Gà ɓəzla limana ta ge metsehe
5
1 A kurum gà ɓəzla limana,
dzum zləm a dukw ana i tsik a kurum a ya:
Ama ka,
tuwum ba kurum,
gwaɗum ka:
«Waya ba mə̀r a,
waya ba mə̀r a.»
Aɗaba pat mesewere are na a riŋ a dere a aka gər kurum a.
2 Limana kurum a gwinekiŋa.
Gà petek kurum tekeɗe,
gà mumbùkw ti zimiŋa.
3 Maŋgəz à gis a siŋgwe kurum ndiɓilèk kweleŋ.
Maŋgəz ata a ɗif a kurum a dər ka,
à sida akwa ana a ta wene a ba kurum,
à nis a ya.
Ki yehwim a gər ka,
a limana kurum pəra,
dite ki vevwim a dər ka,
pat seriye Mbulum ana kinehe aka à mendze aɗəm,
à ndìv a à gər ahəɗ ana,
meme?
4 Dite kurum ki benwim a gà mburma ana ta pele kurum a gà duwa i bəɗ a,
ki zimwim a tar nda wirwir,
ki vilwim a ter a dukw mayaba tar tsa ana,
meme?
Tsarakum,
tuwa gà mburma ata ti tiwe a nda Mewideye ya.
Tuwa tar ata a geha zləm a Mbulum ana a kwere a gà duwa tserdze ya.
5 Mendze kurum ana ki ndzwim a ɗa ika gər ahəɗ a ka,
kà nwim gà ɓəzla məburnun.
Ki gwim a ka,
dukw ana a sàs a kurum a ɗekɗek pəra.
Kurum ihər ki zimwim a gà duwa hinne,
ki gilwim a dər ba ndaɗawuzwuz,
kamala gà sla ana ta bets a tar a.
6 Kurum ihər ki ŋgewwim a gər a mburma,
ku mege tàa ge bakal tsa tekeɗe ya,
ki betswim a dər akaba tar pəra mbaŋa.
Ama tar ka,
tàa ge aà kurum maàga tsa.
Magəsa gəzləŋ
7 Aɗaba taŋa,
gà damər gà,
gəsum gəzləŋ,
haa a pat ana Yesuw Kiristi BATSAH kwa ŋa à mère a a təv kwa ya ya.
Fə̀rum aà mala mifìte ana à gis a gəzləŋ a kwaŋ.
A veve a yam daw,
a sligiŋa.
I dəba ŋa ya,
a veve a pat ana duwa à nèh a,
yam a de a a ma ya,
haa a pat ana a pele a gà dukw ŋgar ata i bəɗ a ya mbaŋa.
8 Kurum tekeɗe ka,
gəsum gəzləŋ kamala taŋa ya mbaŋa.
Mərum aba,
ka ti ywim ba tsa,
aɗaba pat ana BATSAH kwa ŋa à mère a ya ka,
aka à meslele.
9 Gà damər gà,
ka tə sayum aàba ahəm tsa,
na dite seriye Mbulum ata à gis a kurum tsiye.
Aɗaba ŋgat ana a ge a seriye ya ka,
araha mehìtsè ŋa,
aka à mendzera aka biye hərmaga ya.
10 Gà damər gà,
dzalum gà gər aka gà ɓəzla məma à guma Mbulum ana ti tsik bazlam ŋgar akahər ata ya.
I təv ana tar riŋ tì sèwèr a are ya ka,
ta mà aba à arəv,
ta gəs gəzləŋ.
Ama kurum tekeɗe ka,
gwim kamala tar ana ta gəs gəzləŋ,
ta mə̀r aba ya mbaŋa.
11 Kwa ihər ki gweɗekwe aà ter a ka,
tar gà ɓəzla maŋgayaba,
Mbulum aka pise a tar ahəm,
aɗaba ana ta mə̀r aba ya.
Kàa tsarakum magəsa gəzləŋ Ayuba mbaŋa,
meme na a mà aba à arəv i təv mesewere are ana a sèwèr a.
