1 Timute 1

MALAHALAH

wakita ana Pul a wetseha

a TIMUTE ya

1 Na a wetse wakita aaha ka, iye Pul, mala meslire Yesuw Kiristi. Gà Mbulum, mala məmbə̀là à kwa, nda Yesuw Kiristi ata, wele ana kà sərakwa nda madzala gà gər kwa ka, a ta ge a dukw ana aka mbər metsìkè a kwa ya, na tə slərra iye ya ya. 2 I wetseha wakita aaha ka, a kər Timute ana kà ne kəla gà ndzer a, aɗaba kàa gəs Yesuw nda gəzləŋ yak ilik.

Gà Mbulum Tsir kwa nda Yesuw Kiristi BATSAH kwa ŋa ta gik ŋgwal, ka ndza a tar are tsehe, dite ta vəlak matasla yam a gəzləŋ zayya lele.

Mege metsehe a gà mburma ana ti dzeŋge a duwa ka,

nda pàrsa ya

3 A sèsiŋ ka, na ki ndze a riŋ i Efesiya ya, Timute, kamala ana i tsikik piŋŋe akahər ana i məsak riŋ à kər, i da aka ahəɗ Makaduniya ya. Ndza riŋ i fata, dite ka palawa ahəm a gà mburma ana tar riŋ i fata, ti tsik a bazlam Mbulum a mburma ndaka vatwa ŋa tsiye ya. 4 Ki gweɗe a ter a asa ka, ta miyak à gà bazlam ana taf masakəŋa, ti tsik a i madzala gà gər tar a. Dite tə tə dzala gà gər aka gər zləm gà tsir tar ana akahər ata ya tsa. Ŋgulum ŋa a riŋ tsa. Aɗaba na tàa zazam bazlam tar ata ka, manəsa bazlam à sìkèh a ika magər tar hinne asa. Gà bazlam ata ka, kwets a riŋ à zlèk a gà mburma ana tar riŋ ti yehe a vatwa Mbulum a tsa. Aɗaba kà sərakwa vatwa ŋgar ka, say nda magəsa ŋgat nda gəzləŋ ilik. 5 Ki tsik a ter a bazlam ata ka, dite ta waya mburma. Na aka sàs a tar mawàyà mburma ka, say gəzləŋ tar ma ge lele tsəɗaŋŋa, aruwaŋ ma ge iɗəm tsa. Ta gewa ka, dukw ana ŋgwal ŋa ya ɗekɗek. Dite ta gəs Mbulum nda gəzləŋ tar nda ndzer mbaŋa. Na tàa ge gà dukw ata fit ka, ta waya mburma kaɗəŋ. 6 Gà misle ŋgiɗ pam ka, tar ka, tàa dzeye ika vatwa Mbulum a. Ta miyak à mege gà dukw ata. Ti tsik a i tar ka, bazlam ana a ge a ŋgulum asa tsiye. 7 A sàs a tar medzeŋge məpala ahəm Mbulum a mburma, ta gweɗe a, waytsa mìi dzeŋge a kurum a nda ndzer. Tsaatsa, tə sər dukw ana ti tsik a ya tsa, kige tsa na ti dzeŋge a a mburma ya tsa.

8 Kà sərakwa, məpala ahəm Mbulum ka, lele ndzer, na wura a ge a megemir ŋa ndaka vatwa ŋa ya. 9 Ama kəla ka, dukw a riŋ ilik ma ta mətsakwa gər tsa. Aɗaba Mbulum a tike məpala ahəm ŋgar a bəɗ ka, agəra gà mburma ana tar gà ŋgwal ŋa ika miɗ ŋgar a tsa. A tike a bəɗ ka, agəra gà mburma ana tar riŋ ti nis a à vatwa ŋgar a ivaɗ, kamala megweɗe ya, agəra gà na tə tsaraka aaka zləm tsiye, dite gà na tə sər hwarwa tsidze ya, nda gà ɓəzla bakal, nda gà mburma ana mandzaɗak i gəzləŋ tar, tar riŋ ti sewle ahər a ya. A tike a bəɗ ka, agəra gà na ta bets a gà tsir tar nda gà məmər tar a, dite ka, ta bets a mburma fit a asa mbaŋa. 10 Mbulum a tike məpala ahəm ŋgar a bəɗ asa ka, agəra gà na tar riŋ ta ge a mezelme nda təv muva ya, nda gà na ta waya mehinneha aà gà asləka ŋgiɗ kamala gà zal nda məkəs a. Dite nda gà na tar riŋ ti dzewe a à mburma aà ɓele ya, agəra gà ɓəzla pàrsa, nda gà ɓəzla sida ana ti tsik a dukw ana ndzer tsiye. Dite asa ka, agəra gà mburma ana tar riŋ ta ge a gà dukw ŋgiɗ pampam ŋgwal ŋa tsa, ti nis a dər à guma ŋgar ana ŋgwal ŋa ya ya. 11 Batsah meɗè à dukw aaha ka, a dara i bazlam ŋgwal ŋa ana Mbulum a tsikiŋ, a miyekiŋ dər ɗa a ahər a. Bazlam ŋgwal ŋa ata ka, biy mezlibe à Mbulum Batsah ŋana. Aɗaba ŋgat na a ne təv mipise ahəm nda maŋgayaba ana kəla pat a.

