Kə̀ gəsum masla nda gər ahəɗ tsa
4
1 Maàga nda magə̀zlà ba a dara aka magər kurum dze ana,
i ŋga ya?
A dara ana,
i meeweke kurum ana ŋgwal ŋa tsa,
a be a kurum zeɓir zeɓir i gəzləŋ kəla pat a tsiye?
2 Ka wayum gà duwa pampam hinne,
ama ki ŋgetwime a tsa.
Ki gwim a are aka dukw mburma,
nda menèba are mbaŋa,
ama ki ŋgetwime a ɓav tsa dər akaba asa.
Aɗaba gà dukw ata na kinehe kurum riŋ ihər ki gwim a maàga,
nda magə̀zlà ba ika magər kurum a.
Ki ŋgetwime a gà dukw ata kà wayum a tsəka,
aɗaba ana kàa hamum a Mbulum tsiye.
3 Ku mege kàa hamumar tekeɗe,
ki ŋgetwime a tsa,
agəra ana kàa hamumar ndaka vatwa ŋa tsiye,
nda gà na a sàs a kurum ka,
dukw ana kurum kà wayum ki ŋgeywim a dər ba i gəzləŋ kurum ɗekɗek a.
4 A kurum ana ki gwim a duwa kataya kamala gà ɓəzla muva ya,
kà sərum ti tsiye,
na wura aka waya dukw gər ahəɗ hinne ka,
ŋgat a ne mala mene are Mbulum a?
Aɗaba taŋa na wura à gis a masla nda gər ahəɗ ka,
ŋgat a ne mala mene are Mbulum ivaɗ.
5 Kurum kù gwaɗum ana,
dukw ana ta wetse i wakita Mbulum ana,
dukw masakəŋa taf a?
A gwa ka:
«Mbulum a ge a are aka mesife ana a vəl a kwa ya.
A waya,
na dite ki mèkwer a dər a.»
6 *Ama ndzəɗa ŋgar ana a vəl a kwa ya ka,
a za dər gà dukw meeweke ana i gəzləŋ kwa ya tserdze.
A de a ka,
aka miɗ aka miɗ kamala ana mewetse ŋa a riŋ i wakita Mbulum ka,
ta gwa:
«Mbulum a niw a gà ɓəzla zlapa,
dite a vile a ndzəɗa a gà na ta həna à gər a bəɗ a.»
7 Aɗaba taŋa,
gəsum ahəm aà Mbulum.
Məsakum à Əbay sitene,
dite a vel a à kurum a.
8 Sìrìkwim a təv Mbulum.
Ŋgat tekeɗe,
à sìrìk a a təv kurum mbaŋa.
A kurum gà ɓəzla bakal,
dumara,
barum bakal aà ahər kurum a.
A kurum ana madzala gà gər i gəzləŋ kurum mandzalama sula ya,
miyakum aba à madzala gà gər ata ŋgwal ŋa tsiye.
9 Ndzum ka,
kamala ana ki sèwèrwim a are ya,
tuwum hinne,
aɗaba bakal kurum,
kəɗum ba ivaɗ.
Sawla kurum ana ki sewlwim a zləmana ya ka,
nwim dər tuwa mbaŋa.
Maŋgayaba kurum ana ki ŋgeywim a ba ya tekeɗe ka,
nwim dər matsəɓatsəɓ i gəzləŋ kurum ivaɗ asa.
10 Hənum à gər a bəɗ aka miɗ Mbulum,
dite Mbulum tekeɗe,
a ti sìkèh a à kurum a dər mbaŋa.
Kà mum à bakal mburma tsa
11 Gà damər gà,
ka ti tsikwim dukw ana ŋgwal ŋa tsiye aà mburma tsa.
Na wura aka tsik dukw ana ŋgwal ŋa tsiye aà damər ŋgar,
kige tsa à mèr a à bakal mbaŋa ka,
taŋa ka,
a tsik dukw ata ŋgwal ŋa tsiye ka,
aà məpala ahəm Mbulum.
A mà à bakal ka,
a ŋgat mbaŋa.
Avukw ana à gis a məpala ahəm ŋgar a ka,
a ne mala məmàr à bakal ivaɗ dze ana,
meme?
12 Mbulum ilik na a vəl məpala ahəm a mburma ya.
Dite ŋgat ilik asa na mala masasa ikaba seriye mburma ya asa mbaŋa.
Aɗaba ŋgat ilik na mala ndzəɗa ana a sle a aà məmbə̀là à mburma i məməta ya,
kige tsa aà medzeye à tar asa mbaŋa ya.
Dite kər dze ana,
weke na ki me a à bakal a mburma ya?
Ki gwim zlapa tsa
13 A kurum gà mburma ana ki gweɗwim a:
«Və̀ɗəna,
kige tsa ndidwe ka,
mìi meh a ba,
mìi de a a metsèkèle a kwite ŋa a təv ŋa,
mìi ve a riŋ i fata ilik,
na dite mìi ŋget a siŋgwe hinne ya.»
Ama dzum zləm a dukw ana i tsik a kurum a ya:
14 Kurum dze ana,
meme na kà sərum dukw ana a ta ge a ba i təv kurum a ndidwe ya ya?
Mesife kurum a ndze a dze ana,
hilè na kà sərum a?
Mesife kurum ka,
kamala hədzək ana a dwiz a,
zàkwayiya ka,
a riŋ asa tsa,
aka mbete ya.
15 Ŋgulum ki gweɗwim a ivaɗ ka:
«Mege Mbulum a vile a mə̀r a vatwa ka,
mìi ndze a nda mesife mə̀r,
mìi ge a naha,
kige tsa mìi ge a naaka.»
16 Ama kinehe ka,
kurum riŋ ihər ki gilwim a à gər hinne,
nda mege zlapa ana,
taŋa dze ana,
lele yà?
Mege zlapa ana kataya ka,
lele tsa.
17 Aɗaba taŋa,
na wura a sər naha ka,
dukw ana ŋgwal ŋa ya,
ama a ge a taŋa tsəka,
a ge a ka,
bakal.