2 Piyer 2

Mege metsehe agəra gà ɓəzla pàrsa

Yuda 4-13

1 Akahər ata ka, gà ɓəzla məma à bazlam Mbulum ana nda pàrsa ya ka, tar riŋ ika magər gà mburma Mbulum gà Isərayel hinne. Ama kinehe ka, gà ɓəzla pàrsa ti ti ɗe a aba ika magər kurum kataya mbaŋa. Ti dere a, ta pèt a aba ka, nda wirwir, na ti dzeŋge a guma pàrsa tar ana ti dzeye a dər à mburma ya. Ti niw a Yesuw Kiristi BATSAH kwa ŋana a mbala à tar i bakal tar piŋŋe ya. Aɗaba gà dukw ata ta geye a kataya ka, seriye Mbulum a ta gis a tar ka, bise tsara, a dzeye à ter a fit kweleŋ. 2 Gà mburma hinne ti ti zezem a vatwa tar ana ŋgwal ŋa tsiye. Aɗaba taŋa na gà mburma ana tə sər Mbulum tsiye, ti ti tsik a dukw ana ŋgwal ŋa tsiye aà vatwa Mbulum ana ndzer ŋa ya. 3 Gà ɓəzla medzeŋge a mburma nda pàrsa ata ka, ta geye a are aka dukw mburma hiywe pəra. Ta bene a kurum nda wirwir, tì ses a pàrsa, na dite ki dzwìm a ter a siŋgwe ya. Daga piŋŋe, Mbulum ana ŋgat mala masasa ikaba seriye mburma ya ka, aka hadzal ba aà mege a tar seriye. Pat ana a dzeye a à tar fit a ka, aka à mendze aɗəm.

4 Ku mege gà gawla Mbulum ana ta ge bakal akahər ata ya tekeɗe ka, Mbulum aka məlak à tar kataya tsa. A gasa tar, a dza tar a akwa ana a mbete a tsa aà biybiy a. Tar ka, mandza ŋa i luvuŋ ana tìtìktìkka ya. Ti ndze a i fata, haa a pat ana Mbulum a ge a ter a seriye ya. 5 Gà mburma ana akahər ata ta ge bakal a ka, Mbulum aka miyak à tar ɓav tsa asa. Ama a slərra batsah yam aka gà mburma ata ta gəs ŋgat tsiye. A rah aka gər ahəɗ peɗik peɗik, ti dzeye aɗəm fit. A mbala iɗəm a ka, à gà mburma tsamakər a ɗekɗek pəra. Gà Nuhu ana a tsikewa bazlam ŋgar a mburma ya, dite ka, a waya tə zazam vatwa ŋgwal ŋa, tar nda gà mburma ana i ga i ma ŋgar təsəla ya. 6 Ama gà kwite ata tə zal a tar gà Suduma nda Gumura ya tekeɗe ka, i təv ana gà mburma ana i fata ya, ta ge bakal a ka, Mbulum aka gəs tar a seriye mbaŋa. A wànà hilɓèk hilɓèk ika ahəɗ ata ya fit. Say na a zeha ka, bitekwe ŋa pəra. Kamala taŋa ya, a pàt dər kataya ka, dite gà mburma tə̀ samata, meme na a ta ge a seriye a gà na ta gəs ahəm ŋgar tsa tserdze ya. 7 Akahər ata a mbəl à mburma ka, ilik pəra. A mbəl ka, à Ludu, agəra ana ŋgat ŋgwal ŋa ika miɗ ŋgar a. Ama gəzləŋ a wurawa aà ŋgat hinne, agəra dukw ana gà mburma ata i fata, ta gewa ŋgwala tsiye. 8 A ndzawa ka, i liwiŋ gà mburma ata gà ŋgwal ŋa tsiye. Kəla pat a ŋgatawa a bakal tar ana ta gewa ya, nda mezelme bazlam ana ti tsikewa ya. A wur aà ŋgat i gəzləŋ turturtur hinne, aɗaba ana ŋgat ka, mala ndzer ŋa ya.

9 Gà dukw ata ta geye ba akahər ata ya ka, ti ɗif a kwa dər ka, Mbulum a səraba dukw ŋgar, meme na a ta mbele a à gà mburma ŋgar i mesewere are tar ana tì sèwèr a ya. Ama a ɗif a kwe a dər asa ka, a sər dər, meme na a ta vile a mesewere are a gà na ta ge a dukw ana ŋgwal ŋa tsiye ya. A veve a dər haa a pat ana a ta ge a ter a seriye ya. 10 Ama a ta vile a mesewere are ata ndeyndey ŋana ka, a gà na ta gewa dukw ana ŋgwal ŋa tsa, ti niw dər bazlam Əbay Mbulum a, ta waya mezezeme ka, dukw meeweke ba tar ɗekɗek a.

Ga ɓəzla medzeŋge bazlam ata a mburma nda pàrsa ya ka, ta gewa magəɗa a wura tsidze. Ti ndze a ka, ŋgakŋgakəkka, tì sìŋgìr a à gər tar ka, hinne. Ta ge a magəɗa a gà dukw ana i gəza mbulum, gà ndzəɗa tar a riŋ hinne ya tsa asa, ti sewle aà teriŋa. 11 Ku mege gà gawla Mbulum ana tə za gà ɓəzla medzeŋge bazlam Mbulum aaha nda pàrsa ya tekeɗe ka, ti sewle aà ter a ika miɗ Mbulum ɓav tsa. 12 Ama gà mburma ata ta gewa ka, dukw ana nda madzala gà gər tar taf masakəŋa ya. Tar ka, kamala gà dukw dala ana ta weye a gà ɓəza, dite gà mburma ta gese a aà mibetseye ya. Ti tsik a dukw ana ŋgwal ŋa tsiye, aà gà dukw ana tə sər tsiye mbaŋa asa. Mbulum a ta bets a tar tìteh tìteh aà bəra ya kaɗəŋ, kamala na gà mburma ta batsawa gà dukw dala ata ya. 13 Mbulum a vile a ter a mesewere are kamala na tar ti sèwèr a gà mburma ya mbaŋa.