Mege kəkaaha a Mbulum agəra mendzer are tsehe

12 Iye ihər i ge a kəkaaha a Yesuw Kiristi BATSAH kwa ŋa, agəra ana a zla iye kamala mala ndzer a. I ger a kəkaaha asa ka, aɗaba aka ne à iye mala meslire ŋgar asa mbaŋa. Aka viliŋ ndzəɗa aà megemir ŋgar ata asa. 13 Aɗaba piŋŋe ka, Yàa tsik ahər dukw ana ŋgwala tsiye hinne, Yàa ndavayar hinne asa, Yàa sèwèr are a gà mburma ana ti zezem a ŋgat asa mbaŋa. Ama ku mege Yàa ge gà dukw ata kataya tekeɗe ka, Yàa ndze are tsehe a Yesuw Kiristi hinne. Aka giŋ dukw ana ŋgwal ŋa ya. Aɗaba akahər ata ka, Yàa gəs ŋgat nda gəzləŋ ilik zukw tsa. Dite i sər dukw ana i ge a ya tsa asa. 14 Taŋa ŋgat BATSAH kwa ŋa aka pisiŋ ahəm hinne. Dite na kinehe a viliŋ ndzəɗa aà magəsa ŋgat nda gəzləŋ gà ilik, nda mawàyà ba ana a riŋ ika magər kwa mburma nda gà ŋgat a. 15 Tsarakum, Yesuw a dara aka gər ahəɗ a ka, aà məmbala à gà ɓəzla bakal, kamala iye ana Yàa ge bakal ka, hinne, a za biy mburma tserdze ya. Bazlam aaha i tsik a ka, ŋgwal bazlam ndzer, pàrsa iɗəm tsa. Say gà mburma ta gəs a gəzləŋ tar lele. 16 Naha i tsik taŋa ka, iye mala bakal batsah ŋana seyiŋ. Ama ka, Yàa ndze are tsehe a Yesuw Kiristi. Aka giŋ ŋgwal ŋa hinne. A giŋ ŋgwal ata ka, dite a ɗif a dər a mburma, meme na a gəs gəzləŋ kaɗəŋ a. I ndzer are tsehe ka, aɗaba a sasar aà mimèhe à arəv a mburma. Dite gà mburma ata tə sər ka, na tàa gəs ŋgat nda gəzləŋ ilik ka, ti ta ŋget a mesife ana à ndìv a tsa aà biybiy a aka miɗ mbaŋa. 17 Ku weke mà zàmbaɗa à Əbay Mbulum ana mekwere ŋgar a ndze a aà biybiy a. Ŋgat na nda gà mesife ana à ndìv a tsiye. Ŋgat ilik na Mbulum Batsah ŋa, mburma a sle aà meŋgeter a tsiye. Mezembeɗe ma ge ka, biy ŋgar ilik. *Amin.

18 Kər kinehe ka, kamala kəla gà ya, Timute. Yàa miyak aba à bazlam aaha a ahər yak a, kamala ana gà ɓəzla məma à guma Mbulum ti tsik piŋŋe ndakahər yak a. Dzala aka bazlam tar ata lele, ma ne dukw ahər yak. Dite megemir yak ma da aka miɗ aka miɗ nda ŋgwal ŋa. 19 Bazlam Mbulum ma ndza i gəzləŋ yak kəla pat ndidwe ndidwe, aruwaŋ ma ta ge iɗəm tsa. Gà misle ŋgiɗ pam ka, tàa niw vatwa ata ŋgwal ŋa ya. Aɗaba taŋa, tar ka, tàa dzeye ika miɗ Mbulum a. Megìse tar a riŋ ta gis a Mbulum ndzer asa tsa. 20 I liwiŋ gà mburma ata ka, gà Himanayas nda Aleksandire. Yàa dza tar a təv mesewere are Əbay sitene, ti sir a gà gər lele ŋgwal ŋa, dite ti ti tsik dukw ana ŋgwal ŋa tsiye, aà Mbulum asa tsa.