4. Atúuha najok émiremma min átuut mee duniya, napagen Nowé bugo n'fiilool (1)
4. Dieu regrette d'avoir créé le monde et sauve Noé et sa famille (1)
Atúuha naliik Nówe bulago bara epak
5 5 Acehériit mee nañow mara bugan peepe gammee nꞌetaam gúlaalaaj bálaaj.
Funagóofunak upinooriil ekaan mákojie déhooro.
6 6 Ñeer Acehériit mee najok émiremma min átuut mee an baabe nꞌetaam,
ntáañiool máamak.
7 7 Acehériit mee narok :
« Injé be ewuut nꞌetaam yaayu bugan gaagu gan ítuut mee bu nꞌsínunkureŋ saasu ró,
nꞌsáfuuloore mee,
nꞌupuu waawu ró.
Maregen maregen ijojok émiremma nꞌwan ítuut mee. »
8 8 Bare Acehériit mee nabaj gabonket nꞌNówe.
9 9 Waawe ubaj mee nꞌfiil fara Nówe.
Nówe kankaan amaañen átiliŋe.
Dó mꞌbuganool ho noonool áyinen mee Atúuha.
10 10 Nówe abaje guleeh gumaañen gúfaajiir :
Seem,
Haam nꞌJaafet.
11 11 Atúuha nañow mara bugan gammee nꞌetaam maareer gurege basigo.
Múlaaj mmufik nꞌetaam yaayu.
12 12 Atúuha nañeer etaam yaayu,
nañow mara efeegut bafeek :
bugan gaagu peepe bakaaneriil bujagut haani fáriita.
13 13 Ñeer Atúuha narok Nówe :
« Ijojok bu ganimen bugan gaagu peepe.
Múfeegaahi'iil mucile min múlaaj mufik nꞌetaam yaayu.
Injé ñeer bu ganimeniil ísuupoor dó nꞌetaam yaayu.
14 14 Bare aw uŋar ubabar wahanke kaŋ min ucookoor busaana báamak bu nꞌaw,
babaje úsaag wamemmeeŋ.
Ufaak nuŋar egodoroŋ min unaanen far bo son tíyaŋ.
15 15 Aw be ekaan bo maa :
Gabaak bo be étiiŋ simetaar ceme nꞌgafaŋ gúruba nꞌguñen (150),
muwuŋ bo be étiiŋ simetaar gafaakan nꞌfutok (25),
mbúrooken butum simetaar guñen nꞌgaat (15).
16 16 Nukaan bo gañuuh,
nukat eŋaan butum gañen bu nꞌécugut etuhoor gañuuh gaagu son ubereberef waawu.
Nukaan bo gápeegum nꞌgahaja,
mbubaj sitaah sífaajiir.
17 17 Min ínje,
bu gawalenúl mal máamak mabile epiis mꞌmof maamu peepe mmunimen wanoowan wammee neyif nꞌetaam.
Wanoowan wammee nꞌetaam,
wo be ecet.
18 18 Bare ínje be ejogi bapaalaay.
Aw bu ganogen dó mꞌbusaana baabu,
buguul nꞌakoñai nꞌguleehi nꞌukoñaiil.
19 19 Nuŋar dó may wábuto'oore nꞌwayife mee peepe úrubaruba umaañen nꞌukoña,
mbil upak ecet nu ganur nꞌaw.
20 20 Sínunkureŋ saasu be éjool síbuto'oor,
upuu waawu núbuto'oor son may sínunkureŋ sáfuuloore mee nsíbuto'oor,
wo peepe be éjool úrubaruba bu to nꞌaw mimbil upak ecet.
21 21 Nuŋar mutiñóotiñ ubaŋ búfaen mimbil jibaj múcahoaay bu nꞌsínunkureŋ saasu ró. »
22 22 Ñeer Nówe nasoŋ nakaan wan Atúuha arogool mee peepe.
