2 Piyer 1

MASULA

wakita ana

PIYER

a wetse ya

Wusa Piyer ana a ge ya

1 Na a wetse a kurumaha wakita aaha ka, iye Simun Piyer ana iye mala megemir Yesuw Kiristi ana i gewar meslire ya. I wetseha wakita aaha ka, a kurum ana kà gəsum Yesuw Kiristi nda gəzləŋ kurum tserdze, kalkal kamala mə̀r ana mì gəs ŋgat mbaŋa ya ya. Vatwa megìse ata ka, dukw ŋgwal ŋa. Yesuw Kiristi a vəl a kwa vatwa ata ka, dite ku weke mà gəs ŋgat. Aɗaba ŋgat ka, mala ndzer ŋa, a wele a ikaba mburma ya tsa. Ŋgat ka, Mbulum, a mbəl à kwa i bakal kwa ya.

2 I heme a a Mbulum, dite mà səkah a kurum à masəra ba kurum nda gà Yesuw Kiristi BATSAH kwa ŋa aka miɗ aka miɗ. Kamala taŋa ya, a pise a kurum a ahəm, à sìkèh a kurum a dər, a vile a kurum a matasla yam a gəzləŋ kurum mbaŋa.

Mede gà mburma Mbulum ana ti de a ya

3 Kà sərakwa Mbulum ana a zal a kwa ya ka, aɗaba Yesuw Kiristi. A zal a kwa ka, na dite kə̀ ŋgatakwa magàwà akaba a təv mezlibe ŋgar ana tì zlibe a à ŋgat, ki zezemekwe a mendze ŋgar ana ŋgwal ŋa, a za gà dukw tserdze ya mbaŋa. Kamala taŋa ya, ŋgat nda ndzəɗa ŋgar ana hinne ya, a vəl a kwa dukw ana a sle aà kwe a tserdze ya, na dite araha, kə̀ ŋgatakwa mesife ana awiya ŋa ya, ki zezemekwe a ŋgat lele kamala ana a tsahən ahər mbaŋa ya. 4 Kamala taŋa ya mbaŋa asa, a vəl a kwa gà dukw gà bàba ŋa ana akahər ata a tsik i sida ya, a gwa, i ta vile a kurum a ya. Gà dukw ata ka, ŋgwal ŋa ndzer, duwa a riŋ kamala taŋa ya tsidze. A ge kataya ka, dite ki beywim a aà dukw meeweke ana ŋgwal ŋa tsa ika gər ahəɗ, a bene a mburma ya, na dite ka, ki zlwim a ba ŋgar ŋgwal ŋa lele tsəɗaŋŋa ivaɗ a.

5 Aɗaba taŋa, iye ihər i gweɗe a kurum a ka: Yahum vatwa nda ndzəɗa kurum fit, dite magəsa Yesuw Kiristi ana kə̀ gəsum a ka, mà səkah a gəzləŋ kurum, mə̀ pàt à mede kurum ana ŋgwal ŋa ya mbaŋa. Na kàa zazamum aka miɗ aka miɗ kataya ka, yahum vatwa aà mene gà ɓəzla metsehe mbaŋa asa. 6 Ama ka, metsehe ɗekɗek tsa. Gəsum gəzləŋ i təv duwa ya tserdze mbaŋa. I təv ana kurum ihər ki kwerwim a ba kurum kamala taŋa ya ka, mə̀rum aba. I təv məmə̀rà aba kurum ata ya tekeɗe ka, gəsum ahəm aà Mbulum lele. 7 Na kàa hənum à gər a bəɗ ka, wayum ba lele, aɗaba kurum ka, nda gà damər na ika vatwa Mbulum a. I təv mawàyà ba kurum ata ya mbaŋa ka, wayum gà asiŋ gà mburma ilik ilik tserdze mbaŋa. 8 Na kàa gwim gà dukw ata aka miɗ aka miɗ kataya ka, mesire kurum ana ki sirwim a Yesuw Kiristi BATSAH kwa ŋa ya ka, à sìkèh a a gəzləŋ kurum, dite mendze kurum ana ki ndzwim a ya ka, à pèt a à dukw ana ŋgwal ŋa ya mbaŋa. 9 Ama na wura a ge a gà dukw ata tsəka, a sər BATSAH kwa ŋa tsa. Ŋgat a ne ka, kamala mala guluf ana a ŋget a a duwa ka, zimirmir pəra ya. Ŋgat ka, məpəla à bakal ŋgar ana Mbulum a pə̀lar dər piŋŋe ya ka, aka mətsar gər na taŋa ya.

