Yuda 1

Wakita ana

YUDA

a wetse ya

1 Iye Yuda, mala megemir Yesuw Kiristi, dite iye damər Zakup mbaŋa. I wetseha wakita aaha ka, a kurum gà mburma ana Mbulum Tsir kwa a waya ya. A pala kurum kamala gà mburma ŋgar a, dite a riŋ a kesle a kurum nda təv Yesuw Kiristi ya. 2 I heme a a Mbulum, dite ka, ka ndzumar are tsehe, mə vəl a kurum matasla yam a gəzləŋ kurum, nda ŋgwal ŋgar ana a waya dər kurum a. Gà dukw ata mà rah a gəzləŋ kurum, ma da aka miɗ aka miɗ lele.

Seriye Mbulum ana a ta ge a aka gər gà ɓəzla medzeŋge

a mburma nda pàrsa

2 Piyer 2:1-17

3 A kurum gà masla gà ana i waya kurum hinne ya. Ana ka, a sèsiŋ mewetse a kurumaha wakita hinne, agəra bazlam ŋgiɗ zləmana, aà meɗìfè a kurum dər ka, meme na Mbulum a mbəl à kwa tserdze ya. Ama i samata ka, ŋgulum i wetse a kurumaha kinehe, aɗaba mə vəl a kurum ndzəɗa, dite ki mirwim a aba nda təv bazlam ŋgwal ŋa ana kə̀ gəsum a ivaɗ. Mbulum a vəl ahər ka, a gà mburma ŋgar gà tsəɗaŋŋa ŋana. Bazlam ata ka, à mbìɗ a aba tsidze. 4 I tsik taŋa ka, aɗaba gà asiŋ gà mburma ana tə sər Mbulum tsiye, tàa lèlekwera nda wirwir a lìlikw lìlikw a liwiŋ mayahaba gər kurum gà mburma Mbulum a. Gà mburma ata ka, gà ŋgwal ŋa tsa. Aɗaba tar riŋ ti yehe a vatwa aà məmbə̀ɗà à ŋgwal Mbulum ana a ge a kwa ya. Ta gwa: Mbulum aka vəl a mə̀r vatwa aà mege dukw ana a sàs a mə̀r a. Ku mege bakal awara tekeɗe ka, mìi ziwe ahər a gər mə̀r pəra. Kamala taŋa ya, ti niw Yesuw Kiristi ana ŋgat ilik Əbay kwa ana a kwere a kwa mbaŋa ya. Akahər ata piŋŋe ta wetse i wakita Mbulum ka, ta gwa, meme na seriye Mbulum a ta gis a gà medzibe gà mburma ata ya.

5 Ku mege kàa sərum gà bazlam ata daga piŋŋe tekeɗe, a sèsiŋ ka, i me a kurum a dərraha a gà gər, meme na Mbulum a beyera à gà mburma Isərayel ika ahəɗ Ezipt akahər ata ya. Ama i dəba ŋa ya ka, a bats iɗəm gà mburma ana ta gəs bazlam ŋgar tsiye, ika magər gà mburma ata a beyera à tar a. 6 Gà gawla Mbulum ana i gər ŋa ya tekeɗe, gà asiŋ ŋa iɗəm, a sàs a tar təv mendze ana Mbulum a vəl a tar kəla biy tar a tsa, ta miyak dər. Aɗaba taŋa na Mbulum a hə̀ndə̀k aà tar a təv luvuŋ ana ziŋziŋ ŋa ya ya. Ti ndze a i fata ka, gà madzàwàyà ŋa nda kedirtsè handəslndəsl aà biybiy. Ti ndze a i fata asa ka, ta bebe a haa a pat seriye Mbulum ana batsah ŋa a ta ge a a gà mburma tserdze ya. 7 Gà kwite ata tə zal a tar gà Suduma nda Gumura, dite gà asiŋ gà kwite ana ta mbe a taraha ya ka, ta məts a kurum gər tsa mbaŋa. Gà mburma ana i fata ya ka, ta gewa mezelme, kamala na gà gawla Mbulum ata ta ge a ya. Ta gewa ka, dukw ana ŋgwal ŋa tsiye pampam, a tsahən biy mege a kurum tsiye, dite biy metsike tsa asa ya. Mbulum a tàtə̀k a gà mburma ata ka, a dza tar a akwa ana a mbete a tsa aà biybiy a. Kamala taŋa ya, Mbulum a be à ɗaf a gà mburma tserdze kataya ka, dite ku weke ma sər dər, Mbulum a ge a medzibe gà mburma ata ka, kataya.