23 1 Púr to,
Acehériit mee narok Nówe :
« Unogen dó mꞌbusaana báamak baabu aw nꞌfiili mara iñoñow aw urege min útiliŋe dó mꞌbugani.
24 2 Dó nꞌsínunkureŋ san iseni mee bulago bu gásimen,
gayooŋóoyooŋ ganogoore,
nuŋar dó simaañen futok nꞌsíruba,
sikoña futok nꞌsíruba.
Bare nꞌsínunkureŋ sasehut mee bu gásimen,
gayooŋóoyooŋ ganogoore,
nuŋar dó emaañen nꞌekoña déhooro.
25 3 Nuŋar dó may upuu úbuto'oor úrubaruba gamaañen nꞌgakoña ñoono futok nꞌñáruba mimbil újuh upagen wo nꞌetaam yaayu jambil unim.
26 4 Ŋañoe gunak futok nꞌgúruba ínje bu gawalenúl mal máamak.
Emít bu galub gunak gafaŋ gúruba (40),
fuk nꞌtufunak báyolout,
min iwuut nꞌetaam yaayu wayife mee peepe wan ítuut mee. »
27 5 Ñeer Nówe nakaan wan Acehériit mee arogool mee peepe.
Atúuha nawalenul mal máamak bu ganimen bátuuherool
28 6 Nan mal máamak maamu mubenjoor mee nꞌetaam yaayu,
Nówe babajer símit siceme futok nu yanur (600).
29 7 Nówe anogennogen dó mꞌbusaana báamak baabu,
bugo nꞌakoñaool nꞌguleehool gumaañen nꞌukoñaiil mimbil gupak mal máamak maamu mabil mee gawaloúl.
30-31 8-9 Sínunkureŋ saset mee bu gásimen son sasehut mee,
nꞌsínunkureŋ sáfuuloore mee nꞌetaam nsíjool emaañen nꞌekoña son upuu waawu,
nsitook Nówe to mꞌbusaana baabu,
naŋ min Atúuha arogool mee.
32 10 Nan gunak gaagu gammee futok nꞌgúruba gútiiŋ mee,
mal máamak maamu mmuwaloúl nꞌetaam yaayu.
33 11 Nꞌémit yan Nówe abaj mee símit siceme futok nu yanur (600),
nꞌfunak fakaan mee guñen gaat nꞌgúruba (17),
nꞌfujenna fúruten,
no ufuy waawu wan dó mee nꞌetaam bu nꞌwara fal fáamak ró peepe,
úbul mee bábul.
Upéegum wapeege mee mal wammee nꞌémit núpeegulo may
34 12 mimbil émit ewalenúl mal nꞌetaam wátiiŋe gunak gafaŋ gúruba (40),
fuk nꞌtufunak báyolout.
35 13 No nꞌfunak faafu Nówe anogen dó mee mꞌbusaana báamak baabu bugo nꞌakoñaool nꞌguleehool gumaañen gammee Seem,
Haam nꞌJaafet,
nꞌanooan akoñaool.
36 14 Nárur dó may sínunkureŋ saasu peepe síbuto'oor,
sikaj saasu peepe síbuto'oor,
nꞌupuu waawu peepe úbuto'oor may son sínunkureŋ sáfuuloore mee nꞌetaam peepe sábuto'oore.
37 15 Ñeer wayife mee peepe nújool úrubaruba unogen dó mꞌbusaana bara Nówe.
38 16 Ujaalojow úrubaruba umaañen nꞌukoña bu dó mꞌbusaana baabu,
naŋ min Atúuha arogool mee.
Ñeer Acehériit mee napeek gápeegum gaagu abaañen dó Nówe.
39 17 Mal maamu muwaloulowalo nꞌetaam yaayu wátiiŋe gunak gafaŋ gúruba (40).
Nan mubenjoor mee nꞌetaam,
mmuyibul busaana baabu,
mburend.
