1 Piyer 1

MALAHALAH

wakita ana

PIYER

a wetse ya

Wusa Piyer ana a ge ya

1 Iye Piyer, mala meslire Yesuw Kiristi. I wetseha wakita aaha ka, a kurum gà mburma ana Mbulum a pala kurum kamala gà mburma ŋgar a. Tə dalawa kurum, kà dzàyum aba vatwa sweyèh sweyèh aka gà ahəɗ Pwantus, nda Galatiya, nda gà Kapadukiya, dite nda gà Asiya, nda gà Bitiniya, ilik ilik tserdze. Kurum gà mandzàyà ŋa a riŋ i gà fata ka, kamala gà slele ya. 2 Daga piŋŋe, Mbulum Tsir kwa a sər dukw ana a ta ge a kurum a ya. A pala kurum ka, dite ka nwim gà mburma ŋgar, nda ndzəɗa Mezite Mesife ŋgar. A sasar ka, ki giswim a ahəm aà Yesuw Kiristi, à gwetseke aà kurum a məmbəz ŋgar, na dite ki ndzwim a tsəɗaŋŋa ika miɗ Mbulum a.

Mbulum ma ge a kurum ŋgwal ŋgar hinne, dite mə vəl a kurum matasla yam a gəzləŋ kurum aka miɗ aka miɗ mbaŋa.

Mbulum a vəl a kwa mesife awiya ŋa

3 Zàmbaɗakwa à Mbulum tsir Yesuw Kiristi BATSAH kwa ŋa. Ka ndzekwar are tsehe hinne, na dite a vəl a kwa mesife awiya ŋa ya. Kə ŋgatakwa ka, aɗaba Yesuw Kiristi ana a mbəlara i məməta ya ya. Agəra taŋa na kà sərakwa i gəzləŋ kwa ka, ki ta mbilekwere a i məməta ya mbaŋa ya. 4 Kwa ka, kà sərakwa, ki ta ŋgetekewe a gà dukw gà ŋgwal ŋa ana Mbulum a ta vile a kwe a, a kwa gà mburma ŋgar a. Gà dukw ata ka, makàhà ŋa a riŋ i mbulum. A ndze a ka, aà biybiy. A gwenek a tsa, aruwaŋ a ge ahər a tsa, dite à nikiɗ a tsa asa mbaŋa. 5 Mbulum a riŋ a kesle a kurum dzèŋŋe lele, aɗaba na kàa gəsum ŋgat nda gəzləŋ ilik a. Dite ku weke a sir a dər, i təv ana gər ahəɗ à ndìv a ya ka, Mbulum a ta mbele a à kurum ndzer a.

6 Aɗaba taŋa, ŋgayum ba, ku mege kurum riŋ ihər ki sèwèrwim a are agəra gà medzike ana ti dzik a à kurum a nda dukw ŋgiɗ pampam tekeɗe ya. 7 I huɗ medzike ata ti dzikewa à kurum a ka, aà mesire dər ka, wànà kàa gəsum Mbulum nda gəzləŋ kurum ndzer kaɗəŋ a ya. Ku mege gura ana à sìkim a ba tsiye tekeɗe ka, a ndze a tsa, a nisiŋa. Ama gura ata tekeɗe ka, ti zle a, ti dzik a dər nda akwa, wànà akwa a mba ahər a, tsəna, a mba ahər tsiye? Na dite ti sir a dər ka, ŋgwal ŋa ya, kige tsa ŋgwal ŋa tsiye ya. Sakwàn megìse kurum ana a za gura fit kweleŋ tsiye. Kamala taŋa ya mbaŋa na ti dzik a à megìse kurum ana kə̀ gəsum Mbulum kinehe ya. Aləka a pat ana Yesuw à mère a, à pèt a aba aka miɗ mburma tserdze ya kuɗa ka, tì zlibe a à kurum, ta gweɗe aà kurum a ka, gà bàba ŋa kaɗəŋ ndzer. 8 Ku mege kàa ŋgatum a Yesuw nda are kurum zukw tsa tekeɗe ka, kà wayum ŋgat. Ku mege kàa ŋgatumar kinehe tsa tekeɗe ka, kàa gəsum ŋgat nda gəzləŋ kurum lele. Aɗaba taŋa na kurum ihər ki ŋgeywim a ba kinehe hinne, a za dukw ana mburma a tsik a nda bazlam a. 9 Aɗaba kurum ihər ki ŋgetwime a a dukw ana kà tikwim aaka madzala gà gər, kə̀ gəsum kinehe ya. Kamala megweɗe ya ka, Mbulum ihər a mbil a à gà mesife kurum.

10 Akahər ata ka, gà ɓəzla məma à guma Mbulum tàa fàfəl aka gər ŋgwal dukw ata Mbulum a gwa, i ta vile a kurum a ya. Gà mburma ata ka, tàa ge metsehe hinne. A sàs a tar mesire dukw ata, meme na Mbulum ata mbil a à mburma ya. 11 Aɗaba Mezite Mesife Kiristi ana a ge megemir i gəzləŋ tar a, a ɗif a tar dər daga piŋŋe, a gwaɗa a tar: Kiristi a ti sèwèr a are dzekwiŋ, dite i dəba ŋa ya, a ta ŋget a mezlibe ana gà mburma tì zlibe a à ŋgat kuɗa ya. Gà ɓəzla məma à guma Mbulum ata ta waya mesire bazlam ata nda metsehe tar, meme na gà dukw ata ti ta ge a ba ya, kige tsa ndeɗime. 12 Mbulum a ɗif a tar dər aba ya ka, tar ŋa tsa na ti ta ŋget a gà dukw ata ya. Ama a ɗif a tar dər ka, aɗaba kurum. Kinehe ka, gà ɓəzla meslire ŋgar ata ti ɗif a kurum à bazlam ŋgwal ŋa ata ya ka, tàa tsik a kurum gà dukw ata. Ti tsik a kurum ka, nda ndzəɗa Mezite Mesife Mbulum ana a slərra i gər ŋa ya. Ku mege gà gawla Mbulum tekeɗe ka, a sàs tar mesire gà dukw ata mbaŋa.