8 Kamala taŋa ya, gà ɓəzla pàrsa ata tə dara aka magər kurum a ka, ta geye a medzibe gà dukw bakal ata mbaŋa. Sunwa a de a aka teriŋa, dite i dəba ŋa ya, ta ge a dukw mezelme ba tar ata kuɗa. A sàs a tar na Mbulum a kwere a tar a tsa. Ti ndeveye a a gà gawla Mbulum ana tar riŋ nda gà mezlibe tar ana tì zlibe a à ter a ya mbaŋa asa. 9 Ku mege Misel ana ŋgat batsah ŋa ika magər gà gawla Mbulum tserdze ya tekeɗe, aka tsik dukw ana ŋgwal ŋa tsiye aà Əbay sitene ɓav tsa. Aɗaba akahər ata piŋŋe, i təv ana tar nda Əbay sitene ta ge maàga aka məməta Musa ya, aà misire dər ka, weke na a zle a məməta ŋa ya ya. Misel aka gwa ka, làŋa iye batsah ŋa ya, aka ndava a Əbay sitene ata tsa. A sasar na Mbulum ma kwara akaba ŋgat, mà tàtə̀kar a. 10 Ama gà ɓəzla pàrsa ata ka, ti tsik a dukw ana ŋgwal ŋa tsiye aà gà dukw ana tə sər tsiye ya. Tar ti zezem a ka, dukw meeweke ba tar ɗekɗek, metsehe tar a riŋ tsa. Ti ne ka, kamala dukw dala ya. Kamala taŋa ya na ti dzeye à ba tar a. 11 Dukùla na a ge a ter a ŋgùlum i fata ya? I tar ka, waya ba tar a. Aɗaba ana tə zazam vatwa Kayinu, wele ana a kəɗ damər ŋgar a. Dite tar ka, ta vəl ba tar a mege dukw ana ŋgwal ŋa tsiye, aà maŋgata dər siŋgwe kamala ana Balaam a ge akahər ata ya mbaŋa. Tar ka, tàa dzeye, aɗaba ana ta ge guvəl aà Mbulum, ta waya mezìwè gər tar a, kamala dukw Kura ana a ge akahər ata, duwa a fàlàh ŋgat, dite ka, a mət a. 12 I təv ana kurum mandza ŋa i təv ilik ŋa nda gà tar, ki zimwim a akaba a ɗaf a ka, tar ka, sirikw sirikw ti ne kamala aruwaŋ ana aà petek a, a tsahən dər tsiye ya. Ta mìts a ka, aà mazəma dukw ana zìhhwe a sle a ter a lele, magəɗa a ge a ter a dər tsidze, ti dzeye a ka, a ba tar ɗekɗek a. Tar ti ndzikiɗ ba ka, kamala hulɓukw ana pəlŋgar pəlŋgar himbiɗ à sìweye a dər aà gəza mbulum masakəŋa taf, yam à dzère a iɗəm a tsiye. Tar asa ka, kamala dizl ɗaf ana mege aka ndze akahər mawà ŋa tekeɗe ka, a we a tsiye. Ti ndzikiɗ ba asa ka, dizl ɗaf ana mburma tə ndzàhara i biye ya fùhùt nda zlile ŋa dze, dite ka, a kula ya. 13 Tar asa mbaŋa ka, kamala duluv ana i batsah dula, himbiɗ a ɓezle a dər tsuɗkur tsuɗkur tsuɗkur tsuɗkur a. Bakal tar à pèt a ka, kamala matsakufa yam ana dzə̀dzàràgùffa a ndze a i dula ya. Tar ka, kamala gà mawusawus ana ta kəzlaha ika vatwa ya, tì sìweye aà gəza mbulum a. Mbulum ka, aka làmbaɗa a tar təv i luvuŋ ana ziŋziŋ hinne ya. Ti ndze a i fata ka, aà biybiy, ti sle a aà madàra iɗəm a tsidze.

