Hamum a Mbulum aɗaba mə̀r
3
1 Gà damər mə̀r,
naha ka,
dukw ana mì ndìv a dər à bazlam aaha ya:
Hamum a Mbulum aɗaba mə̀r mbaŋa,
dite na bazlam BATSAH kwa ŋa a de a aka miɗ bise tsara,
mburma ta gis a nda megèr kəkaaha kamala ana a ge ba i təv kurum a mbaŋa ya.
2 Dite hamum a Mbulum asa mbaŋa ka,
ma kasla mə̀r i təv gà mburma ana metsehe tar manəsa ŋa,
ta ge a mə̀r a dukw ana ŋgwala tsiye ya.
Aɗaba gà mburma tserdze tsa na ta gis a bazlam Mbulum a.
3 Ama BATSAH kwa ŋa a ge a kurum a dukw ana a tsik i sida ya hiywe.
Ŋgat ka,
a vile a kurum a ndzəɗa a gəzləŋ kurum ɓəŋɓəŋ lele.
A kesle a kurum i təv Əbay sitene ya asa mbaŋa,
na dite à mbè aà kurum a asa tsiye.
4 BATSAH kwa ŋa ka,
a riŋ à zlèk a mə̀r mbaŋa,
na dite mìi gis a kurum lele,
mì sir a dər ka,
kurum ihər ki gwim a ka,
dukw ana mì ɗif a kurum dər a haa kinehe,
dite ki ta gwim a hiywe kamala taŋa ya mbaŋa asa ya.
5 Mìi heme a a BATSAH kwa ŋa,
dite ma ɗif a kurum à vatwa,
aà metsereke meme na Mbulum a waya kwa lele ya,
dite nda mesimeha a mesewere are kamala Yesuw Kiristi ana a simereha mbaŋa ya.
Ku mege weke ma ge megemir lele
6 Gà damər mə̀r,
mìi tsik a kurum a ka,
nda zləm Yesuw Kiristi BATSAH kwa ŋa,
mə̀r ihər mìi gweɗe a kurum a ka:
Ka ndzum i təv ilik ŋa nda gà asiŋ gà mburma Mbulum ana rìmme ti ndze a gà màsar ŋa,
a sàs a tar megemir tsiye tsa.
Aɗaba tar ka,
ta gəs dukw ana mì tsik a kurum a tsa.
7 Aɗaba kurum nda gər kurum ka,
kà sərum mendze mə̀r ana mì ndza i təv kurum akahər ata ya.
Ama ka,
lele na ki gwim a kamala mə̀r ata ya.
Aɗaba mə̀r ka,
gà màsar ŋa tsa.
8 Kwets maa zəm dukw mezime aà gà misle ŋgiɗ a taf masakəŋa ɓav tsa.
Ku mege ndaavəɗ,
ku mege ndaapat tekeɗe,
maa yà ba aà megemir ka,
hinne na aà magala dər ba mə̀r a.
Aɗaba a sàs a mə̀r na mì sèwèr a kurum are agəra dukw ana mìi zim a ya tsa.
9 Mege dukw ata mì ge dər kamala taŋa ya ka,
ana ka,
mìi sle a aà mewize aà kurum a dukw mezime zləmana dukw ŋgar,
bakal iɗəm tsa.
Ama ka,
mì ge megemir seyiŋ ivaɗ,
aà meɗìfè a kurum dər ka,
dite ki gwim kamala taŋa ya mbaŋa.
10 Akahər ana mə̀r mandza ŋa a riŋ i təv kurum a ka,
maa tsik a kurum,
mì gwaɗa a kurum ka:
«Na wura a waya mege megemir tsəka,
ma zəmawa dukw mezime ɓav tsa mbaŋa.»
11 Mì tsik a kurum kataya ka,
aɗaba na mì tsaraka ka,
ta gwa là,
gà misle ŋgiɗ ika magər kurum ka,
ŋgəɗatstsa ti ndze a kataya,
a sàs a tar megemir tsidze.
Ama na a ne megemir tar ka,
tsap tsap mandàbàya aka bazlam.
12 Medzìbe gà mburma ata ka,
mìi pele a ter a ahəm nda zləm Yesuw Kiristi BATSAH kwa ŋa,
mìi gweɗe a ter a ka,
say ta ge megemir ndaka vatwa ŋa,
dite ta ŋget a dukw mezime tar ana ti zim a nda ahər tar a ya.
13 Ama kurum gà damər mə̀r ka,
dum aka miɗ aka miɗ nda mege dukw ana ŋgwal ŋa ya,
ka ti yum ba tsidze.
14 Na bəla wura a sasar magəsa ahəm aà dukw ana mì wetse i huɗ wakita aaha ya tsəka,
sərum dər,
wele ata ka,
ka tə ndzum akaba i təv ilik ŋa nda gà ŋgat asa tsa,
na dite ka,
hwarwa a ger a ya.
15 Ama kə̀la ka,
ka ta fə̀rum aà ŋgat kamala mala mene are are kurum a tsa.
Ki tsikwimer a ivaɗ ka,
aɗaba ana ŋgat damər kurum a hiywe ya.
Mandəvandəv mifefile
16 Mìi heme a a BATSAH kwa ŋana ŋgat mala məvəla zayzay a mburma ya,
dite mə vəl a kurum matasla yam a gəzləŋ kəla pat ndaka vatwa ŋgiɗ pampam.
BATSAH kwa ŋa ma ndza nda gà kurum tserdze.
17 Iye Pul,
i ge a kurumaha wusa.
I wetse naha ka,
nda ahər gà ŋa.
Aɗaba i wetsewa zləm gà aka mandəvandəv wakita tserdze ka,
kataya.
Naha ka,
mewetse dukw gà.
18 Yesuw Kiristi BATSAH kwa ŋa ma ge a kurum ŋgwal ilik ilik tserdze kəla pat.