Mendze gà ɓəzla megìse ana ŋgwal ŋa ika vatwa Mbulum a
3
1 Tsik a gà mburma Mbulum lele,
ta həna à gər a bəɗ a gà ɓəzla makwàrà mburma,
nda gà ɓəzla meslire tar ana tə dza aɗəm tar a.
Ta gəs aà tar ahəm,
ta hadzal ba aà mege dukw ana ŋgwal ŋa ya kəla pat.
2 Gwaɗa a tar ka,
ti tsik dukw ana ŋgwal ŋa tsiye aà wura tsa.
Ta gewa maàga tsa asa mbaŋa.
Ama ti ne ka,
gà ɓəzla magəsa gəzləŋ nda mazlə̀bà à gà mburma tserdze ivaɗ.
3 Aɗaba akahər ata ka,
kwa tekeɗe,
metsehe kwa a riŋ tsa mbaŋa,
kə̀ gə̀sakwa ahəm tsa,
kàa dzeyekwa ika vatwa ndzer ŋana ya.
Kà nekwa ka,
gà ɓele dukw ana ba kwa a waya ya ɗekɗek.
Kwa mandza ŋa ka,
gà ɓəzla swalwa.
Ki gewakwa are aka dukw mburma.
Gà misle ŋgiɗ tàa nekwa are ka,
kwa tekeɗe,
kàa nekwa a tar aɗəm are mbaŋa.
4 Ama ku mege kataya tekeɗe,
Mbulum ana ŋgat mala məmbə̀là à kwa ya,
aka pàt a kwa à ŋgwal ŋgar ana a ge a kwa akahər ata ya,
dite meme na a waya kwa hinne ya.
5 Kamala megweɗe ya,
a mbəl à kwa ka,
taf masakəŋa,
kàa vəlakwar aɗəm duwa tsa.
Bəla ki gweɗekwe a,
a mbəl à kwa ka,
agəra dukw ana ki gewakwar ŋgwal ŋa ya.
Ama ka,
kataya tsa.
A mbəl à kwa ka,
agəra ana kà ndzekwar are tsehe ya ɗekɗek pəra.
A bara bakal ana i gəzləŋ kwa ya.
A ge dər kataya ka,
nda ndzəɗa Mezite Mesife ŋgar ana tsəɗaŋŋa ya.
Kamala taŋa ya,
a wa dər kwa masula ŋa asa,
dite na kə̀ ŋgatakwa mesife ana awiya ŋa ya.
6 Mbulum a vəl a kwa Mezite Mesife ŋgar ka,
maràhà ŋa tìs lele,
nda ahər Yesuw Kiristi,
mala məmbala à kwa.
7 A ge dər kamala taŋa ya ka,
na dite kə̀ ŋgatakwa mesife ana à ndìv a tsa,
kà sərakwa dər ka,
a ta vile a kwe a ndzer a.
A ta ge a kataya ka,
aɗaba ana Mbulum a ge a kwa ŋgwal ŋa nda ahər Kiristi ya,
dite araha na kinehe kà nekwa tsəɗaŋŋa ika miɗ ŋgar a.
8 Dukw ana i tsikik a ya ka,
ndzer kaɗəŋ,
pàrsa iɗəm tsa.
A sèsiŋ ka,
ki dzeŋge a gà dukw ata a gà mburma kəla pat,
dite gà na ta gəs Mbulum a,
ta ge dukw ana ŋgwal ŋa ya kəla pat mbaŋa.
Aɗaba taŋa ka,
lele,
a ge a ŋgulum a gà mburma.
9 Ama kər ka,
da i təv gà bazlam ana tì dze akaba a taf masakəŋa ya.
Na bəla ta fèfil a aka gər gà tsir tar ana akahər ata ya,
nda gà bəla ta mbetsebe a ahəm agəra məpala ahəm Musa ka,
ka ta fàfəl a tar aaka tsa.
Aɗaba mege dukw ata ka,
taf masakəŋa,
tsəka,
a ge a ŋgulum a mburma tsidze.
10 Na wura a dzèbe a aà masasa ikaba gà mburma Mbulum a ka,
ɗifer à metsehe dzekwiŋ.
Na aka miyak à mege dukw ata tsəka,
ɗifer à metsehe masula ŋa asa.
Na bəla aka tsaraka tsa asa hiywe ka,
sifek miyak à ŋgat,
ka ndzum akaba i təv ilik ŋa nda gà ŋgat asa tsa.
11 Kər kà sər medzibe gà mburma ata ka,
wiyik tàa dzeye ika vatwa Mbulum a.
Tar ka,
gà ɓəzla bakal,
ta bets a ba nda ahər tar ŋa.
Mandəvandəv wusa ana Pul a ge ya
12 I slirehe a Artemas,
kige tsa bəla Tikikus a təv yak a fata mba.
Na kàa ŋgatar ka,
yaha vatwa aà madaha a təv gà a Nikupulis a fata tsəma.
Aɗaba i dzala ka,
i gwa,
i ti ndze a a fata tsəka,
mə̀tasl aka à medzè ahər ba,
haa a təv ana aka mah ba i bəɗ a dzekwiŋ.
13 Zlak gà Zenas,
mala meɗìfè à metsehe a mburma nda təv mege seriye ndzer ŋana,
nda Apalus lele.
Zlak tar i təv ana ti de a aka miɗ,
ti dehe a a təv yak a.
Ge a tar dukw ana a sàs a tar a,
kuɗa duwa ma ge a tar tsa.
14 Gà asiŋ gà mburma ma ana ta gəs Yesuw Kiristi kamala ma ya tekeɗe ka,
say ti sinike ba aà mege dukw ana ŋgwal ŋa ya kəla pat mbaŋa,
na dite ka,
ti sir a dər,
tì zlèk a gà na duwa aà tar tsiye ya.
Na tàa ge dər kamala taŋa ya tsəka,
megìse tar ana ta gəs a ka,
a ge a ŋgulum ɓav tsa.
15 Gà na mandza ŋa ɗa i təv ga ya,
ta gikeha wusa mbaŋa.
Ge a mə̀r wusa a gà mburma Mbulum ana i fata tserdze,
ti ne gà masla mə̀r a.
Mbulum ma ge a kurum ŋgwal tserdze.