40 18 Min mal maamu murege mee mmubenenoe,
busaana baabu mo mburendoore mee,
mal maamu mmuŋaroor bo.
41 19 Mal maamu mujinjiŋ máaamak jaram muguben simontaañ sareg mee nsírookene.
42 20 To nꞌélaut simontaañ saasu,
mmujiŋ benen wátiiŋe simetaar futok nꞌsíruba.
43 21 Wanoowan wagoroore mee nꞌetaam yaayu nuyif :
sikaj saasu,
sínunkureŋ saasu,
upuu waawu,
sínunkureŋ saasu sáfuuloore mee nꞌetaam,
mꞌbugan nu mo ró,
cecet peepe.
44 22 Wanoowan wammee neyif nuroŋ nꞌetaam yaayu,
ucecet.
45 23 Acehériit mee maa nawuut maa maa waroŋeen mee nꞌetaam yaayu :
kábiriŋ nꞌan,
nꞌekaj,
nꞌénunkureŋ,
nꞌgapuu son énunkureŋ yáfuuloore mee nꞌetaam,
nimeninimen jaram ŋaño Nówe mꞌbuganool son wan gulako'oor dó mee mꞌbusaana baabu.
46 24 Mal maamu mmuroŋ gabenjoor nꞌetaam yaayu wátiiŋe gunak ceme nꞌgunak gafaŋ gúruba nꞌguñen (150).
Mal máamak maamu mmuwalo
47 1 Bare Atúuha amojenut Nówe son sínunkureŋ saasu peepe nꞌsikaj saasu san gulako'oor dó mee mꞌbusaana báamak baabu.
Atúuha nakahenúl érus bu nꞌetaam min mal maamu muwalo.
48 2 Ufuy waawu nutojo,
úpeegum waawu may wammee nꞌémit nupeego.
Emít yaayu néyolo galub.
49 3 Ñeer mal maamu mmuwaloe mee fáriit fáriit,
nan gunak gammee ceme nꞌgunak gafaŋ gúruba nꞌguñen (150) gútiiŋ mee,
50 4 busaana baabu mburaaho nꞌsimontaañ san dó mee mꞌmof man gurege mee Araraat.
Nkaan funak fakaan mee guñen gaat nꞌgúruba (17),
nꞌfujenna fakaan mee futok nꞌgúruba.
51 5 Mal maamu mmuroŋ ngawalo káŋ bu nꞌfujenna fakaan mee guñen.
Nꞌfunak fo fútiyaara,
sílaut simontaañ saasu nsirijúl.
52 6 Nan tíiŋ mee gunak gafaŋ gúruba (40),
Nówe nápeegul butum ban akaan mee fatiya nꞌgañuuh busaana baabu.
53 7 Nápurenul gagaanaar ngúyit nak gujow ngúbaañul káŋ bu nan mal maamu mubil mee eyond nꞌetaam yaayu.
54 8 Nówe nakahen may épaagiit min éyit mimbil ámir teer mal maamu múŋesuloŋesulo nꞌetaam yaayu.
55 9 Bare épaagiit yaayu ebajut tan ebile ekot,
mara mal maamu murondoŋ ngabenjoor nꞌetaam yaayu.
Nébaañul bu to nꞌNówe mꞌbusaana baabu,
nañuhen gañenool najok épaagiit yaayu min abaañenúl yo bu dó mꞌbusaana baabu.
56 10 Nanaak gunak futok nꞌgúruba,
nabaañ akahen yo néyit.
57 11 Njow jooŋoor maa gárusa,
nébaañul bu to nu ho min eñuhulo gatoj gáninif gara bununuk ban gurege mee buoliiw.
Nówe no námir mee mara mal maamu múŋesuloŋesulo nꞌetaam yaayu.
58 12 Nabaañ anaak gunak futok nꞌgúruba,
nakahen benen épaagiit yaayu néyit.
Bare ñaañe ebaañuloot bu to nu ho.