Mala mene are a Mbulum
2
1 Gà damər mə̀r,
kurum ihər ki vevwim a ka,
pat ana Yesuw Kiristi BATSAH kwa ŋa à mère a ka,
dite ki yehekwebe a gər a təv ŋgar a.
Ama kəla ka,
mìi ge a kurum a kamkam:
2 Wàkit wakit gər ma ta wise a kurum bise tsara tsa,
na i təv ana gà misle ŋgiɗ ta gweɗe a kurum a ka,
pat məmàra BATSAH kwa ŋa ya ka,
aka ndze aɗəm kuɗa ya.
Na bəla wura a ne à ba ŋgar kamala mala məmà à bazlam Mbulum a,
aka mà a kurum dər ka,
magəɗa ma ta ge a kurum tsa.
Kige tsa na kàa tsarakum à gà na ti tsikewa a kurum bazlam Mbulum a,
nda gà bəla ta gweɗe a,
iye Pul na a wetse taŋa ya ka,
ka ta gəsum tsa.
3 Wura ilik ma ta bana kurum tsidze.
Aɗaba a pat ana à mère a ya ka,
kataya tsa.
Malahalah ŋa ka,
say gà mburma hinne ti niw a Mbulum,
nda gà wele ana a ner a are,
a ti dzeye a iɗəm à ŋgat a,
a dere a dzekwiŋ.
Dite i dəba ŋa ya ka,
pat ŋa a ndzere a kuɗa.
4 Mala mene are ŋgar ata ka,
a ge a guvəl aà gà dukw ana gà mburma tì zlibe a dər a tserdze,
ku mege nda təv Mbulum,
mege nda təv dukùla tekeɗe ya.
A gweɗe a ka,
iye na a za gà dukw ata tserdze ya.
Ama ndeyndey ŋa ka,
a de a a ga Mbulum Batsah ŋana,
a ti ndze a aka təv mendze ana gà mburma tì zlibe a dər a.
A gweɗe a ka,
iye na Mbulum a.
5 Aka ana iye riŋ mandza ŋa i təv kurum a ka,
Yàa tsik a kurum aba gà dukw ata ya dze ana,
kà sərum asa tsiye?
6 Kinehe ka,
duwa a riŋ na a peler a ahəm aà madàra ya tə̀ma.
Aɗaba kurum kà sərum dukw ana a ge a dər kamala taŋa ya ya.
Ama i təv ana məpaslà ahər Mbulum aka ndze aɗəm a ka,
mala mene are ŋgar ata a dere a kuɗa.
7 Kaɗəŋ,
ku mege kinehe,
gà mburma hinne tàa mbər medzè ba aà menìwè Mbulum kamala taŋa ya.
Dite kà sərakwa ndzəɗa wele ata ŋgwala tsiye a riŋ ka,
aɗaba Mbulum na a ɗif a kwa dər a.
Ama gà dukw ata ka,
ti dere a zukw tsa.
Say na wele ata a riŋ a peler a ahəm aà madàra kinehe ya,
a de a iɗəm a dzekwiŋ,
8 dite ka,
mala mene are a Mbulum ata à pèt a aba kuɗa.
Ama i təv ana Yesuw BATSAH kwa ŋa à mère a nda ndzəɗa ŋgar ana ika gər gà duwa tserdze ya ka,
a dzeye a iɗəm à ŋgat a nda ndzəɗa mesife ŋgar ana a vizl aakara tìrr i bazlam ŋgar a kamala himbiɗ a ya.
9 Mala mene are a Mbulum ata a dere a ka,
nda ndzəɗa Əbay sitene ya.
Kamala taŋa ya,
a ta ge a gà dukw mene aà mburma pampam hinne,
a sasar na a bene a dər mburma nda dukw pàrsa ŋgar ata ya.
10 A ta ge a ka,
gà dukw ana ŋgwala tsiye pampam aà məbànà dər gà na ti ti dzeye a akwa ana a mbete a tsa aà biybiy a tserdze nda dukw ŋgar ata.
Ti ti sèwèr a are hinne,
aɗaba ana a sàs a tar magəsa dukw ana ndzer a tsa,
ti niw a.
Na mege ta gəs ka,
ana ka,
Mbulum a mbil a à tar.
11 Agəra ana ta gəs ŋgat tsiye ka,
Mbulum a ta vile a ter a madzala gà gər ana ŋgwala tsa hàɓəragawwa,
a bene a tar aà ta gəs dukw pàrsa ata ya.
12 Aɗaba taŋa na seriye Mbulum a ta gis a gà na ta gəs dukw ana ndzer a tsa,
ta ŋgeye a ba ka,
aà mege dukw ana ŋgwala tsa tserdze ya.
Mbulum a pala kurum ka, aà mə mbala à kurum
13 Ama kurum kinehe ka,
gà damər mə̀r,
say mìi ge a kəkaaha a Mbulum kəla pat,
aɗaba kurum.
Ŋgat ŋa na waya kurum a.
Aɗaba a pala kurum ka,
daga aà gər ana aka ge gər ahəɗ zukw tsiye,
na dite ka,
a mbil a à kurum nda ndzəɗa Mezite Mesife ŋgar ana a ne à kurum gà mburma ŋgar a.
A mbil a à kurum ka,
aɗaba ana kə̀ gəsum dukw ana ndzer a mbaŋa ya.
14 Mbulum a zal a kurum ka,
i təv ana mì ɗif a kurum à bazlam ŋgwal ŋa ana aka gər Yesuw Kiristi ya ya.
A sasar ka,
ki ŋgeywim a ba agəra ndzəɗa Yesuw Kiristi BATSAH kwa ŋana ika gər gà duwa tserdze ya mbaŋa.
15 Aɗaba taŋa,
gà damər mə̀r,
mə̀rum aba nda təv megìse kurum ana kə̀ gəsum Yesuw Kiristi nda gəzləŋ a.
Dum dər aka miɗ aka miɗ nda metìkè madzala gà gər aka dukw ana mì ɗif a kurum dər a.
Ku mege mì tsik a kurum nda bazlam,
nda gà ku mege mì wetse a kurumaha aka wakita tekeɗe ka,
gəsum,
tikwim a gər lele.
16 Aɗaba Mbulum Tsir kwa a waya kwa.
A ge a kwa ŋgwal ŋa.
A vəl a kwa madzala gà gər aka ŋgwal dukw ana ka sərakwa,
ki ta ŋgetekewe a aka miɗ mba ndzer a.
Kamala taŋa ya,
a riŋ à me a kwe a dərraha à arəv hiywe.
Mìi hemer a ka,
a tar nda Yesuw Kiristi BATSAH kwa ŋa,
17 na dite ta me a kurumehe a à arəv,
ta vile a kurum a ndzəɗa aà mege dukw ana ŋgwal ŋa ya kəla pat,
nda metsìkè dukw ana ŋgwal ŋa ya hiywe mbaŋa asa.