Gà mburma ata, a sàs a tar ka, mazəma gər ahəɗ, nda mazazama meeweke ba tar ɗekɗek pəra. Ku mege nda pat ndərzayya ika miɗ mburma tekeɗe ka, ta ge a kataya pəra. Mendze tar ana ti ndze a ŋgwal ŋa tsiye ka, à nis a à zləm kurum. I təv ana tar mandza ŋa i təv kurum, ki zimwim akaba a dukw mezime i təv ilik ŋa ya ka, ti ndeɗe aka kurum a hwarwa masakəŋa. Ta bene a kurum nda wirwir. Tar ka, ta ŋgeye a ba hinne, agəra mibene tar ata ta bene a kurum a. 14 Tar ta waya ka, məfə̀rà aà gà məkəs ɗekɗek pəra. Meeweke ba a be a tar i ba tar ka, hinne. Mege bakal a tsahən aà tar ka, hinne, ti ye a ba tsidze. Tàa ŋgat a wur ana ika vatwa Mbulum, ndzəɗa ŋgar a riŋ tsiye ka, ta bene a ŋgat, dite mà dəɗ a bakal kamala tar a mbaŋa. Tar ka, tàa mbər mesinike ba à mege are aka dukw mburma, nda mege pərzəz hiywe pəra. Medzìbe gà mburma ata ka, seriye Mbulum ika gər tar ndzer. 15 Tar ka, tàa məsak à vatwa Mbulum, tə sər dukw ana ta ge a ya asa tsa, tàa dzeye. Tar ti zezem a ka, vatwa Biliyam, kəla Bawur, mala məmà à bazlam Mbulum ana akahər ata ya. Akahər ata ka, Biliyam, ŋgat a sasar mege dukw ana ŋgwal ŋa tsiye ka, hinne, na dite a ŋget a siŋgwe ya. 16 Ama Mbulum a palar ahəm, a ɗifer à metsehe, agəra ana a gəs ahər ahəm tsiye. Aɗaba hezweŋe ŋgar a fàfəlar kamala mburma ya. Ku mege hezweŋe a fàfəlawa tsa tekeɗe ya ka, aka fàfəlar, na a pat ata ya. A hə̀ndə̀k a vatwa a mala məmà à bazlam Mbulum ata, dite ka, ma ta ge dukw gà welewele ata asa tsa.

17 Gà mburma ata ti dzeŋge a bazlam pàrsa ya ka, ta bene a mburma. Tar ka, ti ndzikiɗ ba kamala biye yam ana ndèwsèlèŋŋe yam aka se iɗəm a ya. Dite ka, ti ndzikiɗ ba asa ka, kamala hulɓukw ana himbiɗ à sìweye a dər aà gəza mbulum pakàr pakàr masakəŋa, yam à dzer a iɗəm a tsiye ya. Ama tar ka, Mbulum aka làmbaɗa tar təv mawùràba ŋa ana i luvuŋ tìtìktìkka, are a da aba ya tsiye. 18 Tar riŋ tì sìkèh a à ba tar ika miɗ mburma nda metsìkè aà tar bazlam ana taf masakəŋa ya. Ta bene a dər gà mburma ana kinehe tar riŋ ihər ti dere a i liwiŋ gà na mandza ŋa i luvuŋ, tə sər Mbulum tsiye, nda gireŋ a asa. Aɗaba a sàs a tar ka, tə dara a təv tar a, ta ge dukw ana gà meeweke ba tar ana ta gewa ya mbaŋa. 19 Ta gweɗe a a gà mburma ata ka: Mìi vile a kurum a vatwa ana ki ziwwim a gər kurum a kuɗa. Ama tar ŋa ka, gà ɓele bakal, ti ziwe a ger tar ɓav tsa. Aɗaba kurum kà sərum, dukw ana a kwere a mburma ya, na a ne a ɓele à mburma ya. 20 Na wura a sər Yesuw Kiristi BATSAH kwa ŋana a mbil a à kwa ya ka, aka be aà gà dukw ana ŋgwal ŋa tsa ika gər ahəɗ, à nis a à mburma ya. Ama zàkwayiya ka, à mbìɗ a gər aka mege dukw ata ŋgwal ŋa tsiye, dite gà dukw ata ta kwere a ŋgat asa ana, meme? Kamala taŋa ya, mandəvandəv mendze ŋgar ana i dəba taŋa ya ka, ŋgwal ŋa tsa ndeyndey, à zè a dukw ana ŋgwal ŋa tsa, a ge akahər ana a sər Yesuw Kiristi zukw tsiye ivaɗ. 21 Na kataya ka, ŋgulum na ma sər vatwa ana ndzer ŋa ya tsidze ya, ndəna a sər vatwa ana ndzer ŋa ya lele ka, dite i dəba ŋa ya, a məsak dər aba ya, a gəs ahəm dukw ana Mbulum a tsiker a asa tsiye ya. 22 Dukw ata a le a aà medzibe gà mburma ata ya ka, kamala ana ti tsik i huɗ bazlam minew ata ya kaɗəŋ. Ta gwa ka: «Kəra aka vənaha ka, kə̀ɗats kə̀ɗats à meh a à dukw ana a vənaha ya.» Ta gwa asa ka: «Tàa bara wèdèlìŋ lele ka, à mbìɗ a gər a dùluɓ, a mbeɗe aɗəm a aba tambàlum tambàlum asa.»