Wakita ana ta wetseha
a gà IBƏRANIKWA ya
Mbulum a fàfəl a kwa nda ahər Kəla ŋgar
1
1 Akahər ata ka,
Mbulum aka fàfəl a gà bàba gà tsir kwa medzige diŋ.
A slərawa gà ɓəzla məma à guma ŋgar a təv tar,
ta màwa a tar à bazlam ŋgar ndaka vatwa ŋgiɗ pampam.
2 A fàfəlawa kataya,
haa tsikw a ndzera aà mendze kwa aaha kinehe mandəvandəv ŋa ya.
Ama kinehe a fàfəl a kwa ka,
nda bazlam Kəla ŋgar kuɗa.
Nda ahər Kəla ŋgar ata,
na Mbulum a ge gà gəza mbulum nda gər ahəɗ a.
Ŋgat asa mbaŋa na a zla ŋgat a,
dite ka,
dukw tserdze ma ge biy ŋgar.
3 Ŋgat a riŋ à pèt a à mezlibe Mbulum ana tì zlibe a dər a,
nda təv dzaydzay ŋana i təv ŋgar a.
Aɗaba ŋgat na a zla ba kalkal kamala Mbulum a,
dite ŋgat na a riŋ à gis a gà dukw ana tserdze ya,
nda bazlam ŋgar ana ndzəɗa ŋa ya.
A làmbaɗa vatwa ana Mbulum à pìl a dər à bakal a mburma ya,
na dite ti ne a gà tsəɗaŋŋa lele ika miɗ ŋgar a.
I dəba ŋa ya ka,
a da a mbulum kuɗa.
A daha,
a ndza aka tseke ahər mezime Mbulum,
mala ndzəɗa batsah ŋana a kwere a gà dukw tserdze ya.
Yesuw a za gà gawla Mbulum
4 Aɗaba taŋa,
Mbulum a ne à Yesuw ka,
batsah ŋa,
a za gà gawla ŋgar fit.
Zləm ana a vəlar a tekeɗe ka,
a za biy tar asa mbaŋa,
agəra ana a zalar ka,
Kəla gà ya.
5 **Dite Mbulum aka tsik aà wura ilik i liwiŋ tar a ka:
«Kər na kà ne Kəla gà,
mbakum i ne Tsir yak» ka,
aka tsik tsidze.
Say aà Yesuw ilik na a tsik ahər a.
Dite a ɗə̀v zləm aà wura ilik i liwiŋ tar ata ya,
aka gwa ka:
«I ti ne a Tsir yak,
dite kər tekeɗe,
kà ne ka,
Kəla gà» ka,
aka tsik ɓav tsa asa.
6 *Ama i təv ana a sàs a Mbulum aà meslirra mandərkwasla Kəla ŋgar mifèndèz ŋana aka gər ahəɗ a ka,
a tsik ahər,
a gwa:
«Say gà gawla gà ana i gər ŋa ya tserdze,
tə̀ dzar gurmits a bəɗ.»
7 *Ti tsik aà gà gawla Mbulum ka,
ta gwa:
«Mbulum a ne à tar ka,
gà ɓəzla meslire ŋgar pəra.
Ti ndzikiɗ ba ka,
gà himbiɗ nda gà arah akwa.»
8 Ama nda təv Kəla ŋgar ka,
a gwaɗar:
«Kər ka,
Mbulum,
mekwere Əbay yak ka,
ma ndza aà biybiy,
ki kwere a gà mburma yak ka,
nda ndzer ŋa.
9 *A sàsak ka,
dukw ana ndzer a,
dite kà waya dukw ana ŋgwal ŋa tsiye tsidze.
Aɗaba taŋa na Mbulum Tsir yak a zla kər,
dite a sə̀ŋgə̀r à kər,
a za biy gà màndàla yak a,
dite ka,
maŋgayaba mà rah a gəzləŋ yak zayya lele.»
10 A gwa asa ka:
«Kər na Batsah ŋa ya,
ki ge gər ahəɗ akahər ata piŋŋe.
Dite nda ahər yak asa na ki ge gəza mbulum a.
11 Aləka gà dukw ata ka,
tì ndìv a fit.
Ama kər ka,
ki ge a riŋ hiywe mba.
Tar ka,
ta ge a màndawal,
ti nis a kamala petek a.
12 *Ki ta peɗe a tar lèplèp
kamala andiw ana ndzəɗa iɗəm asa tsiye.
Ta mbìɗ a à tar,
kamala petek ana ta mbìɗ a aba a ya.
Ama kər ka,
ki mbìɗ aba a tsa dukw yak.
Ki ge a màndawal tsidze.»
13 *Dite ka,
Mbulum aka gwaɗa a wura ilik i liwiŋ gà gawla ŋgar a ka:
«Ndza aka tseke ahər mezime gà,
haa a pat ana Yàa dza gà ɓəzla guvəl yak
aà huɗ sik yak a» tsa.