MASULA
wakita ana Pul a wetseha
a TIMUTE ya
Pul a wizeha Timute
1
1 Na a wetsekaha wakita aaha ka,
iye Pul,
mala meslire Yesuw Kiristi.
Mbulum a waya,
na dite a zla iye aà meslire ŋgar ata ya.
A slər iye ka,
aà meɗìfè à mesife ana a tsik ahər,
a gwa ka,
a ta vile a kwe a nda ahər Yesuw Kiristi ya.
2 I wetseha ka,
a kər Timute ana kà ne kəla gà,
i waya kər nda ndzer a.
Gà Mbulum Tsir kwa nda Yesuw Kiristi BATSAH kwa ŋa ta gik ŋgwal,
ka ndza a tar are tsehe,
dite ta vəlak matasla yam a gəzləŋ zayya lele.
Pul a ge kəkaaha a Mbulum agəra Timute
3 I təv ana Yàa zlaŋa aɗaba kər a ka,
i gewa kəkaaha a Mbulum ana i gewar meslire nda gəzləŋ ilik,
nda ndzer ŋa ya.
Meslire ana i gewa ya ka,
kamala gà tsir gà ana akahər ata ta gewar a mbaŋa.
Ku mege ndaapat,
ku mege ndaavəɗ tekeɗe ka,
i hamawa a Mbulum aɗaba kər,
i gewar kəkaaha kəla pat.
4 Tuwa yak ata akahər ata ka tuwa aka iye ya i təv ana kà tama aba ya ka,
aka mìtsiŋ gər tsa.
Kər riŋ ki kìviŋ a ka,
hinne.
A sèsiŋ ka,
ki ŋgetemebe a asa,
na dite maŋgayaba à rèh a a gəzləŋ gà ya.
5 *I dzalawa gà gər ka,
aka megìse yak ana kə̀ gəs Mbulum nda gəzləŋ ilik,
nda ndzer ŋa ya mbaŋa.
Gà batsah məmər yak Luwisa nda mama yak Afinike na tə lah aà magəsa Mbulum nda gəzləŋ ilik kamala taŋa ya ya.
Ti tikewa madzala gà gər tar ka,
aka ŋgat kəla pat.
Ama i sər ndzer,
kər tekeɗe ka,
kər riŋ nda medzibe megìse ata mbaŋa.
Pul a màha à arəv a Timute
6 Aɗaba taŋa,
i gik a kamkam,
mə̀ mətsak gər tsa.
Akahər ana i tikik ahər aka gər a ka,
Mbulum aka vəlak ahər ndzəɗa aà megemir ŋgar lele.
A vəlak ka,
biy taf masakəŋa.
Ama kinehe ka,
ndzəɗa ata ma da aka miɗ aka miɗ dzəŋdzəŋ lele,
tsəka,
mà nikiɗ aà kər a tsa.
7 Aɗaba Mezite Mesife ana Mbulum a vəl a kwa ya ka,
aka ne à kwa gà ɓəzla magəɗa tsa.
Ama a vəl a kwa ka,
ndzəɗa ivaɗ,
nda meweye kwa ana ki weyekwe a mburma ya,
dite nda makwàrà ba kwa ana ki kwerekwe a ba ya ivaɗ asa.
8 Aɗaba taŋa,
tsik bazlam BATSAH kwa ŋana a mət aà dizl magə̀làwà ŋa ya a gà mburma ka,
parakka lele,
ki ge dər magəɗa tsidze.
Dite ku mege iye riŋ i daŋgay gədzə̀zlzla agəra ana i zezem a ŋgat a tekeɗe,
ki ge dər hwarwa ika miɗ mburma tsa asa mbaŋa.
Ama ka,
hadzal ba yak aà mesewere are nda iye,
aɗaba bazlam ŋgwal ŋana ivaɗ.
Mbulum na a vilek ahər a ndzəɗa ya.
9 Ŋgat ka,
aka mbala à kwa.
A zal a kwa ka,
a ne à kwa gà mburma ŋgar.
A ge dər kataya ka,
agəra ana ki gewakwar ŋgwal ŋa ya tsa.
A ge taŋa ka,
aɗaba ana a waya mege kataya ya pəra.
Ŋgwal ŋgar ata a ge a kwa nda ahər Yesuw Kiristi ya ka,
daga piŋŋe,
akahər ana gər ahəɗ a riŋ zukw tsiye.
10 Ama kinehe ka,
aka pàt aba kuɗa,
aɗaba ana Yesuw Kiristi,
mala məmbala à kwa ata a dara aka gər ahəɗ a ya.
A dara ka,
a zla aà kwa ndzəɗa məməta ya,
na dite məməta a ge a kwa a duwa asa tsa,
a ɗif a kwe a à mesife ana à ndìv a tsiye ndərzayya lele kuɗa ya.
Gà dukw ata tserdze ya ka,
ŋgwal bazlam na a ɗif dər a.
11 Bazlam ata ka,
Mbulum na a slər dərra iye ya.
A sasar na i tsik a a mburma tserdze,
i ɗif a ter a dər lele ya.
12 Aɗaba taŋa na kinehe i sèwèr a are kamala naha ya.
Ama ka,
i ge a magəɗa ɓav tsa.
Aɗaba i sər na wele ana i gəs ŋgat nda gəzləŋ gà ya.
Dite i sər ndzer asa ka,
dukw ana aka viliŋ a ahər a ka,
a kesle a lele,
haa a pat ana a ta ge seriye ya.
13 Zazam ka,
dukw ana ndzer ŋa kà tsaraka i təv ga ya.
Dite bazlam gà ata ka,
sər dər ndzer,
meme na ki tsik a a mburma ya.
Ki ge a dukw tserdze ka,
nda megìse yak ana kə̀ gəs Mbulum nda gəzləŋ a,
dite nda mawàyà ba yak ana kà waya mburma ya mbaŋa.
Ama kàa sle aà mege kataya ka,
aɗaba ana kər riŋ mandza ŋa i təv ilik ŋa nda Yesuw Kiristi ya.
14 Kasla ŋgwal dukw ata Mbulum a vəlak a ahər a lele.
Aɗaba Mezite Mesife Mbulum ana mandza ŋa i gəzləŋ kwa ya,
na a vilek ahər a ndzəɗa ya.
Mendze Pul ana a ndza ya
15 Kamala taŋa ya,
kər kà sər,
gà asiŋ gà mburma ana a riŋ ika ahəɗ Asiya i faka ya,
tàa miyak à iye ŋgwìɗik.
Ku mege gà Figelas nda Hermegenas tekeɗe ka,
tar i liwiŋ tar mbaŋa.
16 I heme a a BATSAH kwa ŋa,
na dite gà mburma ana i ga i bəra Winesifarus a,
ti ndzer a are tsehe ya.
Aɗaba ku mege iye riŋ i daŋgay tekeɗe ka,
wele ata a ge a hwarwa a mburma,
aɗaba iye tsa.
A mèwiŋaha à arəv ka,
hinne.
17 I təv ana a ndzera a kwite Ruma a fata ya ka,
a dza ba aà mayaha iye tsara,
haa a təv ana a ŋgat iye ya.
18 Ama kər nda gər yak ka,
kà sər dər lele mbaŋa,
meme na akahər ata a giŋ ŋgwal ŋa hinne i kwite Efesiya ya.
BATSAH kwa ŋa mà zlak ŋgat,
na dite a ndze are tsehe a Mbulum a pat seriye ŋgar a.