14 Akahər ata piŋŋe ka, Anuhu ana ta wa ŋgat i gwala Adama matəsəla ŋa ya ka, aka tsik bazlam aà medzibe gà mburma ata mbaŋa. A gwa: «Araha, BATSAH kwa ŋa a dere a nda gà gawla ŋgar a hinne, a ɗeme a ba tsa. 15 A dere a ka, aà mege seriye aka gər gà mburma ana ika gər ahəɗ a tserdze ya. Seriye à gis a gà na tə sər ŋgat tsiye, aɗaba dukw tar ana ta gewar ŋgwal ŋa tsa pampam a, dite agəra gà bazlam ana ŋgwal ŋa tsa tserdze ti tsik ahər a mbaŋa.» 16 Gà mburma ata Anuhu a tsik aà tar bazlam ata ya ka, kaɗəŋ. Tə sayawa ahəm nda təv mburma ka, kəla pat. Gəzləŋ tar a ndzawa zayya tsidze. Ta gewa ka, dukw ana ba tar a waya ya. Tì sìkèh a à ba tar nda zlapa. Tì yè a liɓir a bəɗ a mburma ka, nda bazlam lifeɗiɗe nda wirwir. Ta bene a tar, na dite ta ŋget a duwa kamala ana a sàs a tar a.

Yuda a be à ɗaf a gà mburma Mbulum

17 Ama a kurum gà masla gà ana i waya kurum hinne ya. Kurum ka, bazlam ana gà ɓəzla meslire Yesuw Kiristi BATSAH kwa ŋa ti tsikewa a kurum akahər ata ta gwa, a ta ge a ba aka miɗ mba ya ka, ma ta məts a kurum gər tsa. 18 Ti tsikewa a kurum ka, ta gwa: «I təv ana gər ahəɗ aka à mendìve ya ka, gà misle ŋgiɗ ti sewle a aà kurum ana ki zezemwim a Mbulum a. Gà mburma ata ta gis a ahəm aà Mbulum tsa. Ti zezem a ka, dukw ana ŋgwal ŋa tsa, gəzləŋ tar a waya ya ɗekɗek pəra.» 19 Kamala taŋa ya, gà taŋa na tì dzik a ikaba gà mburma ya ya. Tar ti zezem a ka, madzala gà gər tar ɗekɗek tsəka, biy Mezite Mesife Mbulum tsa.

20 Ama kurum gà masla gà ana i waya kurum hinne ya. Kurum ka, mə̀rum aba sah lele. Zlakum ba ika magər kurum ilik ilik tserdze, na dite ndzəɗa kurum à sìkèh a aka miɗ aka miɗ i təv megìse kurum ana kə̀ gəsum bazlam ŋgwal ŋa aaha, Mbulum a ɗif a kurum dər a. Hamum a Mbulum nda ndzəɗa Mezite Mesife ŋgar kəla pat mbaŋa. 21 Ndzum i təv mawàyà ba ŋgar ana a waya kurum a, aka miɗ aka miɗ. Vavum pat ana Yesuw Kiristi BATSAH kwa ŋa a ti ɗif a kwe a à dukw mendze are tsehe kwa ana kà ndzekwar a, dite a vile a kwe a mesife ana à ndìv a tsa aà biybiy a.

22 Gà mburma ana tàa gəs Mbulum kalkal tsa, madzala gà gər tar wakit wakit a ka, ti ndze a kurum a are tsehe mbaŋa. 23 Gə̀sumara tar i akwa ana tə dəɗ aɗəm a, mbalum à tar. Dite gà na ta ge a dukw ana ba tar a waya ya ka, ti ndze a kurum are tsehe asa mbaŋa. Ama kə̀la ka, gwim metsehe, ka tə dzawum a bakal tar tsa. Nwim are a dukw tar ata ta ge a ya. Ku mege gà petek tar ana ikaba, ta ge a dər akaba bakal a tekeɗe ka, ka tə lə̀mum ahər idep tsidze.

Zàmbaɗakwa à Mbulum

24 Gekwa kəkaaha a Mbulum, aɗaba ana ŋgat a sle aà makaslà kurum a, na dite ka, ki dzeywim a ika vatwa ŋgar a asa tsiye. Ŋgat a bere a aà kurum bakal kurum a tserdze tsəɗaŋŋa lele. Dite ki dwim a, ki ta hitswim a aka miɗ ŋgar i təv mezlibe ŋgar ana gà mburma tì zlibe a à ŋgat a ya. Ki ŋgeywim a ba hinne. 25 Gekwar kəkaaha, aɗaba ŋgat ilik na Mbulum a. Dite ŋgat asa na a mbala à kwa nda ahər Yesuw Kiristi BATSAH kwa ŋa ya. Ku weke mà zlə̀b à ŋgat, a gweɗe a: Ŋgat ka, batsah Əbay. Mekwere ŋgar ana a kwere a ya ka, à ndìv a tsa, daga aà gər ana piŋŋe ya, ku mege kinehe ya, a ndze a ka, aà biybiy. *Amin.