Gà mburma ta ge dukw ana a sàs a Mbulum a

13 Aɗaba taŋa, hadzalum madzala gà gər kurum aà megemir Mbulum. Kaslum ba kurum lele, dite ka tikwim madzala gà gər kurum tserdze aka ŋgwal dukw ata Yesuw Kiristi a ta vile a kurum a, a pat ana à mère a ya. 14 Gə̀sawum ahəm aà Mbulum, kamala gà ɓəza ana ta gis a ahəm aà gà tsir tar a. Akahər ata ka, kà sərum dukw ana ndzer ŋa ya zukw tsa. Kà wayum dukw ana ŋgwal ŋa tsiye ka, hinne. Ama kinehe ka, ka tə zazamum gà dukw ata asa tsa. 15 Kamala ana ŋgat tsəɗaŋŋa, a zal a kurum, dite kà nwim gà mburma ŋgar a ka, kurum tekeɗe, nwim gà tsəɗaŋŋa i təv gà dukw ana ki gwim a ya tserdze mbaŋa. 16 Aɗaba a riŋ mewetse ŋa i wakita ka, Mbulum a gwa: «Ki gwim dukw ana ŋgwal ŋa tsiye tsa. Aɗaba iye ka, tsəɗaŋŋa lele, i ge a dukw ana ŋgwal ŋa tsiye tsidze.»

17 I təv ana kà hamawumar a ka, kà zalawumar «Mbulum Tsir mə̀r.» Ama taŋa ka, lele. Aɗaba mendze kurum ana ɗa ika gər ahəɗ a ka, kamala gà slele ya. Ku mege kurum i slele tekeɗe, ndzum ka, nda magəɗa Mbulum i gəzləŋ kurum lele. Aɗaba ŋgat a ge a seriye gà mburma tserdze ka, nda ndzer ŋa, tsəka, a wele a ikaba mburma ya mewele tsa. A ge a ter a seriye ka, ku weke nda megemir ŋgar ana a ge ya. 18 Kinehe kurum kà sərum ka, Yesuw Kiristi aka mbùrùɗara kurum i fəla gà tsir kurum ana taf masakəŋa, ti ɗif a kurum a dər a. A mbùrùɗara kurum i gà dukw ata ya ka, nda dukw ana à nis a kamala siŋgwe ya tsa. 19 Ama kə ŋgatum mezìwè gər kurum ka, nda məmbəz Yesuw Kiristi ana a za gà dukw tserdze ya. Ŋgat a ndzikiɗ ba ka, kəla təmaŋ ana ŋgwal ŋa lele, duwa ihər tsidze, ta kəɗ a Mbulum taf masakəŋa ya. 20 Aɗaba piŋŋe, akahər ana Mbulum aka ge gər ahəɗ zukw tsiye ka, Mbulum aka mbər mezle ŋgat, dite ka, Mbulum a pàt a kurum à ŋgat aka mandəvandəv gər ahəɗ aaha kinehe ya, aà məmbə̀là a kurum. 21 Kə̀ gəsum Mbulum nda gəzləŋ kurum ka, aɗaba ŋgat, ŋgat ana Mbulum a mbəl dərra i məməta ya, dite a vəlar mezlibe ana gà mburma tì zlibe a à ŋgat hinne ya. Aɗaba taŋa ki slwim a aà məvəla gəzləŋ kurum a Mbulum ilik, na dite ki sirwim a dər ka, a ta mbil a kurum mbaŋa ya.

22 Kinehe ka, kàa barum bakal i gəzləŋ kurum a, aɗaba kàa gəsum ahəm a təv dukw ana ndzer a, na dite ki slwim a aà mawàyà gà asiŋ gà damər kurum ana ti zezem a vatwa Mbulum mbaŋa ya. Aɗaba taŋa, wayum ba ka, nda gəzləŋ ilik ŋa, kəla pat. Wirwir ma ge iɗəm tsa. 23 Aɗaba kà sərum, Mbulum a vəl a kurum mesife awiya ŋa, nda ndzəɗa bazlam ŋgar ana a vile a mesife a mburma, diydiy à ndìv a tsiye. Kurum ka, kàa nwim gà ɓəza Mbulum ana ŋgat à mite a tsidze ya. Ŋgat ka, kamala kwa ana ki metekwa a ya tsa. 24 Kamala ana ta wetse i wakita Mbulum akahər ata ya, ta gwa:

«Gà mburma tserdze ti ndzikiɗ ba ka,

kwizir ana a sləl ka, dite a kula ya.

Metsehine mburma a ndzikiɗ ba ka,

kamala mibezè kwizir ana a bize a ya.

Zàkwayiya ka, a ɓwitiŋa,

à dzèwe a ihər a bəɗ a tsara ka,

à tsehin a asa tsa.

25 Ama bazlam Mbulum ka, a ndze a aà biybiy,

à ndìv a tsa.»

Bazlam ata ka, bazlam ŋgwal ŋa ana ti tsik a kurum biy maŋgayaba ya.