bo mee néjool,
ufee :
35 13 Ikankaan gariba dó nꞌútuul waawu mbil góoni fúfaasum fara bapaalaayom nu wammee nꞌetaam.
36 14 Nan ibil mee ekaan émit nemoocen,
min gariba gaagu gúpurul dó nꞌútuul waawu,
37 15 no nibil mee gawosen bapaalaayom mꞌbuguul son wayife mee peepe.
Mal máamak mat muwaloul benen bu ganimen wayife mee peepe.
38 16 Gariba gaagu dan gommee nꞌútuul waawu,
nan ibil go mee eñow,
niwosen bapaalaay baabu bara ñáleb etuhoorom nꞌwayife mee peepe wammee nꞌetaam. »
39 17 Atúuha nabenen arok Nówe :
« Dáare emmee fúfaasum faliik mee bapaalaayom nꞌwayife mee peepe nꞌetaam. »