Wakita ana Pul a wetseha
a FILIMUN a
1
1 Na a wetse wakita aaha ka,
iye Pul ana mandza ŋa i daŋgay,
aɗaba Yesuw Kiristi ya.
Mì wetse ka,
mə̀r nda Timute,
damər kwa.
Mì wetseha ka,
a kər Filimun,
masla mə̀r ana ki ge a meslire a Mbulum kamala mə̀r a ya.
2 Mì wizeha Afiya,
damər kwa ana dəm ŋa ya asa,
nda Arkipus ana a ne sliwdze ika vatwa Mbulum kamala mə̀r a mbaŋa,
dite nda gà asiŋ gà mburma ana ti yahawabaha gər a təv yak aà mahàmà a Mbulum a mbaŋa asa.
3 Mìi heme a a gà Mbulum Tsir kwa,
nda Yesuw Kiristi BATSAH kwa ŋa,
dite ta ge a kurum ŋgwal,
ta vəl a kurum matasla yam a gəzləŋ zayya lele.
Mawàyà mburma Filimun, nda megìse ŋgar ana a gəs Mbulum
nda gəzləŋ a
4 Filimun,
damər gà,
ku mege ndeɗime tekeɗe ka,
i heme a a Mbulum aɗaba kər.
I ger a kəkaaha kəla pat.
5 Aɗaba i tsaraka ka,
ta gwa,
kà waya gà mburma Mbulum tserdze,
dite meme na kə̀ gəs Yesuw Kiristi BATSAH kwa ŋa a gəzləŋ yak nda ndzer a mbaŋa.
6 Iye ihər i heme a a Mbulum ka,
dite megìse kwa ana kə̀ gə̀sakwa ŋgat,
kə̀ gawakwa ba a təv ilik ŋa ya ka,
mà səkah a gəzləŋ yak mbaŋa.
Kamala taŋa ya ka,
ki sir a à gà dukw ana ŋgwal ŋa,
Mbulum a vəl a kwa nda təv Yesuw Kiristi tserdze ya ka,
lele.
7 damər ga,
Yàa ŋgaya ba hinne,
arəv aka mìŋaha mbaŋa,
agəra meweye yak ana kà waya gà mburma Mbulum,
kà mà a taraha à arəv,
a ŋgaya a tar ba i gəzləŋ tserdze ya.
Pul a hama a Filimun, aɗaba Unesimus
8 Aɗaba taŋa,
iye ihər i gek a kamkam,
aà mege dukw ana i tsikik a kinehe ya.
Iye mala meslire Yesuw Kiristi ana a viliŋ ndzəɗa ya ka,
i sle aà megweɗek a,
say ki ge a dukw ana a de a ndaka vatwa ŋa lele ya,
nda ndzəɗa.
9 Ama ka,
i tsikik a kataya tsa.
I dzala,
i gwa ka,
ŋgulum i gek a kamkam nda zèyezèye kitè ivaɗ,
aɗaba ana kà waya mburma lele ya.
Iye Pul ka,
màndawal mburma,
dite kinehe iye mandza ŋa i daŋgay gədzə̀zlzla ka,
aɗaba Yesuw Kiristi.
10 Ama i gek a kamkam ka,
aɗaba Unesimus ana ŋgat a ne kəla gà ika vatwa Mbulum a.
Iye ana i daŋgay a,
na i ne tsir ŋgar ɗa i faha ya.
11 Akahər ata ka,
màsar ŋa,
a zlàkawa kər tsa.
Ama kinehe ka,
aka tsah,
a gek a ŋgulum kuɗa,
dite a giŋ a ŋgulum,
a iye mbaŋa.
12 Taŋa kinehe ka,
i slirehe a ŋgat,
ma daha a təv yak asa.
A dehe a ka,
kamala ana iye na a daha ya.
13 I waya zləmana ka,
ma ndza ɗa i təv ga i daŋgay ana ta gəs iye aɗaba bazlam ŋgwal ŋa ata ya,
mà zlak iye,
avukw kər ana ki zlèk a iye ya.
14 Ama a sèsiŋ mege kataya tsa,
tsəna bəla ki gis a tsa ana,
meme?
Aɗaba i waya na i tike aka kər a ndzəɗa aà megiŋ ŋgwal ŋa ya tsa.
Say ki ge a ka,
kamala ana kà waya ya ivaɗ.
15 Bəla Unesimus a miyak à kər,
a ta mendze i təv ŋgiɗ zaakwa ka,
aà dite à mbìɗehe a gər a təv yak a ka,
ki ti ndzwim a i təv ilik ŋa aà biybiy kuɗa.
16 Aɗaba ŋgat kinehe ka,
kamala ana ɓele ya hiywe asa tsa.
Aka ne ŋgwal ŋa.
Aka ne ka,
damər ma ana ika vatwa Mbulum,
ki weyeme a ŋgat hinne ya.
Iye ka,
mandərkwasla gà,
i waya ŋgat hinne.
Ama i dzala ka,
kər tekeɗe,
ki weye a ŋgat,
a zè a taŋa.
Ka ta waya ŋgat ka,
kamala mala megemir yak a pəra tsa.
Ki weye a ŋgat ka,
kamala damər yak ana ndzer ika vatwa Mbulum a mbaŋa.
17 Na kàa fə̀r aà iye kamala masla yak ana ndzer ŋa ya ka,
gəs ŋgat lele,
kamala ana kə̀ gəs iye ya mbaŋa.
18 Na aka gik dukw ana ŋgwal ŋa tsiye,
bəla gwèdèrè yak ihər ka,
wiz aà iye pəra,
i pìlekiŋa.
19 Taŋa iye Pul nda ahər gà ŋa na i wetse bazlam aaha ya.
I pìlek a ndzer.
Ama kə̀la ka,
ŋgulum gwèdèrè yak ata ka,
ka wiz asa tsa.
Aɗaba mesife ana kə ŋgat a ka,
i bazlam gà ya na ka tsaraka ya.
20 Aɗaba taŋa,
damər ga,
i gek a kamkam nda zləm BATSAH kwa ŋa:
Giŋ gà ŋgwal gà dukw ata te.
Viliŋ matasla yam a gəzləŋ ga,
aɗaba kwa ka,
kàa gawakwa ba a təv ilik ŋa nda gà Yesuw Kiristi.
21 I wetsekaha wakita aaha ka,
aɗaba i sər ndzer,
ki ge a gà dukw ata i wizeha aà kər a.
I sər,
ki ge a ka,
à zè a taŋa ivaɗ.
22 Ama i təv ana kàa gəs Unesimus a ga a ma yak a ka,
kà lèmbeɗiŋ riŋ təv mehinne i fata mbaŋa.
Aɗaba i dzala ka,
Mbulum a tsereke a dukw ana kà wizwim a ya,
na dite a viliŋ a vatwa aà madaha a təv kurum a.
Mege wusa
23 Apafəras ana mə̀r mandza ŋa ɗa i daŋgay məma,
aɗaba Yesuw Kiristi ya ka,
a gekaha wusa mbaŋa.
24 Gà Markus nda Aristarkus,
nda gà Demas,
dite nda gà Luka ana tar ɗa i təv ga,
mìi ge a megemir Mbulum dze ya ka,
ta gekaha wusa tserdze asa mbaŋa.
25 Yesuw Kiristi BATSAH kwa ŋa ma ge a kurum ŋgwal lele,
a kurum ilik ilik tserdze.