10 Aɗaba taŋa, gà damər gà, mə̀rum aba, ka miyakum à mege gà dukw ata tsidze, aɗaba mezele ana Mbulum a zal a kurum, a pala kurum a ka, ki gwim kataya. Na kàa gwim gà dukw ata ka, ki dzeywim a ika vatwa Mbulum a tsidze. 11 Kamala taŋa ya kaɗəŋ ndzer, Mbulum a ta vile a kurum a vatwa aà mada a mekwere Yesuw Kiristi BATSAH kwa ŋana a kwere a ya, dite ŋgat na mala məmbə̀là à kwa ya mbaŋa. Mekwere ata a ndze a ka, aà biybiy.

12 Aɗaba taŋa na a sèsiŋ məma a kurumaha à gà dukw ata a gər kəla pat, dite ka, ka dzalum aaka gà gər a. Ku mege kà sərum, kàa zazamum gà bazlam ata ti ɗif a kurum dər nda ndzer a terwihhwe tekeɗe. 13 Ama na mesife gà a riŋ mba kamala naha ya ka, lele na i me a kurumaha a à gà dukw ata a gər, na dite ki ndzwim a are tsiye. 14 Aɗaba i sər ka, mandza aà bəra gà a riŋ hinne asa tsa, na i miyek a à gər ahəɗ, i mite a ya, kamala ana Yesuw Kiristi BATSAH kwa ŋa a tsikiŋ akahər ata ya. 15 Aɗaba taŋa na i yehe a vatwa nda ndzəɗa gà fit dze, aà mege gà dukw ana Yàa sle ahər a tserdze, na dite ka, ki slwim a aà matəkəra aà gà dukw ata ya. Ta məts a kurum gər tsa, ku mege i dəba məməta gà tekeɗe ya.

Gà na ta ŋgat ndzəɗa Yesuw Kiristi ana ika gər

gà duwa tserdze ya

16 Akahər ata ka, maa ɗif a kurum à ndzəɗa Yesuw Kiristi BATSAH kwa ŋana a ta mère a ya tserdze. Gà dukw ata mì tsik a kurum a ka, kamala ahəm hiyeŋ ana gà mburma ti ɗemere a ika arah a birek birek nda metsehe tar taf masakəŋa ya tsa. Ama mə̀r ŋa nda ahər mə̀r na mì ŋgatar parakka nda ndzəɗa ŋgar ana ika gər gà duwa tserdze ya dukw ŋgar. 17 I təv ana Mbulum Tsir ŋgar a zàmbaɗa à ŋgat, a vəlarra ndzəɗa mezlibe ana tì zlibe a à ŋgat a ka, mə̀r riŋ i təv ŋgar i fata mbaŋa. Mbulum ana ŋgat mala ndzəɗa, a za gà dukw tserdze ya, a gwaɗarra: «Naha ka, Kəla gà ana mandərkwasla ŋa, i zla ŋgat a. Maŋgayaba gà fit dze ka, ika gər ŋgar.» 18 Mər ŋa nda zləm mə̀r na mì tsarakara mifefile ata i gəza mbulum a ya, i təv ana mə̀r mandza ŋa nda gà ŋgat ika miɗ Mbulum i gər kwite ata ya.

19 Taŋa ka, a səkah a kwa à magəsa dukw ana gà ɓəzla məma à guma Mbulum ti tsik akahər ata ya asa. Ama kinehe ka, gwim metsehe aà mandza zləm a bazlam tar ata lele, aɗaba a ndzikiɗ ba ka, kamala lalampa ana à pèt a à dzaydzay i təv luvuŋ a. Ki dzwìm a zləm ka, haa a pat ana à mbizere a ya. A pat ata ka, a ge a i gəzləŋ kurum parakka kamala *mawusawus madə̀và mbulum ana à div a ya. Kamala megweɗe ya ka: Kiristi na a dere a nda gà dzaydzay ŋgar ata à wìtiɗe a i gəzləŋ kurum a.

20 Ama dukw ana a sèsiŋ metsike a kurum ndeyndey a ka, araha: Bazlam ana gà ɓəzla məma à guma Mbulum ti tsik akahər ata ya ka, ta wetse i wakita Mbulum, ta gwa, wura ilik a sle a aà masəra ŋa nda metsehe ŋgar tsa. 21 Aɗaba gà bazlam tar ata tserdze ya ka, a dara ka, i metsehe mburma ya ilik tsidze. Mezite Mesife Mbulum na a da a gəzləŋ tar a, na dite ti tsik dukw ana tə tsaraka i təv Mbulum a ya.