Ama kà sərum dukw ana Mbulum a vəlar i dəba mesewere are ŋgar ata a sèwèr a mbaŋa asa.
Aɗaba mburma a ndze a are tsehe a Mbulum ka,
hinne.
A ge a ter a ŋgwal ŋa kaɗəŋ.
12 Gà damər gà,
bazlam ana batsah ŋa ka,
araha:
I təv ana bəla ki tsikwim a duwa i sida ya ka,
ka ta mbaɗum tsidze.
Ka ta mbaɗum nda zləm Mbulum tsa asa.
Ku mege nda zləm gər ahəɗ,
kige tsa nda zləm gà duwa ŋgiɗ pampam tekeɗe,
ka ta mbaɗum dər tsa.
Na bəla bazlam ana kàa gwaɗum aaka «haya» ka,
ki gweɗwim a «haya» pəra.
Kige tsa kàa gwaɗum «awaŋ» ka,
ma ndisl aka taŋa pəra.
Ma tə za i gər a taŋa ya tsa,
tsəka,
ki bwim a i seriye Mbulum ana a ge a ya tsa.
Mahàmà a Mbulum agəra gà ɓəzla dukw məməta
13 Na wura a riŋ ika magər kurum à sèwèr a are ka,
ma hama a Mbulum,
dite Mbulum mà zlak ŋgat.
Na wura a riŋ a ŋgeye a ba ka,
mà lah dimis,
mà zàmbaɗa à Mbulum.
14 Na bəla wura a riŋ ika magər kurum ŋgwala tsəka,
ma zal a gà bàba gà mburma ana i liwiŋ gà ɓəzla mazazama Yesuw a,
tə dara,
ta hama a Mbulum aɗaba ŋgat.
Dite ta bàhar mal aà are zaakwa nda zləm Yesuw Kiristi BATSAH kwa ŋa.
15 Na tàa hama a Mbulum nda ndzer,
tə sər ka,
Mbulum a tsereke a meheme mə̀r ata ka,
dukw məməta ata ka,
Mbulum à mèreba a à ndzəɗa,
a mbiliŋa.
Na bəla aka ge bakal ka,
Mbulum à piler a dər mbaŋa.
16 Aɗaba taŋa,
pə̀lawum aba à bakal ika magər kurum,
ku weke a heme a a Mbulum aɗaba misle ŋgiɗ tserdze mbaŋa asa.
Dite Mbulum a mbele a à kurum i dukw məməta ya.
Aɗaba meheme wele ana ŋgat mala ndzer ŋa ika miɗ Mbulum a ka,
ndzəɗa ŋa,
a sle a aà duwa hinne.
17 Fə̀rum aà Iliya ana akahər ata ya kwaŋ.
Ŋgat ka,
mburma kamala kwa ya mbaŋa.
Ama ka,
a hama a Mbulum nda gəzləŋ ilik,
a gwa i huɗ meheme ŋgar ata ya ka:
«Yam mà dza ɗa i faha asa tsa mive makər nda mezehe ŋa» ka,
aka dza tsa kaɗəŋ.
18 *Aləka a ta megeha i dəba ŋa ya ka,
a hama a Mbulum asa,
a gwa:
«Yam mà dza asa.»
Aləka i dəba meheme ŋgar ata ya asa ka,
tiɓits yam a dza kaɗəŋ asa.
Dukw mezime a mbəɗ gər aka meslile.
19 Gà damər gà,
na wura ika magər kurum a aka dəɗ ika vatwa Mbulum a ka,
misle ŋgiɗ ma daha,
mə̀ mà aakara à ŋgat a asa.
20 Sərum dər ka,
na wura aka màra à mala bakal ika vatwa ana ŋgwal ŋa tsiye ka,
taŋa ka,
a mbəl à wele ata i məməta ya.
Ku mege bakal ŋgar a riŋ hinne tekeɗe ka,
Mbulum à piler a dər.